Oi Laloatao, A?

Gima Kohorona matamatadia oi duahia neganai oi moalelaidia, a? Henunai idia noho henanadai mani oi haerelaidia:

Mataio 18:15-17 ai, Iesu ese kara dika be edena bamona ia herevalaia?

Ia ese tadikaka taihu sibona ese idia hamaoromaoroa diba hepapahuahu ia herevalaia. To bema unai be hekwakwanai badana bona idia hamaoromaoroa lasi, ia kerere tauna be kongrigeisen amo idia atoa siri diba. Hegeregere, ia be ta ena ladana ia hadibaia o koikoi dalanai ma ta ena moni ia abia (fraud).​—w16.05 rau 7.

Baibel duahiduahi amo namo oi abia totona, dahaka oi karaia diba?

Inai oi karaia diba: Mai laloa kehoa ida duahia, oi badinaia diba karadia oi tahua; sibona oi nanadaia, ‘Edena bamona inai do lau gaukaralaia ma haida lau durua totona?’; oi duahia gauna dekenai diba ma haida oi abia totona, idia noho vadaeni tulu oi gaukaralaia hetahu oi karaia totona.​—w16.05 rau 24-26.

Esekiela ena matahanai ai, torea peni ia dogoatao tauna bona tuari kaia idia dogoatao tatau 6 ese daidia idia laulaulaia?

Idia ese idaunegai Ierusalema hanuana idia hadikaia bona Aramagedono ai Satani ena tanobada dikana do idia hadikaia ore anerudia idia laulaulaia. Hari inai negai, torea peni ia dogoatao tauna be Iesu Keriso ia laulaulaia, ia ese hahemauri do idia abia taudia makaia gaukarana do ia karaia.​—w16.06 rau 16-17.

Baibel be edena dala ai ia boio lasi?

Baibel ia boio lasi, ena be (1) dimairi bona ma gau haida ese idia hadikaia toho; (2) dagedage taudia idia ura hadikaia toho; bona (3) haida idia ura idia haidaua. ​—wp16.4 rau 4-7.

Edena dala ai Keristani tauna be ena noho dalana ia haidaua diba?

Oi ura henia momokani gaudia oi diba be namo, anina lasi gaudia hoia karana dadaraia. Bajet namona karaia. Oi gaukaralaia diba lasi kohu negea, bona emu abitorehai davana oi karaia. Pat-taim moni gaukara oi karaia, bona palani karaia haroro gaukara oi habadaia totona.​—w16.07 rau 10.

Baibel ena hereva hegeregerena, golo ia hereaia gauna be dahaka?

Iobu 28:12, 15 ese ia hahedinaraia Dirava amo ia mai aonegana ese golo eiava siliva ia hereaia. Unai aonega oi tahua noho lalonai, namona be oi manau bona emu abidadama oi hagoadaia noho.​—w16.08 rau 18-19.

Tadikaka ta ese ena besoso ia sevia lasi be namo, a?

Tano haida ai, besoso idia utua namonamo bona ia kwadogi be kerere lasi bona unai ese Basileia sivaraina harorolaia gaukarana ia koua lasi. To, tadikaka ma haida be edia besoso idia sevia. (1 Kor. 8:9) Tano ma haida ai, bema Keristani tadikaka ta ese ena besoso ia sevia lasi, unai be hemataurai karana lasi.​—w16.09 rau 21.

Davida bona Goliata idia tuari ena sivarai be momokani, a?

Baibel ia gwau Goliata ena lata be mita toi bamona, iseda negai idia sivarailaia tau latadia be sentimita 15 amo ia hanaia. Davida be momokani ia noho, idaunegai toretorena ta dekenai inai hereva “Davida ena ruma” ia noho bona Iesu ena hereva ese ia hamomokania Davida be momokani ia noho. Haida ese idia davaria gaudia ese unai ibounai ia hamomokania.​—wp16.5 rau 13.

Diba, laloparara, bona aonega edia idau be dahaka?

Mai ena diba tauna ese hereva idauidau ia haboua. Bona mai ena laloparara tauna ese unai hereva ta ta idia gaukara hebou dalana ia hahegeregerea. To mai ena aonega tauna ese diba bona laloparara ia gaukaralaia hebou gau namona ta ia karaia totona.​—⁠w16.10 rau 18.