Oi Laloatao, A?

Gima Kohorona matamatadia oi duahia neganai oi moalelaidia, a? Henunai idia noho henanadai mani oi haerelaidia:

Sekit naria taudia bona kongrigeisen elda taudia be Dirava ena orea amo hakaua herevadia idia abia neganai, dahaka idia karaia be namo?

Namona be kamonai karana idia hahedinaraia. Sibodia do idia nanadaia: ‘Egu tadikaka taihu edia abidadama lau hagoadaia, a? Lau abia hakaua herevadia lau abia dae bona badinaia, a?’​—w16.11, rau 11.

Edena nega ai Babulonia ese Keristani taudia momokanidia ia guia?

Aposetolo taudia idia mase murinai, unai ia vara. Unai nega ai, dubu gunalaia taudia edia orea idia hamatamaia. Tomadiho bona Gavamani ese aposteit karana idia durua bona witi bamona Keristani taudia idia koua toho. To lagani 1914 be do lasi neganai, horoa taudia be Babulonia Badana idia rakatania.​—w16.11, rau 23-25.

“Tauanina ena ura gaudia laloa karana” bona “lauma helaga ena gaudia laloa karana” ena idau be dahaka? (Roma 8:6)

Tauanina ena ura gaudia ia laloa tauna be ena ura sibona ia laloa bona badinaia, bona nega ibounai unai gaudia ia herevalaia. Lauma helaga ena gaudia ia laloa tauna be Dirava ena laloa hegeregerena do ia laloa; unai bamona Keristani tauna be lauma helaga ese ena lalohadai ia biagua. Tauanina ena ura gaudia laloa karana ese mase ia mailaia, to lauma helaga ena gaudia laloa karana ese mauri bona maino ia mailaia.​—w16.12, rau 15-17.

Laloa momo karana koua daladia haida be dahaka?

Mai anina bada gaudia atoa guna, lalohadai maorona abia, dina ta ta ai, nega atoa sibona oi noho totona, Dirava ia havaraia gaudia moalelaia, oi moale be namo, nega ibounai tauanina treinia, bona nega korikori ai oi mahuta.​—w16.12, rau 22-23.

“Dirava ese [Enoka] ia abia lao, unai amo mase ia itaia lasi.” (Heb. 11:5) Edena dala ai?

Dirava ese Enoka ia hamahutaia bona metairametaira ena laga ia kokia ela bona ia mase, to Enoka ia diba lasi ia be do ia mase.​—wp17.1, rau 12-13.

Dahaka dainai manau karana be mai anina bada?

Manau tauna be ia sibona ia diba namonamo bona ia diba gau haida be ia sibona ese ia karaia diba lasi. Bema ta be unai ia diba, ma haida ia kara henia dalana amo unai do ia hahedinaraia, bona ia sibona do ia laloa bada lasi.​—w17.01, rau 18.

Dahaka ese ia hamomokania aposetolo edia negai ia noho hakaua oreana be Dirava ese ia gunalaia, hari ia noho Hakaua Oreana ia gunalaia hegeregerena?

Lauma helaga ena heduru amo Baibel ena hereva momokani haida idia lalopararalaia. Aneru edia heduru amo haroro gaukara idia karaia namonamo, bona hakaua herevadia idia henia neganai, Dirava ena Hereva dekenai idia tabekau. Hari danu unai bamona idia karaia.​—w17.02, rau 26-28.

Keristani tauna be abia hidi ta ia karaia murinai, iena lalona ia haidaua diba, a?

Namona be iseda hereva ita badinaia. To ita karaia vadaeni abia hidi be nega haida ita lalodia lou be namo. Hegeregere, taunimanima idia helalo-kerehai murinai, Dirava ese ena abia hidi ia haidaua bona Nineva ia hadikaia lasi. Danu nega haida, iseda mauri o noho dalana ia idau eiava diba matamata ita abia dainai iseda abia hidi ita haidaua diba.​—w17.03, rau 16-17.

Dahaka dainai ma ta ena ladana ita hadikaia lasi be namo?

Ma ta ena ladana hadikaia karana ese hekwakwanai ia habadaia diba. Herevana ita be maoro eiava kerere, to ma ta maumauraia karana ese hekwakwanai do ia hamaoromaoroa lasi.​—w17.04, rau 21.