Daika ese Hari Dirava Ena Taunimanima Ia Hakaua?

1, 2. Iesu be guba dekenai ia daekau murinai, ena aposetolo taudia be reana dahaka idia laloa?

IESU ena aposetolo taudia be Olive Ororona ai idia gini, bona guba idia itaia noho. Oibe, idia itaia edia biaguna bona turana, Iesu, be Dirava ese ia abia daekau bona ori ese ia koua. (Kara 1:9, 10) Lagani rua lalonai, Iesu ese idia ia hadibaia, hagoadaia, bona hakaua. Hari ia be idia ia rakatania vadaeni. Bona idia be dahaka do idia karaia?

² Iesu ese ena murinai idia raka taudia ia haganidia, ia gwau: “Ierusalema, Iudea ibounai, Samaria bona tanobada ena daudau momokani gabudia dekenai, lau do umui gwauraia hedinarai.” (Kara 1:8) Unai hahegani be edena bamona do idia hagugurua? Iesu ese ia hamaorodia, daudau lasi murinai idia be lauma helaga do idia abia. (Kara 1:5) To, tanobada ibounai dekenai idia haroro totona, hakaua herevadia idia abia be namo. Baibel negadiai, Iehova ese gwaukau taudia ia gaukaralaia iena taunimanima idia hakaua totona. Reana aposetolo taudia idia laloa, ‘Iehova be hakaua tauna matamata do ia abia hidi, a?’

3. (a) Iesu be guba dekenai ia daekau murinai, aposetolo taudia be dahaka abia hidi idia karaia? (b) Inai stadi ai dahaka do ita herevalaia?

³ Wiki rua bamona murinai, Iesu ena hahediba taudia be Toretore Helagadia idia stadilaia, Dirava ena heduru totona idia guriguri, bena Mataia idia abia hidi, ia ese Iuda Iskariote ena gabu ia abia. (Kara 1:15-26) Dahaka dainai idia bona Iehova dekenai unai abia hidi be mai anina bada? Badina Mataia be mai anina bada gaukarana do ia karaia.a Iesu ese ena aposetolo taudia ia abia hidi, unai amo iena hesiai gaukara lalonai ia do idia bamoa sibona lasi, to Dirava ena taunimanima huanai mai anina bada gaukarana idia karaia totona. Unai be dahaka gaukara, bona edena dala ai Iehova ese Iesu amo idia ia durua unai gaukara idia karaia totona? Hari Dirava ena taunimanima huanai haida be unai gaukara idia karaia danu, a? Bona edena dala ai ‘ita idia hakaua taudia do ita laloatao’​—“igui hesiai tauna mai ena kamonai bona mai ena kara maoromaoro” danu?​—Heb. 13:7; Mat. 24:45.

IESU ESE KONGRIGEISEN IA HAKAUA

4. Aposetolo edia negai, aposetolo taudia bona elda taudia ma haida be dahaka maduna idia huaia?

⁴ Pentekoste 33 C.E. ai, aposetolo taudia ese Keristani kongrigeisen idia hakaua matamaia. Unai nega ai, “Petero be aposetolo taudia 11 ida ia gini tore” bona hahemauri sivaraina be Iuda bona idau bese taudia hutuma dekenai ia gwauraia. (Kara 2:14, 15) Idia momo be abidadama taudia ai idia lao. Bona unai nega amo idia ese “aposetolo taudia edia hadibaia herevadia idia kamonai namonamo.” (Kara 2:42) Aposetolo taudia ese kongrigeisen ena moni idia naria. (Kara 4:34, 35) Dirava ena taunimanima dekenai hakaua herevadia idia henia, idia gwau: “Ai be guriguri bona Dirava ena hereva hadibaia gaukarana do ai goadalaia.” (Kara 6:4) Bona haroro gaukara habadaia totona, Keristani taudia ma haida be teritori matamatadia dekenai idia siaia. (Kara 8:14, 15) Gabeai, horoa elda taudia ma haida be aposetolo taudia idia bamoa bona kongrigeisen ena gaukara idauidau idia durua. Idia be hakaua oreana taudia dainai, kongrigeisen ibounai dekenai hakaua herevadia idia henia.​—Kara 15:2.

5, 6. (a) Lauma helaga ese edena dala ai hakaua oreana ia hasiahua? (Laulau ginigunana herevalaia.) (b) Aneru ese edena dala ai hakaua oreana idia gunalaia? (c) Dirava ena Hereva ese edena dala ai hakaua oreana ia gunalaia?

⁵ Keristani taudia ginigunadia idia laloparara, Iehova Dirava ese edia Hakaua Tauna, Iesu, amo hakaua oreana ia gunalaia. Edena bamona unai idia diba? Gau ginigunana be, lauma helaga ese hakaua oreana ia hasiahua. (Ioa. 16:13) Horoa Keristani taudia ibounai ese lauma helaga idia abia, bona unai lauma ese Ierusalema ai idia noho aposetolo taudia bona elda taudia ia durua edia maduna idia huaia namonamo totona. Hegeregere, lagani 49 C.E. ai, lauma helaga ese hakaua oreana ia gunalaia dainai, idia ese kopina utua karana dainai ia vara hepapahuahu idia hamaoromaoroa. Kongrigeisen taudia ese edia hakaua herevadia idia badinaia dainai, “edia abidadama ia goada ia lao bona dina ta ta ai edia namba ia bada daekau.” (Kara 16:4, 5) Hakaua oreana amo idia abia revarevana ese ia hahedinaraia, tadikaka be unai abia hidi idia karaia neganai, idia ese lauma helaga ena huahua idia hahedinaraia, hegeregere lalokau bona abidadama.​—Kara 15:11, 25-29; Gal. 5:22, 23.

⁶ Gau iharuana, aneru ese hakaua oreana idia gunalaia. Korenelio be Keristani tauna ai ia do lao lasi neganai, aneru ta ese ia hamaoroa aposetolo Petero do ia boiria. Petero be Korenelio bona ena varavara taudia ia haroro henia murinai, idia ese lauma helaga idia abia, herevana idia be edia kopina idia utua lasi. Unai dainai aposetolo taudia bona tadikaka ma haida ese Dirava ena ura idia badinaia, bona kopina idia utua lasi Idau Bese taudia be Keristani kongrigeisen lalonai idia abia dae. (Kara 11:13-18) Ma danu, aneru edia heduru dainai, hakaua oreana ese ia gunalaia haroro gaukarana be ia bada ia lao. (Kara 5:19, 20) Gau ihatoina, Dirava ena Hereva ese hakaua oreana ia gunalaia. Oibe, unai horoa elda taudia ese Baibel ena hahediba herevadia dainai idia vara hepapahuahu idia hamaoromaoroa eiava hakaua herevadia idia henia neganai, Toretore Helagadia idia gaukaralaia.​​—⁠Kara 1:20-22; 15:15-20.

7. Dahaka dainai ita gwau Iesu ese Keristani taudia ginigunadia ia hakaua?

⁷ Ena be hakaua oreana ese Keristani kongrigeisen ginigunana ia gunalaia, to idia abia dae Iesu be edia Hakaua Tauna. Aposetolo Paulo ia gwau, Keriso ese “ia henia taudia haida be aposetolo taudia.” Ma ia gwau: “Namona be lalokau amo gau ibounai dekenai lo taudia ai ita lao, bona iseda kwarana, Keriso, henunai ita noho.” (Efe. 4:11, 15) Idia be aposetolo tauna ta ena ladana idia abia lasi, to “Dirava ena hahekau henunai, hahediba taudia ese nega ginigunana inai ladana Keristani idia abia.” (Kara 11:26) Momokani, Paulo ese idia ia hadibaia, aposetolo taudia bona edia hakaua taudia amo idia abia “hadibaia herevadia [idia] badinaia noho” be mai anina bada. Ma ia gwau: “To lau ura umui diba, tatau ibounai [hakaua oreana taudia danu] edia kwarana be Keriso, . . . bona Keriso ena kwarana be Dirava.” (1 Kor. 11:2, 3) Oibe, iena Kwarana, Iehova Dirava, ena henunai hairai ia abia tauna, Keriso Iesu, be kongrigeisen ia hakaua.

“INAI BE TAUNIMANIMA EDIA GAUKARA LASI, TO DIRAVA ENA GAUKARA”

8, 9. Lagani 1880 bamona ai, Tadikaka Russell be dahaka ia karaia?

⁸ Lagani 1880 bamona ai, Charles Taze Russell bona ena bamodia haida idia ura bada Keristani tomadiho momokanina idia hamatamaia lou. Baibel ena hereva momokani be gado idauidau ai idia halasia totona, Zion’s Watch Tower Tract Society be lagani 1884 ai idia hamatamaia, bona Tadikaka Russell be presiden.b Ia ese Baibel ia stadilaia namonamo, bona mai gari lasi ida Toi Tamona bona mase diba lasi souli ena hahediba herevadia ia hakoikoia. Ia dibaia gauna ta be Keriso be lauma tauna ta bamona do ia lou mai, bona “idau bese edia nega” be lagani 1914 ai do ia doko. (Luka 21:24) Tadikaka Russell ese ena nega, goada, bona moni ia gaukaralaia ma haida dekenai unai hereva momokani ia halasia totona. Momokani, unai mai anina bada negana ai, Iehova bona kongrigeisen ena kwarana ese Tadikaka Russell idia gaukaralaia.

⁹ Tadikaka Russell be taunimanima amo hanamoa ia tahua lasi. Lagani 1896 ai, ia gwau: “Ai ura lasi ai sibona eiava emai toretore dainai, taunimanima ese ai do idia matauraia; danu, ai ura lasi ai idia gwauraia Reverend o Rabi. Bona ai ura lasi taunimanima o orea ta ese emai ladana idia gaukaralaia.” Ma ia gwau: “Inai be taunimanima edia gaukara lasi, to Dirava ena gaukara.”

10. (a) Edena nega ai Iesu ese “igui hesiai tauna mai ena kamonai bona mai ena kara maoromaoro” ia abia hidi? (b) Hakaua Oreana be Watch Tower Society amo ia idau dalana herevalaia.

¹⁰ Tadikaka Russell ia mase bena lagani toi murinai, lagani 1919 ai, Iesu ese “igui hesiai tauna mai ena kamonai bona mai ena kara maoromaoro” ia abia hidi. Dahaka dainai? Unai amo iena hesiai taudia dekenai “nega korikori ai . . . aniani do ia henia.” (Mat. 24:45) Unai laganidia ai, Brooklyn, New York dekenai idia noho horoa tadikaka ese Iesu murinai idia raka taudia totona Baibel ena hakaua herevadia idia halasia. Lagani 1940 murinai, inai hereva “hakaua oreana” be iseda pablikeisen lalonai ia hedinarai matamaia. Unai nega ai idia laloa unai hereva be Watch Tower Bible and Tract Society ena dairekta ia herevalaia. To lagani 1971 ai, idia laloparara Hakaua Oreana be Watch Tower Society bona ena dairekta taudia amo idia idau​—Watch Tower Society be tano ena taravatu hegeregerena orea ena gaukara idauidau ia naria. Oibe, Hakaua Oreana dekenai horoa tadikaka idia noho, bona idia be Society ena dairekta taudia lasi. Vanegai laganidia ai, “mamoe ma haida” amo tadikaka haida be Watch Tower Society bona Dirava ena taunimanima ese idia gaukaralaia orea ma haida edia dairekta ai idia lao, unai amo Hakaua Oreana be Baibel ena hakaua herevadia halasia gaukarana sibona do idia karaia. (Ioa. 10:16; Kara 6:4) July 15, 2013, ena Gima Kohorona ese ia hahedinaraia, “igui hesiai tauna mai ena kamonai bona mai ena kara maoromaoro” be horoa tadikaka haida sibona, bona idia be Hakaua Oreana.

11. Hakaua Oreana be edena dala ai ia gaukara?

¹¹ Hakaua Oreana ese mai anina bada disisen idia karadia. Edena dala ai? Unai orea ena memba taudia be wiki ta ta ai idia hebou, unai amo mai lalotamona ida idia herevahereva hebou diba. (Aon. 20:18) Unai heboudia ai, seamani be lagani ta ta ai idia senisi, badina Hakaua Oreana ena memba ta ese ma ta ia hereaia lasi. (1 Pet. 5:1) Hakaua Oreana ena komiti taudia 6 be unai dala ai edia seamani gaukarana idia senisia. Bona unai memba ta ta idia laloa lasi idia be edia tadikaka edia hakaua taudia, to idia laloa idia be “hesiai taudia,” bona igui hesiai tauna mai ena kamonai amo Baibel ena hakaua herevadia idia abia bona ena hakaua henunai idia noho.

“IGUI HESIAI TAUNA MAI ENA KAMONAI BONA MAI ENA KARA MAOROMAORO . . . BE DAIKA?”

12. Hakaua Oreana be matahanai idia itaia lasi bona idia be goevadae lasi dainai, dahaka henanadai idia vara?

¹² Hakaua Oreana be Dirava amo matahanai idia abia lasi bona idia be goevadae lasi taudia. Unai dainai, Baibel ena hahediba herevadia eiava orea totona idia henia hakaua herevadia idia gwauraia kerere diba. Iehova Ena Witnes Taudia Edia Stadi Indeks ena hereva kwarana maragina ta, “Diari o Diba Matamata,” henunai Baibel siri haida dekenai idia davaria diba matamata ena lista ia noho. Momokani, Iesu ia gwau lasi igui hesiai tauna mai ena kamonai ese do ia halasia hahediba herevadia dekenai kerere do ita davaria lasi. Vadaeni, edena dala ai Iesu ena henanadai ita haerelaia diba, ia gwau: “Igui hesiai tauna mai ena kamonai bona mai ena kara maoromaoro . . . be daika?” (Mat. 24:45) Dahaka ese ia hamomokania Hakaua Oreana be unai idia karaia noho? Aposetolo edia negai ia noho hakaua oreana ia durua gaudia toi mani ita herevalaia.

13. Edena dala ai lauma helaga ese Hakaua Oreana ia durua?

¹³ Lauma helaga ese idia ia hakaua. Hakaua Oreana be guna Baibel ena hereva momokani haida idia lalopararalaia lasi, to lauma helaga ena heduru amo hari unai idia lalopararalaia. Hegeregere, Baibel siri haida dekenai idia davaria diba matamata ena lista mani oi itaia. Momokani, ena be ta ese “Dirava ena dobu gaudia” ia tahua namonamo bona ia gwauraia hedinarai, to ia dekenai hanamoa do ita henia lasi! (1 Korinto 2:10 duahia.) Hakaua Oreana edia lalohadai be aposetolo Paulo ena bamona, ia gwau: “Taunimanima ese idia hadibaia aonega herevadia amo unai gaudia ita herevalaia lasi, to lauma helaga ese ia hadibaia herevadia amo ita herevalaia.” (1 Kor. 2:13) Lagani momo lalonai aposteit karana ia vara bona taunimanima be lauma diburana ai idia noho, unai dainai oi laloa lagani 1919 amo ita abia diba matamatadia be edena bamona ita dibaia?

14. Apokalupo 14:6, 7 ena hereva hegeregerena, aneru ese edena dala ai Dirava ena taunimanima idia durua?

¹⁴ Aneru ese idia durudia. Hari Hakaua Oreana be maduna badana idia huaia, idia ese evanelia taudia milioni 8 mai kahana ese idia karaia haroro gaukarana idia naria. Dahaka dainai unai gaukara ese namo bada ia havaraia? Badina aneru ese unai gaukara idia durua. (Apokalupo 14:6, 7 duahia.) Nega momo, ta be heduru totona ia guriguri murinai, pablisa be iena iduara dekenai idia pidipidi!c Danu, ena be tano haida ai tadikaka be dagedage idia davaria, to ripoti ese ia hahedinaraia, haroro bona hahediba gaukarana be ia bada daekau, unai ese ia hamomokania aneru be unai gaukara idia durua.

15. Hakaua Oreana bona Kerisendom ena hakaua taudia edia idau be dahaka? Haheitalai gwauraia.

¹⁵ Dirava ena Hereva dekenai idia tabekau. (Ioane 17:17 duahia.) Lagani 1973 ai ia vara gauna mani ita laloa. June 1 ena Watchtower ai inai henanadai ia noho: “Kuku idia ania noho taudia be idia bapatiso diba, a?” Haere be inai: “Baibel ese ia hahedinaraia, unai bamona taudia be do idia bapatiso lasi.” Watchtower ese Baibel ena hakaua hereva haida ia gwauraia murinai, ia hahedinaraia kuku ia ania noho tauna be orea amo idia atoa siri be namo. (1 Kor. 5:7; 2 Kor. 7:1) Ia gwau: “Atoa siri karana be ta kara auka henia karana lasi. Unai matahakani be Dirava amo, bona iena lalohadai be iena Hereva amo ia hahedinaraia.” Tomadiho orea ma haida be mai ura ida Dirava ena Hereva idia badinaia lasi, herevana edia dubu taudia idia laloa edia kara be auka. United States ai, tomadiho ia herevalaia bukana ta ia gwau: “Keristani tomadiho edia hakaua taudia be nega momo edia hahediba herevadia idia haidaua, unai amo edia dubu taudia bona ma haida ese idia abia dae hahediba herevadia bona lalohadai ida do ia hegeregere.” Hakaua Oreana be taunimanima edia lalohadai hegeregerena abia hidi idia karaia lasi, to Dirava ena Hereva idia badinaia. Unai ese ia hamomokania daika be Dirava ena taunimanima ia hakaua?

“UMUI IDIA HAKAUA TAUDIA DO UMUI LALOATAO”

16. Edena dala ai Hakaua Oreana ita laloatao diba?

¹⁶ Heberu 13:7 duahia. Inai hereva idia hahanaia “laloatao” ena anina ma ta be “gwauraia.” Unai dainai, “umui idia hakaua taudia do umui laloatao” dalana ta be emui guriguri lalonai Hakaua Oreana umui gwauraia diba. (Efe. 6:18) Idia karaia gaukarana umui laloa diba, hegeregere idia ese hereva momokani idia halasia, haroro gaukara bona kontribusen monina idia naria. Momokani, idia dainai ita guriguri be namo!

17, 18. (a) Edena dala ai Hakaua Oreana ida ita gaukara hebou diba? (b) Dahaka dainai haroro gaukara ita goadalaia be namo?

¹⁷ Ita gwau sibona lasi Hakaua Oreana ita laloatao, to namona be idia amo ita abia hakaua herevadia ita badinaia. Iseda pablikeisen, kongrigeisen heboudia, hebouhebou maragidia bona badadia ai ita abia hakaua herevadia be Hakaua Oreana amo ita abia. Ma danu, idia ese sekit naria taudia idia abia hidi, bona sekit naria taudia ese kongrigeisen ena elda taudia idia abia hidi. Sekit naria taudia bona elda taudia ese Hakaua Oreana idia laloatao, bema idia amo idia abia hakaua herevadia idia badinaia. Ita hahedinaraia ita be iseda Hakaua Tauna, Iesu, ita matauraia, bema ia gaukaralaia tatau ita kamonai henia bona edia henunai ita noho.​—Heb. 13:17.

¹⁸ Hakaua Oreana ita laloatao dalana ma ta be haroro gaukara ita goadalaia. Paulo ese Keristani taudia ia hagoadaia edia hakaua taudia edia abidadama do idia tohotohoa. Igui hesiai tauna mai ena kamonai be ia gaukara goada Basileia ena sivarai namona ia harorolaia totona, unai amo iena abidadama goadana ia hahedinaraia. Inai mai anina bada gaukarana dekenai horoa taudia oi durua, a? Do oi moale bada, bema emui Hakaua Tauna, Iesu, ia gwau: “Ladana maragi taudia ta dekenai unai bamona umui karaia neganai, lau dekenai danu unai bamona umui karaia.”​—Mat. 25:34-40.

19. Dahaka dainai oi ura iseda Hakaua Tauna, Iesu, oi badinaia?

¹⁹ Iesu be guba dekenai ia giroa lou neganai, ia ese iena murinai idia raka taudia ia rakatania lasi. (Mat. 28:20) Ia diba ia be tanobada dekenai ia noho neganai, lauma helaga, aneru, bona Dirava ena Hereva ese ia idia durua. Unai dainai hari ia ese igui hesiai tauna mai ena kamonai be unai dala ai ia durua. Unai igui hesiai tauna ena memba taudia ta ta be horoa Keristani taudia dainai, “herevana Mamoe Natuna be edeseni ia lao, idia be ia murinai idia raka noho.” (Apok. 14:4) Unai dainai edia hakaua dalana ita badinaia neganai, ita be iseda Hakaua Tauna, Iesu, ita badinaia. Kahirakahira ia ese “idia lohilohi mauri ranuna dekenai [ita] do ia hakaua lao,” bona do ita noho hanaihanai. (Apok. 7:14-17) Bona taunimanima edia hakaua tauna ta be unai ia gwauhamatalaia diba lasi!