Hari Inai Negai Hakaua Oreana Ida Ita Gaukara Hebou Dalana
“Momokani lau hamaoroa umui dekenai, ena kohu ibounai dekenai naria tauna biaguna ese do ia halaoa.”—LUKA 12:44.
1. Lagani 33 C.E. ai, Keriso be edena basileia dekenai ia lohia matamaia, bona edena dala amo unai ia karaia diba?
PENTEKOSTE 33 C.E. ai, kongregesen ena Kwarana, Iesu Keriso ese lauma helaga amo, aneru edia heduru amo bona hakaua oreana amo ena horoa hesiai taudia edia basileia lalonai ia lohia matamaia. Aposetolo Paulo ese ia hahedinaraia hegeregerena, “Dirava ese dibura ena siahu dekena amo ita ia hamauria vadaeni, bona iena Natuna, iena lalokau, ena Basileia lalonai ita ia abia vareai vadaeni.”—Kolose 1:13-18; Kara 2:33, 42; 15:2; Galatia 2:1, 2; Apokalupo 22:16.
2. Lagani 1914 ai, Keriso be edena Basileia badana dekenai ia lohia matamaia?
2 “Idau bese edia nega” ia ore murinai, Iehova Dirava ese ena Natuna ena pavapava siahuna ia habadaia, Keristen kongregesen sibona do ia lohiaia lasi. (Luka 21:24) Oibe, lagani 1914 lalonai, Dirava ese ena Natuna ena siahu ia habadaia bona ia dekenai siahu ia henia “bese idauidau,” “tanobada biaguna siahuna” abia taudia, tanobada taudia iboudiai unai, do ia lohiadia totona.—Salamo 2:6-8; Apokalupo 11:15.
“Ena Kohu Ibounai” Naria Tauna Ia Halaoa
3, 4. (a) Moni ena parabole dekenai Iesu ia gwauraia lohia tauna be daika?? (b) Lagani 1918 bona 1919 dekenai dahaka ia vara Basileia gaukara durua totona?
3 Iesu ena parabole ta lalonai lohia tauna ta ia gwauraia. (Luka 19:11-27) Pavapava dagina do ia abia totona gabu daudauna dekenai ia lao gwauraia neganai, moni (minas) be ena hesiai taudia dekenai ia henidia, do idia gaukaralaia totona. Unai tau ese Keriso ia laulaulaia. Ia giroa mai murinai, “moni ia henia taudia dekenai ia boiria, edia hoihoi dekenai idia davaria gaudia do ia diba gwauraia.” (Luka 19:15) Iesu ese pavapava dagina ia abia murinai, unai be edena bamona ia vara?
4 Lagani 1918 lalonai, Keriso be ena terona latanai ia helai murinai, ia ese Keristen orea maragina ta ia davaria; idia be Kerisendom ena dubu idia rakatania bona edia Biaguna ena hesiai gaukara lalonai idia gaukara goadagoada noho. Lagani 1919 ai, lahi bamona amo idia ia hagoevaia murinai, Iesu ese ena hesiai taudia edia siahu ia habadaia. (Malaki 3:1-4; Luka 19:16-19) Ia ese “ena kohu ibounai dekenai naria tauna biaguna” ai ia halaodia.—Luka 12:42-44.
‘Nega Korikori Ai Aniani Idia Henia’
5, 6. (a) Keriso ena ruma naria oreana be dahaka gaukara badana ta ia abia? (b) Lagani 1914 murinai edena peroveta herevadia do idia guguru, bona ruma naria oreana be edena bamona idia heduru unai hereva hagugurua totona?
5 Ia pavapava vadaeni tauna, Iesu Keriso ese gaukara badana be ena “kohu naria” oreana o ruma naria oreana tanobada dekenai ia henia. Keriso ese Pavapava dagina ia abia vadaeni bona tanobada taudia iboudiai do ia lohiadia totona, siahu ia abia vadaeni. Horoa taudia be “Keriso ena hereva gwauraia hedinarai taudia” bamona idia karaia be namo. (2 Korinto 5:20; Daniel 7:14) Guna, edia maduna badana be Keriso ena horoa hesiai taudia dekenai “aniani neganai edia aniani do ia henia.” (Luka 12:42) To hari edia maduna be idau; namona be idia gaukara goadagoada, lagani 1914 lalonai Basileia idia haginia murinai do idia guguru peroveta herevadia lalodiai idia vareai totona.
6 Unai ena anina idia dekenai be dahaka? Anina be: “Basileia ena Sivarai Namona” harorolaia gaukarana do idia habadaia ia lao “tanobada ibounai dekenai.” (Mataio 24:14) Danu, anina be Satana ena nega dikana bona ia idia durua taudia dekenai Dirava ena hahemaoro aukana ena sivarai do idia gwauraia hedinarai. Unai gaukara dainai, ‘bese iboudiai idia haheudeheudedia.’ Unai neganai danu, ‘kohu namodia,’ Keriso ena “mamoe idaudia” orea dekenai idia vareai. (Hagai 2:7; Ioane 10:16) Lagani 1935 amo, “hutuma bada herea” taudia idia vareai matamaia. (Apokalupo 7:9, 10) Unai dainai, Keristen orea idia naria dalana idia hanamoa be gau badana. Idia hanamoa dalana be hegeregere, nadi edia gabu ai auri idia atoa, au ena gabu ai kapa idia atoa, auri ena gabu ai siliva idia atoa, bona kapa ena gabu ai golo idia atoa bamona. (Isaia 60:17) Unai ibounai be lagani 1919 amo ia vara, bona Iesu Keriso ese unai gaukara ia biagua. Ia ese ena Basileia gaukara tanobada dekenai, o ena “kohu,” be ena kamonai hesiai oreana, bona ena Hakaua Oreana dekenai ia henia, do idia naridia totona.
7. Unai ruma naria oreana be dahaka maduna ma ta idia abia?
7 Biaguna oreana, hesiai tauna, eiava ruma naria tauna edia maduna metauna do idia huaia namonamo totona, buka momo idia torea. Lauma aniani be nega korikori ai idia printaia Gima Kohorona magasin lalonai be gau badana. Bena, lagani 1919 ai, The Golden Age magasin danu idia printaia matamaia. (Gabeai, unai magasin ena ladana idia hatoa Consolation, bena murinai idia hatoa Noga!) Unai magasin idia printaia, taunimanima dekenai do idia hariharilaia totona. (Mataio 24:45) Danu idia hanaia laganidia lalodiai buka, buklet, bona pepapepa momo idia printaia.
Idia Hanamoa Loulou
8. Guna Hakaua Oreana be daidia danu idia gwauraia tamona, bona lagani 1944 lalonai The Watchtower magasin lalonai dahaka idia gwau?
8 “Dokona negana” lalonai idia vara gaudia ita laloa lou neganai, ita itaia guna Hakaua Oreana taudia be Watch Tower Society bona ena toretore taudia idia gwauraia tamona. (Daniel 12:4) November 1, 1944 dekenai, hereva ta, “The Theocratic Alignment Today” (“Dirava ena Orea Haheaua Dalana Hari Inai Negai”) idia printaia. Unai hereva lalonai ia gwau: “Bible ena hereva momokanidia idia printaia taudia be Lohiabada ese idia ia abia hidi, idia ura mai lauma bona mai momokani danu Dirava do idia tomadiho henia taudia do idia hakaua totona, bona mai lalo-tamona ida hitolo bona ranu mase taudia dekenai unai hereva momokanidia do idia hadibaia.”
9. Gabeai, Hakaua Oreana be dahaka orea danu idia gwauraia tamona, bona badina be dahaka?
9 Ita diba, Bible stadi durua bukadia do idia printaia totona, gavamani ese taravatu haida ia atoa. Unai dainai, Watch Tower Bible and Tract Society oreana idia haginia bona Pennsylvania, U.S.A. dekenai idia rejista. Lagani momo lalodiai, Hakaua Oreana bona unai corporation ena dairekta taudia 7 oreana idia gwauraia tamona. Unai corporation o orea idia haginia tanobada ibounai dekenai Bible bukadia idia printaia totona, bona Lohiabada ena taunimnanima idia hariharilaidia totona.
10, 11. Lagani 1944 lalonai, dahaka kara idia haidaua, bona The Watchtower magasin lalonai dahaka idia hereva unai kara dekenai?
10 Unai dairekta taudia 7 iboudiai be kamonai momokani Keristen taudia, to reana haida do idia laloa, Hakaua Oreana dekenai dagi idia abia badina vouti amo idia abia hidi bena Watch Tower Society ena dairekta taudia ai idia lao dainai. Danu, guna idia gwauraia taravatu ia gwau Society dekenai harihari monina idia henia taudia haida sibona be unai corporation o memba taudia ai idia lao diba bona voti karana idia karaia diba. Unai dainai, idia laloa unai kara idia haidaua be namo. October 2, 1944 ai, Watch Tower Society ena Pennsylvania corporation ena memba taudia idia hebou neganai, Society ena taravatu idia haidaua sisina. Unai murinai, memba taudia idia abia hidi neganai, harihari monidia idia henia eiava lasi be herevana. Memba taudia be Iehova ena kamonai hesiai taudia bogaragina amo do idia abia hidi, bona hari idia momo be Society ena hedikwota, Brooklyn, New York dekenai bona Society ena branch opesi momo lalonai, tanobada ibounai dekenai, idia gaukara.
11 Edia kara idia hanamoa sivaraina be The Watchtower November 1, 1944 lalonai idia gwauraia, ia gwau: “Moni, harihari monina unai, ena siahu be lasi, namo lasi Iehova ena tanobada witness taudia edia Hakaua Oreana dekenai idia vareai moni idia henia dainai. . . . Lauma helaga, Iehova Dirava bona Keriso Iesu dekena amo ia mai siahuna, ese ita ia hakaua inai kara dekenai be namo.”
Dairekta Taudia Bamona Lasi
12. Hakaua Oreana ese edia kara haida idia haidaua dainai Iehova ese idia ia hanamoa, dahaka ese unai ia hamomokania?
12 Murina laganidia momo lalodiai Keristen hesiai gaukara ia bada ia lao. Unai ese ia hamomokania Iehova ese hari inai negai ia noho Hakaua Oreana ia hanamoa, badina edia lalo-parara orea naria dalana dekenai idia hamaoromaoroa dainai. (Hereva Lada-isidia 10:22) Lagani 1944 ai tanobada ibounai lalonai Basileia harorolaia taudia iboudiai be 130,000 sibodia, to edia namba ia bada daekau ela bona lagani 1970 ai idia iboudiai be 1,483,430! To unai nega murinai ma gau haida danu idia hanamoa.
13. (a) Ema bona lagani 1941, Hakaua Oreana ena kara be dahaka? (b) Lagani 1971 ai, Society ena memba taudia edia hebou dekenai dahaka ia vara?
13 Ema bona lagani 1971, Hakaua Oreana bona Watch Tower Bible and Tract Society of Pennsylvania ena dairekta taudia 7 ena oreana be idia gwauraia tamona. Bona Society ena president dekenai maduna ia noho tanobada ibounai dekenai branch idia heau namonamo totona. To, October 1971 dekenai, Society ena memba taudia edia hebou lalonai, mai anina bada herevana ta idia karaia. Society ena president ese hereva ta ladana, “Bringing the Holy Place Into Right Condition” (“Helaga Gabuna ena Toana Hamaoromaoroa”) bona vice-president ena hereva ena ladana be, “A Governing Body As Different From a Legal Corporation” (“Hakaua Oreana be Idau, bona Society ena Corporation be Idau”). Hakaua Oreana bona ena corporation be edena bamona idia idau?
14. Hakaua Oreana bona Society ena corporation edena bamona idia idau?
14 Ai kikilaia vadaeni hegeregerena, Watch Tower Society ena Pennsylvania corporation ena dairekta taudia be 7 sibona. Unai corporation ena memba taudia iboudiai be 500 sibodia bona idia ese dairekta taudia be vouti amo idia abia hidi neganai, unai taudia be lagani toi lalodiai dairekta ena orea lalonai idia noho. Unai corporation memba taudia 500 amo, idia momo be horoa taudia lasi. Danu, corporation be gavamani ena taravatu hegeregerena idia haginia bona ena noho gabuna be tamona sibona, unai dainai Kaisara, Gavamani unai, ese ia hadokoa diba. (Mareko 12:17) To, Hakaua Oreana be gavamani ena taravatu dainai idia haginia lasi. Ena memba taudia be vouti amo idia abia hidi lasi. Edia dagi be lauma helaga amo idia abia, Iehova bona Keriso edia ura hegeregerena. (Kara 20:28 oi itaia.) Unai dainai, Hakaua Oreana taudia be lauma helaga amo idia horoa oreana ta, bona ena noho gabuna idia haidaua diba.
15. December 15, 1971 ena The Watchtower magasin lalonai, gaukara karaia namonamo dalana be edena bamona idia gwauraia, bona hari inai negai Hakaua Oreana dekenai dahaka ita gwau diba?
15 The Watchtower, December 15, 1971 gauna, lalonai Hakaua Oreana be inai bamona ia gwauraia: “Iehova ena Keristen witness taudia idia diba bona idia gwauraia hedinarai, edia tomadiho oreana be tau tamona ena siahu henunai ia noho lasi, to ia be mai ena hakaua oreana, unai orea ena memba taudia be horoa Keristen taudia.” Horoa hesiai oreana bona edia bamodia milion milion, mamoe idaudia unai, edia Hakaua Oreana ena gaukara dalana ia hanamoa lao, ena naria gaukara ia karaia namonamo totona.
16. Lagani 1971 amo, Keriso ena kohu be edena bamona idia momo idia lao, bona mai ena kamonai hesiai orea bona ena Hakaua Oreana idia karaia gaukaradia haida be dahaka?
16 Pavapava Iesu Keriso ena “kohu” tanobada dekenai idia momo idia lao. Lagani 1971 amo, Witness taudia edia namba be 1,600,000 amo ia bada ia lao ela bona lagani 1989 lalonai Witness taudia iboudiai be kahirakahira 3,700,000. Ita moale, badina unai ese ia hahedinaraia Iehova ese ita ia hanamoa, ani? (Isaia 60:22) Momokani, Witness taudia edia namba ia bada ia lao dainai, hedikwota bona branch opesi momo idia habadaia be namo, bona magasin bona buka idia karaia bona idia hariharilaia daladia idia hanamoa danu. Unai dainai, Kingdom Hall bona Hebouhebou Rumadia momo be tanobada ibounai dekenai idia haginia. Unai negana lalonai, haroro gaukara idia naria noho, Bible stadi durua bukadia idia henia noho, bona branch opesi naria taudia, distrik naria taudia, sekit naria taudia bona kongregesen naria taudia idia abia hidi noho. Unai gau iboudiai be Basileia gaudia, Keriso be ena “hesiai tauna mai ena kamonai bona mai ena kara maoromaoro” dekenai ia henia gaudia unai, bona unai hesiai oreana ese Hakaua Oreana ia gaukaralaia.
17. Lagani 1971, 1974, bona 1976 lalonai ma dahaka idia karaia naria gaukarana idia hanamoa totona?
17 Keristen taudia ginigunadia edia negai, hakaua oreana idia habadaia aposetolo taudia sibona amo lasi, to ma haida danu do idia vareai totona. Kopina utua hereva idia kikilaia neganai, “aposetolo bona kwarana taudia” Ierusalem dekenai idia noho danu. (Kara 15: 1, 2) Unai hegeregerena, lagani 1971 ai Hakaua Oreana idia habadaia bona lagani 1974 ai idia habadaia lou, edia maduna badana be hari inai negai do idia huaia namonamo totona. Hakaua Oreana ese ena naria gaukara do ia karaia namonamo totona, January 1, 1976 ai komiti 5 idia haginia. Unai komiti ta ta ena memba taudia iboudiai be toi ia lao 6, bona idia ta ta iboudiai edia siahu be tamona komiti ena gaukara lalonai. Unai komiti ta ta iboudiai be mai edia seamani, bona lagani tamona lalonai ena seamani gaukarana ia karaia. Hakaua Oreana ena memba taudia ta ta be unai komiti ta o ma haida dekenai gaukara idia karaia. Unai komiti ta ta iboudiai be Keriso ena gaukara kohuna ta ta idia naria. Komiti namba 6 be Seamani ena Komiti bona lagani ta ta iboudiai ena memba taudia idia haidaua. Bema hekwakwanai badadia idia vara, unai Komiti ese dala idia tahua unai hekwakwanai do idia hanaia totona.
Hakaua Oreana Danu Gaukara Hebou
18. Hakaua Oreana be edena dala amo idia gaukara, bona edena dala ta amo ita hahedinaraia diba ita ura idia danu ita gaukara hebou?
18 Hakaua Oreana ena komiti idauidau be wiki ta ta iboudiai idia hebou bona idia guriguri murinai, mai anina bada gaudia idia kikilaia bona tiokratik gaukara ena palani idia karaia. Ai kikilaia vadaeni hegeregerena, Kara karoa 15 ia gwau henanadai badadia idia vara neganai, unai henanadai be hakaua oreana dekenai idia siaia, do idia haerelaia totona. Hari inai negai danu, unai bamona idia karaia. Hakaua Oreana ena memba taudia iboudiai be 12 bona wiki ta ta iboudiai idia hebou bona henanadai badadia idia kikilaia. Buka Helagadia amo bona guriguri amo Iehova ena heduru idia tahua. Hakaua Oreana danu ita gaukara hebou totona, dala ta be inai: Dina iboudiai ita guriguri neganai, Hakaua Oreana totona ita noinoi.—Roma 12:12.
19. Hakaua Oreana ena hahegani be edena bamona idia hadibaia kongregesen dekenai?
19 Hari inai negai Hakaua Oreana ena hahegani bona lalohadai be edena bamona idia hadibaia kongregesen dekenai? Keristen taudia ginigunadia edia negai, hakaua oreana ese ena lalohadai mai aonega idia abia murinai, kongregesen dekenai revareva idia siaia. (Kara 15:22-29) To hari inai negai, nega momo Keristen buka bona magasin amo idia hadibaia.
20. (a) Naria gaukarana ma idia hanamoa totona, lagani 1976 dekenai dahaka idia karaia? (b) Branch Komiti taudia bona Hakaua Oreana be edena bamona idia gaukara hebou diba?
20 February 1, 1976 amo, Watch Tower Society ena branch opesi ta ta iboudiai dekenai Branch Komiti ta ia noho. Hakaua Oreana ese Branch Komiti ena memba taudia ia abia hidi, bona unai tadikaka be mai edia abidadama goada bona mai edia kamonai be gau badana. Hegeregere guna, Israel lalonai Mose idia durua taudia bamona, taunimanima idia hahemaoro henidia gaukarana idia karaia namonamo, Dirava idia gari henia, bona idia be abidadama taudia. (Esodo 18:17-26) Society be ena buka bona magasin lalonai, Iseda Basileia Gaukara pepana lalonai, bona revareva lalonai orea haheaua taravatudia idia torea. Unai revareva haida be tanobada ibounai dekenai idia siaia. Branch Komiti ese unai hahegani iboudiai idia badinaia. Tano ta ta iboudiai dekenai Branch Komiti ese hesiai gaukara ena heau dalana be Hakaua Oreana dekenai idia hadibaia. Bema hekwakwanai idia vara, Hakaua Oreana idia hadibaia. Unai ripoti tanobada ibounai amo ese Hakaua Oreana idia durua bena idia diba dahaka hereva be Society ena buka, buklet bona magasin lalonai idia torea be namo.
21. Loaloa naria taudia be edena bamona dagi idia abia, bona edia gaukara be dahaka?
21 Lauma helaga ena heduru amo, Branch Komiti ese tadikaka goadadia edia ladana idia siaia, sekit bona distrik naria taudia ai do idia halaodia totona. Hakaua Oreana ese dagi be unai tadikaka dekenai idia henidia neganai, unai tadikaka ese sekit bona kongregesen idia vadivadi henia, lauma dalana dekenai do idia hagoadadia totona bona kongregesen idia durudia, Hakaua Oreana ena hahegani do idia badinaia totona. (Kara 16:4; Roma 1:11, 12 oi itaia danu.) Unai taudia be branch opesi dekenai ripoti idia siaia. Bema tadikaka haida idia hegeregere, Hakaua Oreana eiava ena durua taudia ese hesiai taudia o elda taudia edia dagi do idia henidia totona, lauma helaga ena heduru amo sekit naria taudia bona distrik naria taudia ese kongregesen ena elda taudia idia durudia, unai tadikaka edia ladana be Hakaua Oreana dekenai do idia siaia totona.—Filipi 1:1; Tito 1:5; 1 Timoteo 3:1-13; 4:14 oi itaia danu.
22. (a) Kongregesen elda taudia bona Hakaua Oreana be edena bamona idia gaukara hebou? (b) Dahaka ese ia hamomokania Iehova ese unai tiokratik dalana ia hanamoa?
22 Danu, elda edia orea be ‘sibona idia naria namonamo, bona mamoe orea ibounai danu. Inai orea naria taudia be lauma helaga ese idia ia halaoa vadaeni.’ (Kara 20:28) Unai naria taudia ese hesiai tauna mai ena kamonai bona mai ena kara maoromaoro orea ena amo bona ena Hakaua Oreana ena amo Iehova bona Keriso edia hahegani idia abia neganai, mai edia kamonai ida dala idia tahua unai hahegani do idia badinaia totona. Iehova ese unai tiokratik dala ia hanamoa, badina kongregesen taudia “edia abidadama ena goada ia bada daekau, bona dina ibounai edia hutuma be ia momo daekau.”—Kara 16:5.
23. Hakaua Oreana dainai, namona be iseda lalona ita hadaia dahaka do ita karaia totona?
23 Hakaua Oreana dekena amo, Iehova Dirava bona iseda Biaguna, Iesu Keriso be idia hahedinaraia noho, idia be Dirava ena orea taudia idia durua bona idia hagoadaia, bona unai ita diba dainai ita moale. (Salamo 94:14) Ita be Iehova ena orea taudia dainai, ita ta ta ibounai be unai heduru amo namo ita davaria. (Salamo 145:14) Unai dainai, namona be iseda lalona ita hadaia, bena “tanobada ibounai be Iehova diba maorona amo dohore ia honudae, davara ia honudae hegeregerena” ena nega ita naria neganai, Dirava ese hari inai negai ia haginia gaudia ida do ita gaukara hebou bona Iehova ena Witness taudia edia Hakaua Oreana danu do ita gaukara hebou.—Isaia 11:9.
Hereva Badadia Oi Laloatao Totona
◻ Lagani 1919 ai, kohu naria oreana be dahaka maduna ma ta ia abia?
◻ Lagani momo lalonai, Hakaua Oreana be dahaka orea dekenai idia gwauraia tamona?
◻ Hakaua Oreana lalonai dagi idia abia dalana be sisina sisina edena bamona idia haidaua?
◻ Keriso ese hesiai orea bona ena Hakaua Oreana dekenai kohu ia henia idia naria totona, unai kohu haida be dahaka?
◻ Edena bamona Hakaua Oreana danu ita gaukara hebou diba?
[Pictures on page 18, 19]
Tanobada ibounai naria hedikwota Brooklyn, New York dekena amo Hakaua Oreana be Iehova ena Witness taudia edia haroro bona hahediba gaukaradia Watch Tower Society ena branch 93 dekenai idia naria
Germany
Japan
South Africa
Brazil