MAI URA IDA SIBONA IDIA HENIA Turkey Ai

KERISTANI TAUDIA ginigunadia idia gaukara goada taunimanima momo dekenai “Basileia ena sivarai namona” idia harorolaia totona. (Mat. 24:14) Idia haida be tano ma haida dekena idia lao. Hegeregere, aposetolo Paulo be tano ma ta dekenai ia lao, unai tano be hari idia gwauraia Turkey. Bona iena misinari laolaona ai ia be unuseniai ia haroro goadagoada.a Lagani 2,000 bamona murinai, lagani 2014 ai, Turkey dekenai haroro gaukara badana ta idia karaia lou. Dahaka dainai unai idia karaia? Daidia ese unai gaukara idia durua?

“DAHAKA IA VARA NOHO?”

Turkey ena pablisa ibounai be 2,800, ia hanaia, to unai tano ena popiuleisen be milioni 79. Anina be pablisa ta ese taunimanima 28,000 ia durua be namo. To mani oi laloa, pablisa taudia be taunimanima haida sibona idia haroro henia. Unai haroro gaukara badana idia karaia ena badina be idia ura nega kwadogina lalonai taunimanima momo idia haroro henia. Tano idauidau amo, Turkish gado idia hereva tadikaka taihu 550 bamona be Turkey dekenai idia lao bona unuseni idia noho pablisa taudia ida idia haroro. Unai ese dahaka namo ia havaraia?

Taunimanima momo idia haroro henia. Istanbul ena kongrigeisen ta ena ripoti ia gwau: “Taunimanima be ai idia itaia neganai, idia henanadai: ‘Iniseniai hebouhebou badana ta do ia vara, a? Iehova ena Witnes taudia be gabu ibounai dekenai ai itaia!’” Izmir siti ai ia noho kongrigeisen ena ripoti ia gwau: “Teksi draiva ta be elda ta ia nanadaia, ia gwau, ‘Dahaka ia vara noho? Emu gaukara umui habadaia, a?’” Oibe, idia karaia haroro gaukarana be momo ese idia itaia.

Tano idauidau amo idia mai tadikaka taihu be unai haroro gaukara idia moalelaia. Steffen, ia be Denmark amo, ia gwau: “Dina ta ta ai, Iehova ena sivarai idia do kamonai lasi taudia lau haroro henia. Lau mamia unai dala amo Iehova ena ladana lau gwauraia hedinarai.” Jean-David be France amo, ia gwau: “Hora momo lalonai strit tamona sibona ai karaia. Unai ai moalelaia bada! Momo be Iehova ena Witnes taudia idia diba lasi. Kahirakahira ruma ibounai dekenai taunimanima ai hereva henia, iseda vidio ta ai hahedinaraia, bona buka eiava magasin ai rakatania.”

Unai tadikaka taihu 550 be wiki rua sibona lalonai buka bona magasin 60,000 bamona idia hariharilaia! Unai haroro gaukara badana dainai momo idia haroro henia diba.

Edia ura haroro gaukara dekenai ia bada. Unai haroro gaukara badana ese Turkey ai idia noho tadikaka taihu ia durua bada. Momo be ful-taim hesiai gaukara idia lalohadailaia matamaia. Unai haroro gaukara badana murinai hua 12 lalonai Turkey ena painia taudia be 24 pesen amo ia daekau.

Tano ma haida amo idia mai tadikaka taihu ese unai haroro gaukara badana idia moalelaia danu, herevana edia tano dekenai idia giroa lou. Şirin, ia be taihu ta Germany amo, ia gwau: “Turkey ai tadikaka taihu be mai moale ida dala idauidau ai idia haroro. To lau be dala idauidau ai haroro karana lau hemarailaia. To lau moale, badina inai haroro gaukara badana, tadikaka taihu edia haheitalai, bona hanaihanai guriguri karana ese lau ia durua egu haroro gaukara lau habadaia totona. Danu, trein naria gabunai lau haroro bona pepapepa momo lau hariharilaia! Hari lau hemarai lasi.”

Johannes, ia be Germany amo, ia gwau: “Egu haroro gaukara durua totona gau momo lau dibaia. Turkey ai idia noho tadikaka taihu idia ura bada taunimanima momo idia haroro henia. Dala ia kehoa negadiai sivarai namona idia harorolaia. Germany dekenai lau giroa lou neganai, unai bamona lau karaia danu. Bona hari taunimanima momo lau haroro henia diba.”

Zeynep, ia be France amo, ia gwau: “Inai haroro gaukara badana ese egu haroro gaukara ia durua bada. Hari mai gari lasi ida lau haroro diba bona Iehova dekenai lau tabekau.”

Pablisa taudia edia hetura karana ia goada. Tano idauidau amo idia mai tadikaka taihu huanai ia noho lalokau bona lalotamona karana ese tadikaka taihu ia hagoadaia. Tadikaka Jean-David ia gwau: “Ai ese tadikaka taihu edia heabidae karana ai ‘mamia’ momokani.” Ma ia gwau: “Idia ese ai be edia turadia bona ruma bese bamona idia abia dae. Bona edia ruma dekenai ai noho danu. Lau diba ai ibounai be tanobada hegegemadai tadikaka oreana, bona nega momo iseda pablikeisen lalonai unai lau duahia. To hari lau sibona ese unai kara lau mamia. Lau moale bada badina lau be Iehova ena Witnes tauna ta bona unai hahenamo namona dainai ia lau tanikiu henia.”

Claire, ia be France amo, ia gwau: “Ena be ai be Denmark, France, Germany, eiava Turkey amo, to ai ibounai be ruma bese tamona. Unai be hegeregere Dirava ese unai tano edia boda be raba badana amo ia daua oho.”

Stéphanie, ia be France amo, ia gwau: “Unai haroro gaukara badana amo ai dibaia gauna be inai, Iehova lalokau henia karana ese ai ibounai ia hatamonaia, to emai kastom eiava gado lasi.”

NAMO BADA IA VARA

Tano idauidau amo idia mai tadikaka taihu idia laloa Turkey dekenai idia giroa lou be namo badina unuseniai gaukara badana ia noho. Bona idia haida be unuseni idia lao vadaeni. Ita moale badina unai tadikaka taihu be unai bamona idia karaia.

Hegeregere, grup ta ena pablisa ibounai be 25 sibona. Lagani momo lalonai elda tamona sibona ia noho. To lagani 2015 ai, Germany bona Netherlands amo pablisa 6 be unai grup durua totona idia lao neganai, tadikaka idia moale bada!

HARORO GAUKARA IDIA DURUA

Nega sisina lalonai Turkey dekenai idia noho tadikaka taihu be dahaka idia laloa? Momokani, nega haida mauri be auka, to pablisa momo lasi gabuna idia durua be hahenamo badana. Mani idia haida edia hereva ita itaia:

Headava tadikaka ta Federico, ena mauri lagani be 40 bamona bona ia be Spain amo, ia gwau: “Egu kohu be momo lasi dainai, nega lau atoa diba mai anina bada gaudia lau karaia totona.” Inai bamona Basileia gaukarana do ia durua, a? Ia gwau: “Oibe! Bema tano ma ta dekenai oi lao badina oi ura ma haida dekenai Iehova oi herevalaia, oi hahedinaraia oi be Ia dekenai oi tabekau. Bona Iehova ena heduru do oi mamia momokani.”

Headava tadikaka ta Rudy, ena mauri lagani be 57 bamona, bona ia be Netherlands amo, ia gwau: “Haroro gaukara durua karana ese ita ia hamoalea bada, badina ita ese guna hereva momokani idia kamonai lasi taudia ita hadibaia. Oi itaia taunimanima be mai moale ida hereva momokani idia abia dae neganai, oi danu oi moale.”

Headava tadikaka ta Sascha, ena mauri lagani be 40 bamona bona ia be Germany amo, ia gwau: “Nega ibounai lau haroro neganai, lau hedavari henia taudia be hereva momokani idia do kamonai lasi. Lau moale bada badina idia dekenai Iehova lau herevalaia diba.”

Headava taihu ta Atsuko, ena mauri lagani be 35 bamona bona ia be Japan amo, ia gwau: “Guna lau ura Aramagedono do ia mai haraga. To Turkey dekenai lau lao murinai, Iehova lau tanikiu henia badina ia be ia haheauka noho. Iehova ese ita ia hakaua dalana lau itaia neganai, lau ura bada ia kahirakahira lau lao.”

Taihu Alisa ena Mauri lagani be 30 bamona bona ia be Russia amo, ia gwau: “Pablisa momo lasi gabuna durua karana ese lau ia durua Iehova ena kara namodia lau tohoa totona.” (Sal. 34:8) Ma ia gwau: “Iehova be egu Tamana sibona lasi, to ia be egu Turana namona danu, bona mauri dala idauidau ai ia lau dibaia namonamo. Egu mauri lalonai gau momo lau moalelaia, ekspiriens namodia lau davaria, bona hahenamo momo lau abia!”

“WITI UMA UMUI ITAIA”

Turkey dekenai idia karaia haroro gaukara badana dainai, taunimanima momo be sivarai namona idia kamonai. To, teritori momo be idia do karaia lasi. Dina ta ta ai, tadikaka taihu be Turkey dekenai idia lao, bona Iehova idia do diba lasi taudia idia haroro henia. Oi ura unai bamona gabu ta dekenai oi lao, a? Bema oibe, oi ai hagoadaia: ‘Emu kwarana oi abia isi bona witi uma oi itaia, idia kurokuro vadaeni gogoa totona.’ (Ioa. 4:35) Tanobada ena kahana haida be “idia kurokuro vadaeni gogoa totona,” unai gaukara do oi durua, a? Bema oibe, hari be nega namona unai tahua gauna oi hagugurua totona. Mai anina bada gauna be inai: “Tanobada ena daudau momokani gabudia dekenai” sivarai namona harorolaia gaukara ita durua neganai, hahenamo momo do ita abia!​—⁠Kara 1:8.