Basileia Sivaraina Pepana Namba 35 Do Ita Hariharilaia Gabu Ibounai Dekenai
1 October bona November dekenai, ita ibounai do ita bisi bada herea. October ena dina ginigunadia 11 lalonai, ita ese Gima Kohorona sabskripsen do ita hariharilaia. Bena, Sunday, October 12, amo ela bona Sunday, November 16 ai, ita ese Basileia Sivaraina pepana Namba 35 do ita hariharilaia tanobada hegegemadai. Iseda hahenamo ta be unai mai anina bada sivaraina be iseda gabu dekenai idia noho taudia ibounai dekenai do ita abia lao. Unai sivarai be inai henanadai ia haerelaia, “Taunimanima Ibounai be Do Idia Lalokau Heheni, A?” Unai gaukara badana ita karaia neganai, Basileia Sivaraina pepana Namba 35 be Monday ia lao Friday dekenai do ita hariharilaia. Saturday bona Sunday ai, Basileia Sivaraina pepana sibona do ita hariharilaia lasi, to magasin ena sabskripsen eiava bema sabskripsen idia ura lasi idia abia, magasin ta ta do ita hariharilaia.
2 Daika ese Unai Gaukara Do Ia Durua Diba? Vaia, elda taudia ese unai gaukara do idia gunalaia. Tadikaka ibounai idia moale Basileia Sivaraina pepana hariharilaia totona, bona ai diba vadaeni pablisa momo ese heduru painia gaukara do idia karaia unai gaukara badana ena hua tamona eiava hua rua lalodiai. Pablisa ma haida be edia haroro negana do idia ura idia habadaia.
3 Oi be mai emu Baibel stiuden tauna ta, Diba bukana ia stadilaia bona kahirakahira do ia hegeregere haroro gaukara ia karaia totona, a? Reana bapatiso lasi pablisa ai ia lao bena Basileia Sivaraina pepana hariharilaia gaukarana do ia karaia diba. Unai pepa herevalaia totona, hamatamaia hereva haida sibona oi henia. Haheitalai ta be, reana do ia gwau: “Inai sivarai be mai anina bada sivaraina dainai, inai hua lalonai, tanobada hegegemadai gado 169 dekenai ai hariharilaia. Lau ura emu kopi ta oi abia.” Natudia matamata ese inai moale gaukarana lalonai mai anina gaukara idia karaia diba danu.
4 Namona be Buka Stadi naria taudia ese edia grup taudia iboudiai do idia hagoadaia Basileia Sivaraina pepana Namba 35 hariharilaia gaukarana do idia karaia. Danu, haroro gaukara idia hadokoa vadaeni pablisa taudia idia noho, to haroro gaukara idia karaia lou diba bema heduru idia abia. Unai pepa hariharilaia gaukarana ia do matamaia lasi neganai, namona be elda taudia ese idia ta ta idia vadivadi henia bona idia durua pablisa goadana ta ese do ia bamoa unai haroro gaukara idia karaia diba totona.
5 Edena Negai Unai Gaukara Totona Ita Hebou? Unai gaukara badana dainai namona be haroro hebou namodia idia karaia nega namodia ai. Bema dala ia noho, namona be haroro hebou be pura ena dina ta ta, bona Saturday bona Sunday totona idia hegaegaelaia. Namona be nega namona ai idia abia, unai amo pablisa bona painia taudia ese edia haroro negana do idia gaukaralaia namonamo diba. Sikuli natudia, moni gaukara idia karaia tadikakadia, bona ma haida edia namo totona, nega umui atoa adorahi kahanai haroro hebou karaia totona. Namona be haroro naria tadikakana ese ruma ta ruma ta bona bisinesi teritori momo ia hegaegaelaia guna bena tadikaka ibounai ese unai gaukara idia karaia namonamo diba. Pablisa be momo gabudia dekenai, namona be teritori ena kahana dekenai do idia haroro taudia edia namba idia abia hidi mai edia aonega ida.
6 Ruma ai Idia Noho Lasi Taudia be Edena Bamona? Ita ura ruma ai idia noho taudia iboudiai ita hamaoroa dahaka dainai Basileia Sivaraina pepana Namba 35 idia duahia be namo. Bema ta be ruma dekenai ia noho lasi oi vadivadi neganai, iena adres oi torea bona unai dina dekenai nega idauna ta ai oi giroa lou. Bema unai pepa hariharilaia gaukarana ena pura dokonai unai ruma taudia oi do davaria lasi, Basileia Sivaraina pepana ta be ruma ena iduara, idia raka lao taudia idia itaia diba lasi gabuna ta dekenai, oi atoa. Taunimanima edia ruma idia noho gabudia ai, namona be dala ai idia raka taudia dekenai Basileia Sivaraina pepana oi hariharilaia. Hanua gabudia oi karaia neganai bona teritori ia bada dainai oi haorea diba lasi gabudia ai, namona be emu vadivadi ginigunana dekenai taunimanima idia noho lasi rumadia dekenai Basileia Sivaraina pepana ta oi rakatania.
7 Iseda Tahua Gauna be Dahaka? Ela bona unai gaukara ia ore November 16 ai, namona be kongregesen ese edia Basileia Sivaraina pepadia ibounai idia hariharilaia bona edia teritori ibounai idia karaia. Bema emu kongregesen ena teritori ia bada bona oi laloa do ia hegeregere bema oi sibona, bamoa tauna ta lasi ida do oi gaukara, reana gaukara badana do oi karaia diba. Unai dala amo kara namo taudia momo dekenai sivarai namona do oi harorolaia. (Mat. 10:11) Do ia namo bema pepapepa haida be emu imana dekenai oi dogoatao bona Baibel be emu poketi eiava baege maragina lalonai oi udaia, to opesi baege oi gaukaralaia lasi. Namona be kamonai taudia edia adres ena rekodi oi karaia namonamo.
8 Oi Hegaegae Vadaeni Unai Gaukara Oi Hamatamaia Totona, A? Pablisa bona painia taudia ta ta do idia gaukara goada edia magasin matamata idia hariharilaia totona, to danu namona be ita hekwarahi Kingdom Hall eiava pablisa taudia edia ruma dekenai idia noho magasin gunadia ita hariharilaia totona. Kongregesen bona grup maragidia ta ta iboudiai be Basileia Sivaraina pepadia do idia oda lasi, badina do ai siaidia. Pepa ta ta ena davana be 2 toea, pablisa bona painia taudia dekenai. Namona be buka bona magasin idia naria tadikaka ese unai pepa idia haria namonamo bena pablisa ibounai be unai hariharilaia gaukarana idia karaia diba. Idia siaia pepadia edia namba bona kongregesen eiava grup maragidia dekenai pablisa taudia edia namba hegeregerena, pablisa ta ta be pepa 10, 20, eiava 50 do idia abia. Spesel, regula, bona heduru painia taudia be matamanai pepa 20, 40, eiava 100 do idia abia, kongregesen dekenai idia siaia pepadia edia namba bona unai gaukara do idia karaia painia taudia edia namba hegeregerena. Gaukara badana ia noho. Oi ura bada inai gaukara namona oi karaia danu, a? Ai diba oi ura bada. Unai dainai, namona be Baibel amo ia mai sivarai namona, hari Basileia Sivaraina pepana Namba 35 lalonai, halasia gaukarana do ita habadaia!