Taga Korikoridia Tahua

1, 2. Inai tanobada oromana ai, dahaka dainai ogogami taudia be do idia noho?

HARI INAI NEGAI, moni davaria daladia be auka. Matamata taudia momo be moni gaukara idia davaria haraga lasi. Bona taunimanima momo be taga tanodia dekenai idia lao. Tanobada hegegemadai, taga tanodia ai danu, taunimanima be idia ogogami. Bona taga bona ogogami taudia edia namba be ia bada daekau noho. Ripoti ese idia hahedinaraia, idia taga momokani taudia 1 pesen, edia taga ese taunimanima ibounai edia moni idia hereaia. Ena be unai ia vara, to ita abia dae momokani taunimanima bilioni momo be idia ogogami, to taga taudia be lagani momo lalonai edia bese idia naria diba. Iesu be unai ia lalopararalaia dainai, ia gwau: “Ogogami taudia be hanaihanai umui danu idia noho.” (Mar. 14:7) Dahaka dainai unai ia vara?

² Iesu ia diba Dirava ena Basileia ia mai neganai, moni ena hekwakwanai ibounai be do idia ore. Politikol bona tomadiho oreadia, bona mataganigani bisinesi oreadia, Apokalupo 18:3 ese ia herevalaia “hoihoi taudia” unai, be Satani ena tanobada ena kahana. Dirava ena taunimanima be politikol karadia bona tomadiho koikoi idia dadaraia momokani, bona idia momo be unai bamona bisinesi karadia lalonai idia vareai lasi.

3. Sibona dekenai edena henanadai do ita henia?

³ Ita be Keristani taudia dainai, hari idia noho bisinesi karadia do ita lalohadailaia namonamo, bona sibona ita nanadaia: ‘Edena dala ai egu kohu do lau gaukaralaia, unai amo lau hahedinaraia lau be Dirava lau abidadama henia? Dahaka lau karaia diba, unai amo bisinesi karadia lalonai do lau vareai momokani lasi? Edena ekspiriens ese idia hahedinaraia Dirava ena taunimanima be ia idia abidadama henia momokani, herevana nega aukadia idia davaria?’

IA KARA MAOROMAORO LASI KOHU NARIA TAUNA

4, 5. (a) Iesu ese ia herevalaia kohu naria tauna dekenai dahaka ia vara? (b) Iesu ese ena murinai idia raka taudia dekenai dahaka sisiba ia henia?

⁴ Luka 16:1-9 duahia. Iesu ese ia kara maoromaoro lasi kohu naria tauna ena haheitalai ia gwauraia. Haida ese ia idia samania idia gwau, ia ese ena biaguna ena kohu ia gaukaralaia namonamo lasi, unai dainai ia be “mai aonega ida ia kara” bona ‘turadia ia karaia,’ unai amo ena gaukara ia haboioa neganai, heduru ia abia diba.a To, namo lasi ita laloa Iesu ese ena hahediba taudia ia hagoadaia kara maoromaoro lasi dalanai do idia kara, sibodia idia durua totona. Badina unai be “inai nega oromana ena taunimanima” edia kara, to unai haheitalai ia gaukaralaia idia ia hadibaia totona.

⁵ Iesu ia diba unai kohu naria tauna bamona, iena murinai idia raka taudia momo be inai kara gageva tanobadana ai gau haida idia karaia be namo, sibodia naria totona. Unai dainai idia ia hamaoroa: “Kara maoromaoro lasi taga amo turadia umui karaia, bena idia ore neganai, idia [Iehova bona Iesu] ese noho hanaihanai gabudia dekenai umui do idia abia dae.” Iesu ena sisiba amo dahaka ita dibaia?

6. Edena bamona ita diba moni momo tahua karana be Dirava ena ura lasi?

⁶ Ena be Iesu ese ia hahedinaraia lasi dahaka dainai taga ia gwauraia “kara maoromaoro lasi,” to Baibel ese ia hahedinaraia goevagoeva moni momo tahua karana be Dirava ena ura hegeregerena lasi. Eden umana ai, Iehova ese Adamu bona Heva edia ura gaudia ibounai ia henia. (Gen. 2:15, 16) Gabeai, aposetolo edia negai idia noho horoa taudia latanai lauma helaga ia diho neganai, “idia ta ia laloa lasi iena gau be ia sibona ena, to edia gau ibounai idia haria hebou.” (Kara 4:32) Isaia ia peroveta, nega ta taunimanima ibounai ese tanobada ena kohu do idia moalelaia. (Isa. 25:6-9; 65:21, 22) Unai nega ita naria noho lalonai, namona be “mai aonega ida” inai tanobada ena “kara maoromaoro lasi taga” ita gaukaralaia Dirava ita hamoalea totona.

KARA MAOROMAORO LASI TAGA GAUKARALAIA NAMONAMO

7. Luka 16:10-13 ai dahaka sisiba ia noho?

⁷ Luka 16:10-13 duahia. Iesu ese ia gwauraia kohu naria tauna be sibona ena namo totona ma haida ia tura henia. To, Iesu ese ena murinai idia raka taudia ia hagoadaia ia bona Iehova idia tura henia totona. Murina siridia ese idia hahedinaraia, “kara maoromaoro lasi taga” be Dirava kamonai henia karana ia gwauraia. Iesu ena hereva ena anina be ‘kamonai karana ita hahedinaraia’ diba, bema iseda taga ita gaukaralaidia namonamo. Edena dala ai?

8, 9. Ma haida ese edena dala ai edia taga idia gaukaralaia?

⁸ Kamonai karana ita hahedinaraia dalana ta be iseda taga ita gaukaralaia Iesu ese ia perovetalaia haroro gaukarana ita durua totona. (Mat. 24:14) India ai, kekeni maragina ta ese maua ta lalonai ena moni ia haboua, unai karaia totona ena gadara gaudia haida ia hoihoilaia danu. Unai maua ia honu neganai, unai moni ia henia hanai haroro gaukara durua totona. Bona India ai danu, tadikaka ta be mai ena niu uma gabu badana, ia ese niu haida be Malayalam trensleisen ofesi dekenai ia abia lao, ia gwau idia be niu idia ura hoia dainai, idia dekenai niu ia henia neganai, edia gaukara ia durua bada, bona unai ese do ia henia monina ia hereaia. Unai be aonega karana. Unai hegeregerena, Greece ai tadikaka taihu be nega ibounai oela, sisi, bona aniani ma haida be Betele Famili taudia totona idia henia.

⁹ Sri Lanka tadikaka ta be hari tano ma ta ai ia noho dainai, iena tano bona ruma ia henia kongrigeisen heboudia bona hebouhebou idia karaia totona, bona unuseniai ful-taim hesiai taudia idia noho danu. Momokani, tadikaka be ena moni do ia gaukaralaia, to unai dala amo ia ese idia dabu tadikaka taihu ia durudia diba. Iseda gaukara idia taravatua tanona ai, tadikaka taihu edia ruma be Kingdom Hall bamona idia gaukaralaia, unai amo painia taudia momo bona ma haida be unuseniai hebou idia karaia diba, bona moni idia negea lasi.

10. Hariharibada karana ita hahedinaraia neganai, dahaka hahenamo ita davaria?

¹⁰ Atai ita herevalaia haheitalai amo ita itaia, Dirava ena taunimanima be “gau maragina dekenai kamonai karana [idia] hahedinaraia.” Oibe, edia kara amo idia hahedinaraia edia hetura karana Dirava ida be mai anina bada. (Luka 16:10) Bona unai idia karaia dainai, edia hemami be edena bamona? Idia diba bema hariharibada karana idia hahedinaraia, taga “korikorina” do idia abia. (Luka 16:11) Nega momo Basileia gaukarana ia durua taihu ta ese ia abia hahenamo ia herevalaia, ia gwau: “Ma haida durua totona egu kohu lau gaukaralaia dainai, idia hanaia laganidia lalonai egu kara ia idau. Lau davaria hariharibada karana ese lau ia durua ma haida lau kara namo henia totona. Hegeregere, edia kerere lau gwauatao haraga, lau badu o lalohisihisi haraga lasi, bona sisiba lau abia dae.” Momokani, momo be hariharibada karana idia hahedinaraia dainai, Dirava ese idia ia hanamoa.​—⁠Sal. 112:5; Aon. 22:9.

11. (a) Hariharibada karana ese edena bamona ia hahedinaraia ita be “mai aonega ida [ita] kara”? (b) Dirava ena taunimanima ese edena dala ai kontribusen monina idia gaukaralaia? (Laulau ginigunana herevalaia.)

¹¹ Iseda kohu amo Basileia ena gaukara ita durua neganai, ita be “mai aonega ida [ita] kara” unai. Oibe, iseda noho dalana hegeregerena ma haida ita durua diba. Hegeregere, bema ita be mai iseda moni o kohu, to ful-taim hesiai gaukara eiava pablisa momo lasi gabuna dekenai ita lao diba lasi, ita moale diba badina iseda kontribusen amo Basileia ena gaukara ita durua. (Aon. 19:17) Kontribusen monina amo, ogogami tanodia dekenai iseda buka bona magasin idia siaia bona haroro gaukara idia durua, badina unai gabudia ai taunimanima momo be idia ura hereva momokani idia kamonai. Lagani momo lalonai, Congo, Madagascar, bona Rwanda ai, tadikaka taihu be nega momo abia hidi idia karaia, bema idia ese edia famili totona aniani do idia hoia eiava Baibel do idia hoia, nega momo Baibel ena davana be wiki ta o hua ta ena gaukara davana hegeregerena. Ma haida edia kontribusen monina bona “idia dekenai idia noho gau momo amo,” Iehova ena orea ese Baibel hahanaia bona halasia gaukarana ia durua, unai amo tadikaka taihu bona Baibel stadi taudia danu be kopi ta idia abia diba. (2 Korinto 8:13-15 duahia.) Unai dainai kontribusen idia henia bona heduru idia abia taudia be Iehova idia tura henia diba.

“MAURI ENA BISINESI KARADIA IDAUIDAU LALONAI” VAREAI KARANA

12. Edena dala ai Aberahamo ia hahedinaraia ia be Dirava ia abidadama henia?

¹² Iehova ita tura henia diba bema tanobada ena bisinesi karadia lalonai ita vareai momo lasi, to iseda noho dalana hegeregerena taga “korikorina” ita tahua. Idaunegai ia noho abidadama tauna, Aberahamo, be Dirava ia kamonai henia bona taga hanuana, Uru, ia rakatania bona palai ruma dekenai ia noho, to ia ese Iehova ia tura henia noho. (Heb. 11:8-10) Ia be nega ibounai Dirava dekenai ia tabekau, badina ia diba Dirava sibona be taga korikori ena Badina. (Gen. 14:22, 23) Iesu ese unai bamona abidadama karana ia hanamoa. Ia ese taga tauna ta ia hamaoroa: “Bema oi ura oi goevadae, oi lao emu kohu oi hoihoilaia bona unai moni be ogogami taudia dekenai oi henia, bena guba dekenai oi be mai emu dava bada kohu, bona oi mai egu hahediba tauna ai oi lao.” (Mat. 19:21) Unai tauna be ia abidadama lasi, Aberahamo ia karaia bamona, to ma haida be Dirava idia abidadama henia.

13. (a) Paulo ese Timoteo dekenai dahaka sisiba ia henia? (b) Edena dala ai Paulo ena sisiba ita badinaia diba?

¹³ Timoteo be abidadama tauna ta. Paulo ese Timoteo ia gwauraia “Keriso Iesu ena tuari tauna namona” murinai, ia dekenai ia gwau: “Tuari tauna be mauri ena bisinesi karadia idauidau lalonai do ia vareai lasi, badina ia ura tuari totona ena ladana ia atoa tauna ena lalonamo ia abia.” (2 Tim. 2:3, 4) Hari inai negai, Iesu ena murinai idia raka taudia bona ful-taim hesiai taudia milioni ta, be edia noho dalana hegeregerena Paulo ena sisiba idia badinaia. Idia ese inai tanobada ena matana veria gaudia idia dadaraia, bona inai hakaua hereva idia laloatao: “Moni ia abiatorehai tauna ese, heniatorehai tauna ena hesiai gaukara ia karaia noho.” (Aon. 22:7) Satani ia ura iseda nega bona goada ibounai be bisinesi karadia lalonai ita haorea. Ita karaia abia hidi haida dainai, ita abitorehai monina be lagani momo lalonai ita henitorehai diba. Reana unai moni ita abia badina ita ura ruma badana ta ita hoia, sikuli badana dekenai ita lao, dava bada motuka ita hoia, eiava headava namo hereana ita karaia. To bema kohu momo ita tahua lasi, eiava ita abitorehai momo lasi, Dirava ena igui hesiai gaukara ita karaia diba, bona inai tanobada ena bisinesi oreadia edia igui hesiai gaukara do ita karaia lasi, unai amo ita hahedinaraia ita be mai aonega ida ita kara.​—⁠1 Tim. 6:10.

14. Iseda lalona ita hadaia dahaka ita karaia totona? Haheitalai ta gwauraia.

¹⁴ Bema mai anina bada gaudia ita atoa guna, kohu momo do ita tahua lasi. Tadikaka bona taihu ta edia bisinesi be moni namona ia karaia. To, idia ura bada ful-taim hesiai gaukara idia karaia lou dainai, edia bisinesi, dingi, bona kohu ma haida idia hoihoilaia. Bena Warwick, New York, ena brens ofesi haginia gaukarana idia durua. Idia abia hahenamo namona be edia natuna kekeni bona ena adavana ida Betele ai idia gaukara diba, bona wiki haida lalonai tadikaka ena tama sina ida idia gaukara, idia danu be Warwick ena brens ofesi haginia gaukarana idia durua. Colorado, U.S.A. ai, painia taihu ta be banika ai pat-taim gaukara ia karaia. Gaukara taudia be iena gaukara dekenai idia moale bada dainai, ia idia noia ful-taim do ia gaukara bona ena pei be nega toi do idia habadaia. To, ia diba unai ese iena hesiai gaukara do ia hadikaia dainai, edia noinoi ia abia dae lasi. Iehova ena hesiai taudia ma haida danu be unai bamona idia karaia. Bema mai ura bada ida Basileia ita atoa guna, ita hahedinaraia iseda hetura karana Dirava ida ita laloa bada, to inai tanobada ena bisinesi karadia ita laloa bada lasi.

TANOBADA ENA KOHU IDIA ORE NEGANAI

15. Dahaka ese ita ia hamoalea bada diba?

¹⁵ Bema ta be mai ena kohu momo, namo lasi ita laloa ia be Dirava ese ia lalonamo henia. Iehova ese ‘gaukara namodia momo idia karaia’ taudia ia hanamoa noho. (1 Timoteo 6:17-19 duahia.) Hegeregere, taihu Luciab ia kamonai Albania ai haroro taudia be momo lasi neganai, lagani 1993 ai Italy ia rakatania bona unuseni ia lao. Ia be moni gaukara ia karaia lasi, to ia abia dae momokani Iehova ese ia do ia durua. Albania gado ia dibaia, bona taunimanima 60 mai kahana ia durudia ela bona idia bapatiso. Ena be ita momo be unai bamona teritori ai ita haroro lasi, to ma haida ita durua bona idia be mauri ia lao henia dalana idia badinaia neganai, idia bona ita be do ita moale bada.​—⁠Mat. 6:20.

16. (a) Hari idia noho bisinesi oreadia dekenai dahaka do ia vara? (b) Vaira nega ai do ia vara gauna ita diba dainai, iseda taga be edena bamona do ita gaukaralaia?

¹⁶ Luka 16:9 ai, Iesu ia gwau, “kara maoromaoro lasi taga” be do idia ore neganai, ena hereva anina be unai taga be do ia ore momokani. Oibe, inai nega gabedia ai, banika momo be moni idia gaukaralaia namonamo lasi dainai, moni ena hekwakwanai be bada. To vaira nega ai unai hekwakwanai be do ia dika momokani. Satani ena tanobada ibounai​—⁠politikol, tomadiho, bona bisinesi oreadia​—⁠be kahirakahira do idia ore. Peroveta taudia Esekiela bona Sefania idia gwau golo bona siliva, bisinesi oreadia ese idia laloa bada gaudia unai, be anina lasi gaudia ai do idia lao. (Ese. 7:19; Sep. 1:18) Bema kahirakahira ita mase bena ita laloparara ita be nega bada ita atoa inai tanobada ena “kara maoromaoro lasi taga” ita tahua totona, to taga korikorina ita tahua lasi, edena bamona do ita mamia? Unai be hegeregere tau ta be ena mauri ibounai lalonai ia gaukara goada moni momo haboua totona, to gabeai ia laloparara ia haboua moni be koikoi gaudia. (Aon. 18:11) Oibe, unai bamona taga be do idia ore, unai dainai namona be iseda taga ita gaukaralaia Iehova bona Iesu ita tura henia totona. Iehova ena Basileia ita durua neganai, iseda hetura karana Iehova ida be do ia goada.

17, 18. Dirava ena turadia be dahaka hahenamo do idia abia?

¹⁷ Dirava ena Basileia ia mai neganai, ruma do ita rentaia eiava moni do ita abitorehai lasi, aniani be do idia momo herea bona do ita hoia lasi, doketa eiava muramura be lasi. Iehova ena taunimanima ese aniani namodia do idia moalelaia. Golo, siliva, bona dava bada nadi be herahera totona do ita gaukaralaia, to hoihoi totona lasi. Ruma namodia be dava bada au, nadi, bona auri amo do ita haginidia. Iseda turadia be mai moale ida ita do idia durua, to davana abia totona unai do idia karaia lasi. Oibe, tano ese ia havaraia aniani ibounai be do ita moalelaia hebou.

¹⁸ Iehova bona Iesu idia tura henia taudia ese unai bamona hahenamo do idia moalelaia. Iehova ena tanobada hesiai taudia be mai moale ida do idia boiboi, bema idia kamonai Iesu ia gwau: “Lauegu Tamana ese ia hanamoa taudia e, umui mai, taunimanima be tanobada ai idia vara negana amo umui totona idia hegaegaelaia vadaeni Basileiana do umui abia.”​—⁠Mat. 25:34.