“Oiemu Palani Ibounai, Edia Anina Do Ia Havaraia”

1. Matamata tauna be ena vaira nega totona dahaka abia hidi ia karaia be namo, to dahaka dainai ia gari lasi be namo? (Laulau ginigunana herevalaia.)

REANA umui matamata taudia do umui lalotamona, ta be ena laolao ia do hamatamaia lasi neganai, ia ura lao gabuna ia palanilaia guna be namo. Emu mauri be laolao ta bamona, bona matamata negana be nega namona oi ura lao gabuna oi palanilaia totona. Momokani, nega haida ia auka palani ta ita karaia totona. Kekeni ta ladana Heather ia gwau: “Emu mauri ai do oi karaia gauna oi abia hidi guna be gari gauna.” To namo lasi oi gari. Iehova be ena taunimanima dekenai ia gwau: “Lau be umui emui Dirava, gau ta ese umui do ia hagaria lasi. Lau ese umui do lau hagoadaia, bona umui do lau durua.”​—⁠Isa. 41:10.

2. Edena bamona oi diba Iehova ia ura emu vaira nega oi moalelaia?

² Iehova ese oi ia hagoadaia emu vaira nega oi palanilaia namonamo totona. (Had. 12:1; Mat. 6:20) Ia ura do oi moale. Ia havaraia gaudia dekenai oi itaia, kamonai, bona mamia gaudia amo unai ia hamomokania. Danu, ia ese ita ia naria bona mauri dala namona be ita dekenai ia hadibaia. Iena sisiba idia dadaraia taudia dekenai Iehova ia gwau: “Lau ura lasi karadia umui abia hidi noho. . . . Kamonai! Egu hesiai taudia be do idia moale, to umui, be do umui hemarai bada. Kamonai! Egu hesiai taudia ese ane do idia abia, edia moale be bada dainai.” (Isa. 65:12-14) Iehova ia moale bema ena taunimanima be edia mauri lalonai abia hidi maorodia idia karaia.​—⁠Aon. 27:11.

OI DO IDIA HAMOALEA PALANIDIA KARAIA

3. Iehova ia ura dahaka do oi karaia?

³ Iehova ia ura dahaka palani do oi karaia? Taunimanima ia havaraia neganai, ia ura ia do idia dibaia bona mai abidadama ida ia idia hesiai henia, unai amo do idia moale. (Sal. 128:1; Mat. 5:3) Ita be animal bamona lasi, idia be idia aniani, inuinu, bona natudia idia havaraia sibona. To, Dirava ia ura oi ese emu mauri oi palanilaia namonamo, unai amo do oi moale. Oi ia Havaraia Tauna be ‘lalokau Diravana’ bona “moale Diravana,” bona ia ese “taunimanima ia karaia, ia sibona ena laulau bamona.” (2 Kor. 13:11; 1 Tim. 1:11; Gen. 1:27) Bema iseda lalokau Diravana oi tohotohoa, do oi moale. Inai siri ena hereva oi mamia, a? Ia gwau: “Henia kara ena moale be bada, to abia kara ena moale be maragi.” (Kara 20:35) Iseda mauri dekenai unai be momokani. Unai dainai, Iehova ia ura emu vaira nega oi palanilaia neganai, namona be oi hahedinaraia oi be ma haida bona Dirava oi lalokau henia.​—⁠Mataio 22:36-39 duahia.

4, 5. Dahaka ese Iesu ia hamoalea?

⁴ Iesu Keriso ese umui matamata taudia totona haheitalai hereadaena ia hahedinaraia. Ia maragi neganai, reana ia gadara bona ia moale danu. Dirava ena Hereva ia gwau, “kiri be mai ena nega . . . mavaru danu be mai ena nega.” (Had. 3:4) Danu, Toretore Helagadia stadilaia karana amo Iesu be Iehova kahirakahira ia lao. Iena mauri lagani be 12 neganai, dubu helaga ena hadibaia taudia be “iena laloparara karana bona haere dekenai idia hoa.”​—⁠Luka 2:42, 46, 47.

⁵ Iesu be tau badana ai ia lao neganai, ia moale. Dahaka dainai ia moale? Ia diba Dirava ia ura ia ese ‘ogogami taudia dekenai sivarai namona do ia gwauraia . . . bona matakepulu taudia edia matana do ia kehoa.’ (Luka 4:18) Iesu ia moale, badina ia ese Dirava ena ura ia karaia. Salamo 40:8 ese ena hemami ia hahedinaraia, ia gwau: “Lauegu Dirava e, lau ura dikadika oiemu ura do lau karaia.” Iesu ia ura dikadika taunimanima dekenai iena guba Tamana ia herevalaia. (Luka 10:21 duahia.) Nega ta, hahine ta dekenai tomadiho momokani ia herevalaia murinai, Iesu be ena hahediba taudia dekenai ia gwau: “Lauegu aniani be lau ia siaia tauna ena ura do lau karaia bona iena gaukara do lau karaia haorea.” (Ioa. 4:31-34) Iesu be Dirava bona ma haida dekenai lalokau ia hahedinaraia dainai, ia moale. Bema unai oi karaia, do oi moale danu.

6. Dahaka dainai lo Keristani taudia ida emu vaira nega ena palani oi herevalaia be namo?

⁶ Keristani taudia momo be idia matamata negana ai painia gaukara idia karaia dainai idia moale. Idia haida ida emu palani oi herevalaia diba. Baibel ia gwau: “Sisiba momo do oi tahua noho, bona do oi kwalimu, to sisiba do oi abia lasi neganai, do oi moru.” (Aon. 15:22) Reana idia ese oi do idia hamaoroa ful-taim hesiai gaukarana amo do oi dibaia gaudia ese emu mauri lalonai oi do idia durua bada. Guba ai, Iesu be ena Tamana amo gau momo ia dibaia. Bona tanobada ai ena hesiai gaukara ia karaia neganai, gau ma haida ia dibaia danu. Hegeregere, ma haida dekenai sivarai namona harorolaia karana bona nega aukadia ai Dirava badinaia karana ese moale ia havaraia. (Isaia 50:4 duahia; Heb. 5:8; 12:2) Ful-taim hesiai gaukarana amo moale oi abia daladia ma haida mani ita herevalaia.

HAHEDIBA TAUDIA HALAOA GAUKARANA ENA NAMO

7. Dahaka dainai matamata taudia ese hahediba taudia halaoa gaukarana idia moalelaia?

⁷ Iesu ia gwau: “Umui lao, bese ibounai taudia be hahediba taudia ai umui halaoa . . . bona idia umui hadibaia.” (Mat. 28:19, 20) Bema emu palani be hahediba taudia halaoa gaukarana do oi karaia, oi be gaukara namona oi abia hidi unai, bona unai ese Dirava do ia hamoalea. Gaukara ta oi karaia namonamo totona, nega oi atoa be namo. Tadikaka Timothy be ia matamata negana amo painia gaukara ia karaia, ia gwau: “Lau ura bada Iehova lau hesiai henia, badina unai dala amo ia dekenai egu lalokau lau hahedinaraia. Matamanai, Baibel stadi lau hamatamaia be auka, to gabeai teritori ma ta dekenai lau lao, bona hua ta sibona lalonai Baibel stadi haida lau hamatamaia. Stiuden ta be Kingdom Hall dekenai ia mai matamaia. Hua rua lalonai Singul Tadikaka Edia Baibel Sikulia dekenai lau lao murinai, asainmen matamata lau abia bona stadi 4 lau hamatamaia. Taunimanima hadibaia karana lau moalelaia, badina lau itaia lauma helaga ena heduru amo edia kara idia haidaua.”​—⁠1 Tes. 2:19.

8. Matamata taudia haida be edena dala ai hahediba taudia halaoa gaukarana idia durua?

⁸ Matamata taudia ma haida be gado ma ta idia dibaia. Hegeregere, Jacob, ia be Untied States amo, ia gwau: “Egu mauri lagani be 7 neganai, egu sikuli turadia momo be Vietnam amo. Lau ura idia dekenai Iehova lau herevalaia, unai dainai palani lau karaia edia gado do lau dibaia. Matamanai, English bona Vietnamese gado Gima Kohorona lau hahegeregerea. Bona egu noho gabuna kahirakahira ia noho Vietnamese kongrigeisen dekenai idia lao tadikaka taihu lau bamoa. Egu mauri lagani be 18 neganai, painia gaukara lau matamaia. Gabeai, Singul Tadikaka Edia Baibel Sikuli dekenai lau lao. Unai ese egu painia gaukarana ia durua, hari Vietnamese gado ena grup ta lau durua bona lau sibona be elda tauna. Vietnam taudia momo idia hoa, badina edia gado lau dibaia. Nega momo edia ruma dekenai lau idia abia dae, bona idia ida Baibel lau stadilaia diba. Idia haida be idia bapatiso vadaeni.”​—⁠Kara 2:7, 8 sekea.

9. Hahediba taudia halaoa gaukarana ese edena dala ai oi ia durua diba?

⁹ Hahediba taudia halaoa gaukarana amo gaukara namonamo karana, herevahereva daladia, mai gari lasi ida bona aonega dalanai hereva karana ita dibaia. (Aon. 21:5; 2 Tim. 2:24) To hahediba taudia halaoa gaukarana oi moalelaia diba, badina oi ia durua Baibel amo emu abidadama oi gwauraia hedinarai totona. Bona Iehova ida gaukara hebou karana oi dibaia danu.​—⁠1 Kor. 3:9.

10. Ena be emu haroro teritori be auka, to edena dala ai hahediba taudia halaoa gaukarana oi moalelaia diba?

¹⁰ Hahediba taudia halaoa gaukarana oi moalelaia diba, herevana haida sibona idia ura oi laohaia sivaraina idia kamonai. Hahediba taudia halaoa gaukarana be ibounai ese idia karaia diba. Kongrigeisen taudia ibounai ese kudou-maoro taudia do idia tahua. Ena be tadikaka o taihu ta ese ia davaria kamonai tauna be gabeai hahediba tauna ai ia lao, to ita ibounai ita moale diba, badina unai tahua gaukarana ita durua. Hegeregere, Brandon be lagani 9 lalonai kamonai taudia be momo lasi teritori ai painia gaukara ia karaia. Ia gwau: “Sivarai namona harorolaia gaukarana lau moalelaia, badina unai hahegani be Iehova amo. Sikuli lau haorea murinai, painia gaukara lau karaia matamaia. Emai kongrigeisen dekenai idia noho matamata taudia lau hagoadaia, bona lau itaia edia hetura karana Iehova ida be ia goada ia lao neganai, lau moale. Singul Tadikaka Edia Baibel Sikuli lau haorea murinai, painia asainmen matamata lau abia. Ena be lau stadi henia taudia be bapatiso idia abia lasi, to haida ese idia stadi henia taudia be idia bapatiso. Lau moale badina hahediba taudia halaoa gaukarana lau abia hidi.”​—⁠Had. 11:6.

OI KARAIA PALANINA ESE DAHAKA HUAHUA IA HAVARAIA?

11. Matamata taudia ese edena hesiai gaukara idia moalelaia?

¹¹ Dala idauidau ai Iehova oi hesiai henia diba. Hegeregere, matamata taudia momo be konstraksen gaukara idia durua. Gabu idauidau ai Kingdom Hall matamatadia handred momo idia haginia be namo. Unai gaukara be gaukara helagana bona Dirava ia hanamoa bona oi ia hamoalea diba danu. Bona tadikaka taihu ma haida ida gaukara karana ese moale ia havaraia. Tiokratik konstraksen gaukara amo gau momo ita dibaia danu, hegeregere ita ia hadibaia edena dala ai sibona ita gimaia, ita gaukara goadagoada, bona gaukara hakaua taudia ida ita gaukara hebou diba.

12. Painia gaukara dainai, edena gaukara ma haida oi karaia diba?

¹² Tadikaka ta ladana Kevin ia gwau: “Lau maragi negana amo, lau ura bada ful-taim hesiai gaukara lau karaia. Unai dainai egu mauri lagani be 19 neganai, painia gaukara lau karaia matamaia. Sibona durua totona, ruma haginia gaukarana ia karaia tadikaka ta ida pat-taim moni gaukara lau karaia. Ruma ena guhi, windo, bona iduara atoa dalana lau dibaia. Gabeai lagani rua lalonai, lai-gubana ese ia hadikaia gabudia dekenai heduru idia henia taudia ida lau gaukara, bona Kingdom Hall bona tadikaka taihu edia ruma ai haginidia lou. Lau kamonai South Africa ai konstraksen gaukara totona volantia taudia idia tahua neganai, fom lau hahonua bona lau idia abia dae. Africa ai, wiki haida sibona lalonai Kingdom Hall idauidau ai haginia. Emai konstraksen tim be ruma bese ta bamona. Ai noho hebou, Baibel ai stadilaia hebou, bona ai gaukara hebou. Wiki ta ta ai tadikaka taihu ida haroro karana lau moalelaia. Lau maragi negana ai lau karaia palani idauidau ese lau idia hamoalea.”

13. Edena dala ai Betele gaukarana ese matamata taudia ia hamoalea?

¹³ Ful-taim hesiai gaukara idia ura karaia taudia haida be hari Betele ai idia gaukara. Betele gaukara be mauri dala namona, badina unuseni oi karaia gaukara ibounai be Iehova totona. Betele famili ese Baibel bona pablikeisen idauidau idia hegaegaelaia, taunimanima idia durua totona. Betele ai ia gaukara tadikaka, Dustin, ia gwau: “Lauegu mauri lagani be 9 neganai, ful-taim hesiai gaukara be egu tahua gauna ai lau halaoa, bona sikuli lau haorea murinai, painia gaukara lau matamaia. Bona lagani ta mai kahana murinai, Betele dekenai lau idia boiria, unuseniai printa masini gaukaralaia dalana lau dibaia bona gabeai kompiuta dipatmen dekenai lau gaukara. Betele ai lau moalelaia gauna ma ta be, tanobada hegegemadai idia karaia hahediba taudia halaoa gaukarana ena ripoti be ai kamonai guna. Betele gaukara lau moalelaia, badina ai karaia gaukarana ese taunimanima ia durua Iehova kahirakahira idia lao totona.”

EMU VAIRA NEGA TOTONA DAHAKA PALANI DO OI KARAIA?

14. Ful-taim hesiai gaukara karaia totona dahaka palani oi karaia diba?

¹⁴ Ful-taim hesiai gaukara karaia totona edena dala ai palani oi karaia diba? Mai kudouna ibounai ida Iehova oi hesiai henia totona, Keristani kara namodia oi hahedinaraia be namo. Unai dainai nega ibounai Dirava ena Hereva oi stadilaia, hereva edia anina oi laloa dobu, bona kongrigeisen heboudia ai emu abidadama oi gwauraia hedinarai. Emu sikuli negadiai, ma haida dekenai sivarai namona harorolaia daladia oi dibaia. Dala namona ai idia dekenai henanadai ta oi henia bona edia haere oi kamonai, unai amo oi hahedinaraia oi be taunimanima oi laloa bada. Danu, kongrigeisen ena gaukara haida oi durua diba, hegeregere Kingdom Hall hagoevaia bona hanamoa gaukarana. Iehova be mai moale ida manau bona sibona idia henia taudia ia gaukaralaia. (Salamo 110:3 duahia; Kara 6:1-3) Aposetolo Paulo ese Timoteo ia boiria misinari gaukara do ia karaia, badina “tadikaka be Timoteo idia herevalaia, idia gwau ia be tau namona.”​—⁠Kara 16:1-5.

15. Moni gaukara ta karaia totona, edena dala ai palani oi karaia diba?

¹⁵ Ful-taim hesiai taudia be moni gaukara sisina idia karaia diba. (Kara 18:2, 3) Reana kosi ta oi karaia diba, unai amo pat-taim moni gaukara do oi karaia. Palani oi karaia neganai, emu sekit naria tauna bona painia taudia edia heduru oi noia. Painia taudia ese idia karaia diba gaukarana totona idia oi nanadaia. Bona Baibel ia gwau: “Oi ura karaia gaudia ibounai totona, Lohiabada do oi noia, ia ese do ia hanamoa gwauraia, unai neganai oiemu palani ibounai edia anina do idia vara momokani.”​—⁠Aon. 16:3; 20:18.

16. Matamata negana ai Iehova hesiai henia karana ese edena dala ma haida ai oi ia durua diba?

¹⁶ Namona be oi abia dae momokani Iehova be ia ura vaira nega namona oi “dogoatao auka.” (1 Timoteo 6:18, 19 duahia.) Ful-taim hesiai gaukara oi karaia neganai, oi be ful-taim hesiai taudia ma haida ida oi gaukara bona idia ese oi do idia durua lo Keristani tauna ai oi lao totona. Danu, matamata negana ai Iehova idia hesiai henia taudia momo be edia headava idia moalelaia. Nega momo, idia do headava lasi neganai painia gaukara idia karaia taudia momo be idia headava murinai painia gaukara idia do karaia.​—⁠Roma 16:3, 4.

17, 18. Dahaka dainai oi ura karaia palanina be emu kudouna amo ia mai be namo?

¹⁷ Namona be oi ura karaia palanina be emu kudouna amo. Salamo 20:4 ese Iehova be inai bamona ia herevalaia, ia gwau: “Oiemu kudouna ena ura, be oi dekenai do ia henia, bona oiemu palani ibounai, edia anina do ia havaraia.” Unai dainai emu mauri ai oi ura karaia gauna oi lalohadailaia. Iseda nega ai Iehova ese ia karaia noho gaudia bona ena hesiai gaukara oi durua dalana oi laloa. Bena do ia moalelaia gauna oi karaia.

¹⁸ Iehova hesiai henia karana ese oi do ia hamoalea, badina unai mauri dalana be Dirava ese ia moalelaia. Oibe, “oiemu moale be Lohiabada dekena amo do oi tahua, vadaeni ia ese, oi ura henia gaudia oi dekenai do ia henia.”​—⁠Sal. 37:4.