Matamata Taudia E—Emui Mauri be Edena Bamona Do Umui Gaukaralaia?
“LAU ura mauri namona lau moalelaia.” Kekeni ta be unai bamona ia hereva. Reana umui danu be unai umui ura. To edena dala ai mauri “namona” umui moalelaia? Niuspepa, reidio, TV, emui turadia bona tisa idia gwau, bema moni momo umui haboua bona ladana bada umui abia, vadaeni mauri namona do umui moalelaia!
To Baibel ese matamata taudia ia hadibaia, moni o kohu momo idia tahua taudia be ‘lai idia lulua kava hegeregerena.’ (Hadibaia Tauna 4:4) Matamata taudia haida sibona be taga bona ladana bada taudia ai idia lao. To unai bamona taudia be nega momo idia lalohisihisi. Dagi bada gaukara namona ia abia Britain merona ta ia gwau: “Ia be anina lasi mauana bamona. Ena lalona oi itaia neganai, gau ta ia noho lasi.” Momokani, nega haida gaukara ta ese moni momo bona ladana bada ia henia diba. To unai ese emui hetura karana Dirava ida ia hanamoa diba lasi. (Mataio 5:3) Danu 1 Ioane 2:17 ia gwau: ‘Tanobada be do ia ore.’ Ena be inai tanobada ena gau namodia umui abia, to do idia noho daudau lasi.
Unai dainai, Hadibaia Tauna 12:1 ese matamata taudia ia hamaoroa: “Oi be eregabe neganai, . . . oi ia karaia Dirava do oi laloa.” Oibe, emui mauri umui gaukaralaia dala hereadaena be inai: Iehova Dirava ena hesiai gaukara umui karaia. To unai bamona umui karaia totona, gau haida umui karaia guna be namo. Vadaeni dahaka do umui karaia? Dirava umui hesiai henia ena anina be dahaka?
Iehova Ena Witnes ai Umui Lao be Namo
Dala namba 1 be, Dirava hesiai henia urana umui habadaia—bona unai ura ia vara kava lasi, herevana emui tama sina be Keristani taudia eiava lasi. Namona be umui sibona umui hekwarahi Iehova ena turana ai umui lao totona. Kekeni ta ia gwau: “Guriguri hanaihanai karana ese emu hetura karana Iehova ida ia hanamoa.”—Salamo 62:8; Iamesi 4:8.
Dala namba 2 ai, Roma 12:2 ia gwau: “Umui sibona dekenai do umui hamomokania Dirava ena ura be ia namo, ia ese ia abia dae bona ia goevadae.” Umui dibaia hereva haida dekenai umui daradara noho, a? Vadaeni unai Baibel sirina ena sisiba umui badinaia—umui “hamomokania” umui dibaia gaudia be momokani eiava! Umui sibona emui research o tahua karana umui karaia. Baibel bona iseda pablikeisen idauidau umui duahia. To, Dirava umui dibaia sibona be hegeregere lasi. Nega bada umui atoa umui duahia gaudia umui laloa dobu, umui laloatao totona. Unai ese umui do ia durua Dirava umui lalokau henia noho totona.—Salamo 1:2, 3.
Dala namba 3 be, umui dibaia gaudia be emui sikuli turadia dekenai umui harorolaia toho. Dala namba 4 be, ruma-ta-ruma-ta haroro gaukara umui karaia. Umui haroro neganai, nega haida emui sikuli turana ta umui davaria, bona matamanai umui hemarai. To, Baibel ese ita ia hagoadaia, namo lasi ‘sivarai namona dainai ita hemarai.’ (Roma 1:16) Umui ese mauri bona helaro sivaraina umui harorolaia! Unai dainai, namo lasi umui hemarai.
Bema emui tama sina be Keristani taudia, reana haroro gaukara dekenai idia umui bamoa. To umui be iduara dekenai umui gini kava bona gau ta umui gwauraia lasi eiava magasin bona pepapepa umui haria sibona, a? Umui ese ruma tauna umui haroro henia neganai, Baibel umui gaukaralaia diba, a? Bema lasi, namona be emui tama sina eiava kongrigeisen tadikaka ta o taihu ta amo heduru umui abia. Namona be emui tahua gauna be, bapatiso lasi pablisa ta ai umui lao bena sivarai namona umui harorolaia!
Gabeai, emui mauri umui gwauhamatalaia—guriguri amo Dirava umui gwauhamata henia, ia do umui hesiai henia. (Roma 12:1) To, unai gwauhamata umui hunia lasi. Dirava ia gwau, bema ta be ena ‘abidadama ia gwauraia hedinarai neganai, ia be hahemauri do ia abia.’ (Roma 10:10) Bapatiso negana ai, emui uduna amo emui abidadama umui gwauraia hedinarai. Unai murinai, ranu lalonai bapatiso umui abia. (Mataio 28:19, 20) Momokani, bapatiso be dala hereadaena. To, haida idia ura lasi bapatiso do idia abia, badina idia laloa gabeai do idia moru. Bema Dirava dekenai umui tabekau, ia ese umui dekenai “taunimanima edia siahu ia hereaia gauna” do ia henia bena do oi gini goada.—2 Korinto 4:7; 1 Petero 5:10.
Bapatiso umui abia neganai, umui be Iehova ena Witnes ta ai umui lao. (Isaia 43:10) Anina be emui mauri do umui gaukaralaia namonamo be namo. Gwauhamata ena anina ta be, ‘sibona emui ura umui dadaraia’ be namo. (Mataio 16:24) Reana sibona emui tahua gaudia bona emui ura gaudia haida umui rakatania bona ‘Dirava ena Basileia do umui tahua guna.’ (Mataio 6:33) Gwauhamata bona bapatiso ese dala momo ia kehoa unai umui karaia totona. Mani haida ita laloa.
Dirava Umui Hesiai Henia Hanaihanai Daladia Haida
● Painia gaukara be dala namona ta. Painia taudia be bapatiso idia abia Keristani taudia namodia bona hua ta ta lalonai hora 70 idia gaukaralaia sivarai namona idia harorolaia totona. Haroro lalonai unai bamona hora umui gaukaralaia neganai, unai ese umui do ia durua emui haroro bona hadibaia daladia umui hanamoa totona. Painia taudia momo idia moale, badina edia Baibel stiuden be bapatiso idia abia. Moni gaukara ta ese unai bamona moale mamina ia havaraia diba, a?
Painia taudia momo be pat-taim moni gaukara idia karaia, edia mauri durua gaudia idia hoia totona. Momo be matamanai unai idia laloa dainai, edia tama sina amo eiava sikuli dekenai gaukara ta idia dibaia. Bema umui bona emui tama sina emui palani be haisikuli murinai kosi ma haida umui abia be namo, vadaeni unai umui karaia moni momo umui abia totona lasi, to umui do ia durua hesiai gaukara bona painia gaukara umui karaia totona.
To painia taudia be moni gaukara idia laloa bada lasi to haroro gaukara idia laloa bada, idia ura ma haida idia durua mauri idia abia totona! Painia gaukara be emui tahua gauna ai umui halaoa, a? Painia taudia be hahenamo momo idia abia. Hegeregere, idia haida be pablisa momo lasi gabudia dekenai idia lao. Ma haida be gado idauna ta idia dibaia, eiava idau gado kongrigeisen ta o tano ta dekenai hesiai gaukara idia karaia. Oibe, painia gaukara be mauri namona!
● Basileia Evanelia Sikulina. Bema ta be lagani momo lalonai painia gaukara ia karaia vadaeni bona ia ura ena kongrigeisen ia rakatania bona idau gabu ai haroro gaukara ia durua, ia be hua rua lalonai idia karaia Basileia Evanelia Sikulina dekenai ia vareai diba. Unai painia taudia be Iesu Keriso, guna tanobada ai ia noho Evanelia Tauna Hereadaena, idia tohotohoa idia gwau, “Lau be inai, do lau lao! Lau do oi siaia!” (Isaia 6:8; Ioane 7:29) Idia lao henia gabunai, idia dekenai gau ibounai be matamata, hegeregere mauri dalana, kastom, weda, bona aniani. Reana gado matamatana do idia dibaia. Namona be Basileia Evanelia Sikulina idia lao taudia edia mauri lagani be 23 ia lao 65, bona unai sikuli ese singul tadikaka, singul taihu, bona headava taudia do ia durua edia hesiai gaukara ai kara namodia idia hahedinaraia noho, bona unai sikuli idia haorea taudia be Iehova bona ena orea ese dala idauidau ai idia gaukaralaia diba.
● Betele gaukara be Iehova ena Witnes taudia edia brens ofesi ta ai do umui karaia volantia hesiai gaukarana ta. Betele famili taudia haida be Baibel idia herevalaia bukadia karaia bona halasia dipatmen dekenai idia gaukara. Ma haida edia gaukara be kohu o ofesi meintenens o Betele famili naria gaukara idia karaia. Unai ibounai be Iehova ena hesiai gaukara helagadia. Danu, Betele taudia idia diba edia gaukara dainai, tanobada ibounai tadikaka oreana ese namo bada idia davaria.
Gaukara idia diba tadikaka taihu be nega haida Betele dekenai idia boiria. To, momo be Betele idia mai neganai treinini idia abia. Betele taudia be moni abia totona idia gaukara lasi. To idia laloa Betele ai idia abia aniani, noho gabuna, bona moni sisina be hegeregere. Betele famili merona ta ese ena hesiai gaukara be inai bamona ia herevalaia: “Gaukara hereadaena! Sediual lau badinaia be mai ena hekwarahi, to iniseniai lau gaukara dainai, hahenamo momo lau abia.”
● Konstraksen gaukara be brens rumadia o ofesi eiava Kingdom Hall haginia gaukara. Tadikak taihu haida (o construction servants) be konstraksen gaukara idia durua. Unai be hesiai gaukara helagana, Solomona ena dubu idia karaia taudia edia gaukara hegeregerena. (1 King Taudia 8:13-18) Konstraksen taudia idia naria dalana be Betele famili idia naria dalana hegeregerena. Unai konstraksen tadikaka bona taihu ese edia gaukara amo Iehova idia hanamoa!
Emui Mauri Ibounai Lalonai Iehova Umui Hesiai Henia
Iehova umui hesiai henia be mauri namona. Dirava ena hesiai gaukara umui karaia hanaihanai be tahua gauna ai umui halaoa, a? Namona be emui tama sina, elda taudia, bona sekit naria tauna ida unai umui herevalaia. Bema oi ura Betele o Basileia Evanelia Sikulina dekenai oi lao, unai bamona sikuli edia hebou be rijinol hebouhebou ai idia karaia neganai, umui vareai be namo.
Momokani, haida sibona be ful-taim hesiai gaukara idia karaia diba. To ma haida be gorere, moni ena hekwakwanai, bona famili dainai, unai idia karaia be hegeregere lasi. To, namona be bapatiso taudia ibounai ese inai oda idia badinaia: ‘Namona be Iehova emui Dirava umui lalokau henia mai emui kudouna ibounai, mai emui mauri ibounai, bona mai emui darana ibounai ida.” (Mataio 22:37) Iehova ia ura emui noho dalana hegeregerena Ia umui hesiai henia. Momokani, emui mauri lalonai Iehova ena hesiai gaukara umui laloa bada. Dirava ena hesiai gaukara lalonai umui hagugurua diba tahua gaudia umui abia hidi. Oibe, ‘umui be eregabe neganai, umui ia karaia Dirava do umui laloa,’ bona unai bamona umui karaia dainai, hahenamo idauidau do umui abia ela bona hanaihanai!
Baibel siridia be Hiri Motu Buka Helaga, Bible Society of Papua New Guinea ese ia karaia gauna amo.