3 Hekwakwanai Haheaukalaia Dalana

EMU GORERE IA ORE LASI

Rose ia gwau: “Egu gorere be egu tama sina amo lau abia hanai, bona lau hisihisi momo. Egu helt ia namo lasi.” Nega haida Rose ese Baibel ai ia stadilaia gaudia ia laloa dobu be auka eiava hebou ai tadikaka edia tok ia kamonai be auka. To, Iesu ena hereva, Mataio 19:26 ai, ese ia durua, ia gwau: “Dirava ese gau ibounai ia karaia diba.” Rose ia davaria Baibel be dala idauidau ai ia stadilaia diba. Nega haida, Rose be hisihisi mamina ia abia neganai, ia auka Baibel ia duahia totona, so ia ese idia rekodia Baibel duahiduahi bona Baibel idia herevalaia bukadia ia kamonai.a Ia gwau: “Inai tulu ese lau idia durua Dirava lau badinaia noho totona.”

Nega haida Rose ia lalohisihisi badina guna ia karaia gaukaradia haida be hari ia karaia diba lasi, to 2 Korinto 8:12 ese ia hagoadaia, ia gwau: “Bema ta be mai ena ura ida ia henia, Dirava ese unai henia karana do ia abia dae. Ia dekenai ia noho gauna hegeregerena ia henia, to ia dekenai ia noho lasi gauna ia henia lasi.” Unai ese Rose ia hadibaia, ena be ena goada be ia hegeregere lasi, to ia hekwarahi dainai Dirava ia moale.

EMU LALOHISIHISI IA ORE LASI

Inai magasin ese ia herevalaia hahinena, Delphine ia gwau: “Egu natuna kekeni, 18, ia mase murinai, lau daradoko bada bona lau laloa do lau mase haraga. Egu mauri be guna bamona lasi.” To Salamo 94:19 ese Delphine ia hagoadaia, ia gwau: “Egu lalona ia hekwarahi momo neganai, oi ese lau oi hagoadaia, bona egu lauma oi hamoalea noho.” Delphine ia gwau, “Guriguri amo Iehova lau noia lau ia durua lau laloa momo lasi totona.”

Delphine ia ura ia bisi dainai, volantia gaukara ia karaia. Ia gwau, ‘Lau be natu ena crayon ta bamona, ena be ia makohi, to natu ese laulau ia kala diba.’ Unai hegeregerena, ena be Delphine ia mamia ia be crayon ta bamona ia makohi, to ia itaia ia ese ma haida ia durua diba. Ia gwau: “Lau itaia Baibel ena hakaua herevadia amo egu stiuden lau durua neganai, toana be Iehova be unai dala amo lau ia hagoadaia bona hamoalea.” Delphine be Baibel ese ia sivarailaia taudia—metau haida dainai, idia lalohisihisi taudia—edia ladana ena lista ia torea. Ia gwau: “Unai bamona taudia ibounai be Dirava idia guriguri henia danu.” Ia dibaia gauna ta danu be, “haere ta do oi abia diba lasi bema emu Baibel oi kehoa lasi.”

Delphine ese Baibel stadi amo ia dibaia gauna ta be, nega gunadia laloa lasi to vaira negana laloa. Kara 24:15 ese ia gwauraia helarona be Delphine ia hagoadaia, ia gwau: “Kara maoromaoro taudia bona kara maoromaoro lasi taudia be do idia toreisi lou.” Delphine ia abia dae momokani ena natuna be Iehova ese do ia hamauria lou, a? Iena haere be inai: “Egu natuna kekenina lau itaia diba. Ia do lau itaia ena ‘deit’ be hegeregere, egu Tamana ena kalenda dekenai ia noho vadaeni. Lau itaia ai ruaosi be flaoa ai hadoa noho, bona ia lau lalokau henia, ia beibi negana ai lau lalokau henia hegeregerena.”