Hisiu Stadilaia Bona Vaira Nega Gwauraia Babalau Taudia​—Edia Heduru Amo Vaira Negana Oi Itaia, A?

HISIU STADILAIA BABALAU TAUDIA

Hua, planeti o hisiu stadilaia babalau taudia idia laloa idia be taunimanima idia durua. Idia laloa beibi ta ena kara bona vaira negana be ia vara negana ai ia hedinarai hisiu ese ia gwauraia hedinarai.

Herevana unai lalohadai be idaunegai Babulonia ai ia matamaia, to hari inai negai, taunimanima momo be unai kara idia do badinaia noho. Lagani 2012, United States ai, tahua gaukarana ta amo idia davaria, taunimanima ibounai amo 33 pesen idia gwau, hisiu stadilaia babalau taudia be reana “saiens bamona,” bona 10 pesen idia abia dae ia be “saiens ena kahana badana ta.” Unai be momokani, a? Lasi. Ena badina mani ita itaia.

• Hisiu ibounai be siahu lasi taunimanima ta ena mauri dalana idia biagua totona.

• Hisiu stadilaia babalau taudia ese idia gwauraia gaudia ibounai be idia guguru diba lasi.

• Hari inai negai hisiu stadilaia babalau taudia haida be idaunegai idia abia dae dalana ta idia badinaia noho. Hegeregere idia laloa planeti ibounai be tanobada idia hagegea noho. To, unai be momokani lasi badina planeti ibounai be dina idia hagegea.

• Hisiu stadilaia babalau taudia be idauidau, bona edia hereva tau tamona dekenai be idauidau.

• Hisiu stadilaia taudia ese taunimanima be orea 12 o hisiu ena laini ibounai 12 amo edia vara dinana hegeregerena idia hapararaia. To lagani handred mai kahana idia ore vadaeni, tanobada ena noho gabuna ia idau sisina dainai, hisiu ena laini ida idia hakapua deit be guba gaudia edia ladadia idia atoa gaudia danu ia hegeregere lasi.

Danu, idia laloa hisiu edia laini ese ta ena kara bona hereva ia hahedinaraia. To unai be momokani lasi, badina dina tamona dekenai idia vara taudia edia kara be hegeregere lasi; ta ena vara dinana ese ena kara ia hahedinaraia lasi. Hisiu stadilaia babalau taudia be ta ena kara korikorina idia diba lasi, to ena hereva bona kara amo idia laloa unai tauna ena kara be unai bamona. To unai be ta ena mauri o kara biagua karana, ani?

VAIRA NEGA GWAURAIA BABALAU TAUDIA

Idaunegai amo ema bona hari, taunimanima be vaira nega idia gwauraia babalau taudia dekenai heduru idia tahua. Unai bamona babalau taudia haida be animal bona taunimanima edia tauanina lalonai ia noho kahana ta ta eiava kokoroku ese ena aniani ia ania dalana idia stadilaia bona vaira nega idia gwauraia. Haida be kapusi ai ti eiava kofi ena momoru idia itaia karana amo ta dekenai do ia vara gauna idia gwauraia. Vaira nega stadilaia babalau taudia be hari, tarot kadi, cristol bolo, nadi maragidia bona gau ma haida idia gaukaralaia ta ena vaira nega idia gwauraia totona. Vaira negana dibaia totona, vaira nega idia gwauraia babalau taudia edia heduru ita tahua be maoro, a? Lasi! Ena badina mani ita itaia.

Vaira nega idia gwauraia babalau taudia ese hanaihanai idia karaia gaudia mani ita herevalaia. Idia gwauraia herevadia bona gaukaralaia gaudia be idia ta ta sibona idia hakoikoia danu. Herevana, dala tamona idia gaukaralaia to idia gwauraia gauna be ia idau diba. Hegeregere, bema tau ta be ena vaira nega dibaia totona, vaira nega gwauraia babalau taudia rua dekenai henanadai tamona ia gaukaralaia, bona idia be kadi tamona idia gaukaralaia iena henanadai idia haerelaia totona. To iena henanadai idia haerelaia neganai, edia haere be idauidau.

Hari, taunimanima be vaira nega idia gwauraia babalau taudia edia lalohadai bona idia gaukaralaia gaudia dekenai idia daradara. Haida idia gwau, vaira nega gwauraia babalau taudia be ta idia nanadaia neganai ena haere bona hereva do idia stadilaia namonamo, bena unai murinai sibodia edia lalohadai do idia gwauraia. Unai tauna be ia diba lasi, to ena haere amo vaira nega gwauraia babalau tauna be ena vaira nega ia dibaia bona ia gwauraia hedinarai. Babalau taudia be koikoi dalanai taunimanima edia lalona idia veria bona moni bada idia abia.

BAIBEL BE DAHAKA IA GWAU

Hisiu stadilaia babalau taudia bona vaira nega gwauraia babalau taudia edia lalohadai dainai taunimanima idia laloa edia mauri be ta ese ia biagua noho. To unai lalohadai be maoro, a? Baibel ese ia hahedinaraia ita be mai iseda ura kwalimu, unai amo ita ura karaia o abia dae gaudia ita abia hidi diba, bona ita karaia abia hidi ese iseda vaira nega maurina ia haidaua diba.​—Iosua 24:15.

Dirava idia tomadiho henia taudia ese babalau karadia idauidau idia dadaraia momokani be namo​—babalau, meamea bona puripuri karadia idauidau ibounai be Dirava ese ia inai henia momokani. Baibel ia gwau: “Umui ese . . . meamea kara do umui karaia lasi, puripuri bona vada danu do umui karaia lasi. Puripuri gaudia danu do umui gaukaralaia lasi, bona mase taudia edia laumadia dekenai do umui nanadaia lasi, bona idia danu do umui herevahereva lasi. [“Iehova,” NWT]a emui Dirava ese unai bamona kara bodaga idia karaia taudia ia badu henia noho.”​—Deuteronomi 18:10-12.