Emu Baibel Stadilaia Karana Oi Hanamoa Bona Moalelaia Dalana

IOSUA be maduna badana ia abia. Ia ese Israela taudia be Gwauhamata Tanona dekenai do ia hakaudia vareai, to hekwakwanai badadia haida do ia davaria danu. To, Iehova be ia dekenai ia gwauhamata, kwalimu do ia henia, bona do ia hagoadaia. Dirava ia gwau: ‘Do oi boga-auka bona goada. Bona egu Taravatu do oi badinaia. Dina bona hanuaboi do oi duahia, unai amo idia torea herevadia ibounai do oi badinaia namonamo diba. Vadaeni do oi kwalimu bona mai aonega ida do oi kara.’—Ios. 1:7, 8 NWT.

Inai “nega aukadia” lalonai, ita danu be hekwakwanai badadia ita davaria noho. (2 Tim. 3:1) Unai hegeregerena, ita kwalimu diba bema Iehova ese Iosua dekenai ia henia sisiba ita badinaia. Namona be hanaihanai Baibel ita duahia, bona hahetoho negadiai unai hakaua herevadia ita badinaia.

Nega haida ita hekwarahi iseda stadi karana ita moalelaia totona. To, Baibel stadilaia karana be mai anina bada, unai dainai emu stadi do oi hanamoa bona moalelaia daladia haida oi dibaia totona maua ladana “Emu Stadi Oi Karaia Neganai Inai Dala Oi Tohoa” oi itaia.

Salamo torea tauna ena ane ai, ia gwau: “Oiemu oda hereva edia dala dekenai lau do oi hakaua lao, badina be unai dala dekenai moale lau davaria noho.” (Sal. 119:35) Oi danu be Dirava ena Hereva oi tahua karana do oi moalelaia bada. Bema Baibel oi stadilaia namonamo, mai anina bada herevadia oi davaria diba.

Ena be bese ta do oi hakaua lasi, Iosua ia karaia bamona, to hekwakwanai oi davaria diba. Unai dainai, Iosua hegeregerena, Dirava ena Hereva oi stadilaia bona tahua namonamo. Unai bamona oi karaia neganai, do oi kwalimu bona mai aonega ida do oi kara.

EMU STADI OI KARAIA NEGANAI INAI DALA OI TOHOA

Stadi totona oi guriguri guna. Baibel lalonai, Siahu Ibounai Diravana ena lalohadai ia noho, bona ia be mai ena namo. Unai dainai Baibel oi duahia neganai, namona be Dirava ena heduru oi tahua bona oi duahia gauna oi lalopararalaia, laloatao, bona emu mauri ai oi badinaia.—Esr. 7:10.
Oi sibona dekenai henanadai oi henia. Baibel o Baibel bukadia oi duahia neganai, unai dala oi badinaia diba: ‘Inai kahana amo Iehova dekenai dahaka lau dibaia? Edena dala ai Baibel ena hereva badana ia hahedinaraia? Edena dala ai inai hereva do lau gaukaralaidia haida lau durua totona?’
Oi stadilaia gaudia oi laloa dobu. Nega sisina lalonai emu duahiduahi oi hadokoa bona oi duahia gauna oi lalohadailaia: ‘Lau dekenai dahaka hemami ia henia? Dahaka dainai unai bamona lau mamia? Edena dala ai unai ese egu mauri gunana, hari ena mauri dalana bona vaira nega ai do idia vara gaudia ia hahedinaraia. Edena dala ai egu mauri lalonai inai Baibel ena hakaua herevadia bona sisiba lau badinaia diba?’ (Iobu 23:5; Sal. 49:3) Emu stadi lalonai, inai oi laloa; Dahaka dainai Iehova ese ena taunimanima ia hadibaia kara dikadia idia dadaraia totona o bema ena hereva idia kamonai lasi, dahaka dika do idia davaria.—Deu. 32:28, 29.
Emu lalona ena matana oi gaukaralaia. Sivarai ta oi duahia neganai namona be emu lalona ena matana oi gaukaralaia. Hegeregere, Iosepa ena tadikakadia ese Isamaela ena bese taudia dekenai ia idia hoihoilaia karana mani oi piksaia. (Gen. 37:18-28) Dahaka gaudia oi itaia, dahaka regerege oi kamonai bona dahaka gaudia edia bonana oi bonaia? Unai sivarai lalonai oi sibona oi atoa. Dahaka lalohadai idia abia bona edia hemami be edena bamona? Unai bamona lalohadai ese oi ia durua oi stadilaia gaudia oi lalopararalaia bona anina namona do ia havaraia.
Stadi tulu idauidau oi gaukaralaia emu tahua gaukarana oi hanamoa totona. Emu gado ai idia hahanaia tulu idauidau, intanet ai bona buka bona magasin idauidau gaukaralaia dalana oi manadalaia. Unai tulu idauidau gaukaralaia daladia dibaia totona haida oi nanadaia, oi gari lasi. Hegeregere, Watch Tower Publications Index o Iehova Ena Witnes Taudia Edia Stadi Indeks, ese oi do idia durua topik idauidau bona Baibel siri momo edia anina oi dibaia totona. Danu, bema (New World Translation of the Holy Scriptures) Baibel matamatana be emu gado ai idia hahanaia vadaeni, ena apendiks oi gaukaralaia be namo. Unai stadi tulu ese mai anina bada gaudia hegeregere, Baibel tanodia edia sivarai, nega duahia dalana, kohu edia metau hahegeregerea dalana, bona gau ma haida ia herevalaia.
Dokonai point badadia riviulaia. Unai ese oi do ia durua hari oi stadilaia gaudia oi laloatao totona. Bona ma haida dekenai oi herevalaia danu. Emu haroro ai unai point oi gaukaralaia diba, a? Unai dala amo oi stadilaia gaudia do oi laloatao sibona lasi, to do oi gaukaralaia haida oi durua totona.