Inai Oi Diba, A?

Edena dala ai hahediba tauna Stefano be dagedage negadiai ia gari lasi?

STEFANO be dagedage taudia haida edia vairanai ia gini. Idia be Sanhedrin taudia, Israela ena kota badana lalonai idia noho. Unai tatau 71 be Israela ai siahu bada bona hahemaoro taudia. Idia ibounai be Hahelaga Tauna Badana Kaiapa, hua haida gunanai Iesu idia hamasea totona ena kota ia naria tauna, ese ia haboudia. (Mat. 26:57, 59; Kara 6:8-12) Samania koikoi taudia ese edia hereva koikoidia idia gwauraia neganai, idia hoa badina idia itaia Stefano “ena vairana be aneru ta ena vairana bamona.”​—Kara 6:13-15.

Dahaka dainai Stefano be unai dagedage negana lalonai ia gari lasi? Sanhedrin taudia dekenai idia do abia lao lasi neganai, Stefano be Dirava ena lauma helaga amo ia honu dainai mai lalona ibounai ida haroro gaukara ia karaia. (Kara 6:3-7) Idia hahemaoro henia noho lalonai, Dirava ena lauma helaga ese Stefano ia hagoadaia bona ia durua ia dibaia gaudia ia laloa lou totona. (Ioa. 14:16) Kara karoa 7 lalonai, Stefano be lauma helaga ena heduru amo Heberu Revarevadia ai idia torea herevadia 20 mai kahana ia laloa lou, bona mai goada ida ia gwauraia. (Ioa. 14:26) To matahanai ta amo Stefano ia itaia Iesu be Dirava ena idibana kahanai ia gini neganai, unai ese ena abidadama ia hagoadaia momokani.​—Kara 7:54-56, 59, 60.

Reana ita danu be nega ta hagaria herevadia bona dagedage do ita davaria. (Ioa. 15:20) Bema ita ura Iehova ena lauma helaga ese ita ia durua, namona be Dirava ena Hereva ita stadilaia bona haroro gaukara ita karaia hanaihanai. Unai amo dagedage lalonai do ita haheauka bona lalomaino do ita abia.​—1 Pet. 4:12-14.