INAI HENIA KARANA ITA HADOKOA DALANA

3 | Inai Henia Karana Be Emu Lalona Amo Kokia

Baibel Ena Hahediba Herevana:

“Emui lalona do umui hamatamataia karana amo emui kara do umui haidaua noho. Vadaeni umui sibona dekenai do umui hamomokania Dirava ena ura be ia namo, ia ese ia abia dae bona ia goevadae.”—ROMA 12:2.

Siri Ena Anina:

Dirava be iseda lalohadai ia laloa bada. (Ieremia 17:10) Ma haida inai henia herevadia bona karadia ita dadaraia be namo, to gau ma ta do ita karaia danu. Ma haida inai henia karana be iseda lalona bona kudouna ai ia matamaia. Unai dainai, haida inai henia karana be iseda lalohadai amo ita kokia be namo. Unai amo, iseda lalona ita “hamatamataia” bona inai henia karana do ita hadokoa.

Oi Karaia Diba Gauna:

Emu lalohadai bona hemami, tano o kopina kala idauidau taudia dekenai oi laloa namonamo. Sibona oi nanadaia: ‘Idia be edena bamona lau laloa? Lau diba gauna ta dainai, unai bamona lau lalodia, a? Eiava idia lau inai henia kava, a?’ social media, muvi, eiava inai heheni bona dagedage idia hahedinaraia moale karadia do ita dadaraia.

Dirava ena Hereva ese ita ia durua diba iseda kudouna bona lalona ai ia noho inai henia karana ita hanaia totona

Ita sibona eda lalohadai bona hemami ita tahua bona hamaoromaoroa be auka. To Dirava ena Hereva ese iseda “kudouna ai idia noho lalohadai bona ura ibounai ia tahua diba.” (Heberu 4:12) Unai dainai Baibel do ita stadilaia noho. Baibel ena hahediba herevadia be emu lalohadai ida oi hahegeregerea, bona oi hekwarahi emu lalohadai oi hamaoromaoroa totona. Dirava ena Hereva ese ita do ia durua iseda lalona bona kudouna ai idia noho “goada momokani gaudia” hegeregere, inai henia karana ita rakatania totona.—⁠2 Korinto 10:4, 5.

Mauri Sivaraina—STEPHEN

Ena Lalohadai Ia Haidaua

Stephen bona iena famili be kurokuro taudia ese idia dagedage henidia. Unai dainai, taunimanima edia maoro totona idia heai politikol oreana ta lalonai ia vareai. Daudau lasi murinai, Stephen danu be kurokuro taudia ia dagedage henidia. Stephen ia gwau: “Nega haida egu turadia ida muvi theater dekenai ai lao bona guna United States ai igui hesiai gaukara idia karaia Africa taudia idia hahisia edia muvi ai itaia. Unai dagedage laulau ai itaia dainai, theater dekenai idia noho kurokuro matamatadia ai dadabadia. Gabeai, ai lao emai strit ai idia noho kurokuro taudia ai tahua bona dadabadia.”

Stephen be Iehova ena Witnes taudia ida Baibel ia stadilaia matamaia neganai, ena lalohadai ia haidaua momokani. Ia gwau: “Egu mauri ai lau itaia bese idauidau idia inai heheni to lau hoa badina Witnes taudia be unai bamona lasi. Hegeregere, Witnes kurokuro tauna ta be gabu ta dekenai ia lao neganai, ena natudia be Witnes korema famili ta dekenai idia rakatania. Danu, mero koremana ta be noho gabuna ia tahua neganai, kurokuro famili ta ese ia idia abia dae.” Stephen ia abia dae momokani Iesu ese ia herevalaia Keristani taudia huanai do ia noho lalokau korikorina be Iehova ena Witnes taudia ese idia hahedinaraia.—⁠Ioane 13:35.

Dahaka ese Stephen ia durua ma haida inai henia karana ia rakatania totona? Ia durua sirina be Roma 12:2. Ia gwau: “Baibel stadilaia karana amo lau laloparara egu lalohadai lau haidaua be namo. Namona be taunimanima ibounai ida maino ai lau noho, bona lau abia dae momokani, inai be mauri dalana namona.” Hari lagani 40 idia hanaia vadaeni, bona Stephen be ma haida inai henia lalohadaina ia abia lasi.