Dirava Be Dahaka Do Ia Karaia?

Bema oi be hekwakwanai oi davaria, reana do oi ura tura namona ta ese oi ia durua. Haida idia gwau Dirava be edia turana lasi badina idia laloa Dirava be idia durua totona gau ta ia karaia lasi. Momokani, Dirava be iseda namo totona gau momo ia karaia vadaeni, to danu ia ese dala do ia karaia hari ita davaria hekwakwanai bona hisihisi idauidau ia haorea totona. Dirava be dahaka do ia karaia?

KARA DIKA IBOUNAI DO IA HAOREA

Dirava ese kara dika tauna do ia haorea. Baibel ese unai tauna ia herevalaia ia gwau: “Tanobada ibounai be Dika Tauna ena siahu lalonai ia noho.” (1 Ioane 5:19) Iesu ese unai “Dika Tauna” ia gwauraia “inai tanobada ena lohia,” Satani Diabolo. (Ioane 12:31) Satani ese taunimanima ia hakaua kerere dainai tanobada ai hekwakwanai momo idia vara noho. Dirava be dahaka do ia karaia?

Kahirakahira, Iehova Dirava ese ena Natuna, Iesu Keriso amo “mase ia havaraia diba tauna, Diabolo unai, ia haorea diba.” (Heberu 2:14; 1 Ioane 3:8) Momokani, Baibel ese ia hahedinaraia Diabolo ia diba “iena nega be ia kwadogi” bona kahirakahira do ia mase. (Apokalupo 12:12) Dirava ese kara dika idia karaia taudia ibounai be do ia haoredia.​—Salamo 37:9; Aonega Herevadia 2:22.

TANOBADA BE PARADAISO AI DO IA HALAOA

Iseda Havaraia Tauna ese tanobada ai kara dika ibounai ia haorea murinai, ia ese ena ura tanobada bona taunimanima totona do ia hagugurua. Dahaka hahenamo haida do ita abia?

Maino bona noho namo. “Manau taudia ese noho gabuna tano do idia abia, do idia helai namonamo, mai moale bona mai maino danu.”​—Salamo 37:11.

Aniani be momo. “Koni momo herea, be tano dekenai do ia vara namonamo. Namona be ororo gabudia danu dekenai, uiti bona aniani avadia do idia tubu namonamo.”​—Salamo 72:16.

Ruma bona gaukara namodia. “Idia ese edia ruma do idia haginia, bona unai ruma lalonai do idia noho. Idau taudia ese edia ruma do idia abia lasi. Bona idia ese vain umadia do idia hadoa, vadaeni vain ena anina, uaina do idia inua. . . . Lauegu abia hidi taudia ese, edia imana gaukara dekenai idia karaia gaudia do idia moalelaia.”​—Isaia 65:21, 22.

Oi ura unai hahenamo oi moalelaia, a? Kahirakahira ita ibounai ese unai gaudia be dina ta ta ai do ita moalelaia.

GORERE BONA MASE DO IA HAOREA

Hari inai negai, taunimanima idia gorere bona idia mase, to vaira negai unai do ia vara lasi. Dirava ese kahirakahira Iesu ena mauri davalaia boubouna amo hahenamo do ia havaraia, unai amo “ia idia abidadama henia taudia ibounai be do idia mase lasi, to mauri hanaihanai do idia abia.” (Ioane 3:16) Unai ese dahaka hahenamo do ia havaraia?

Gorere be do ia ore. “Siona dekenai idia noho taudia ta ese do ia gwau lasi, ‘Lau be gorere,’ bona Lohiabada ese edia kara dika ibounai do ia gwauatao.”​—Isaia 33:24.

Mase be do ia ore. “Ia ese danu mase do ia haorea momokani ela bona hanaihanai. Siahu Ibounai Lohiabada danu ese tai ena ranu be taunimanima ibounai edia matadia dekena amo do ia dahua ore.”​—Isaia 25:8.

Taunimanima be do idia mauri hanaihanai. “Dirava ese Keriso Iesu iseda Lohiabada amo ia henia harihari gauna be mauri hanaihanai.”​—Roma 6:23.

Mase taudia do idia toreisi lou. “Kara maoromaoro taudia bona kara maoromaoro lasi taudia be do idia toreisi lou.” (Kara 24:15) Mase taudia ese Dirava ena harihari gauna, mauri davalaia boubouna amo namo do idia abia.

Edena dala ai Dirava ese unai gaudia ibounai ia hagugurua diba?

GAVAMANI GOEVADAENA TA DO IA HAGINIA

Dirava ese guba gavamanina ta amo ena ura taunimanima bona tanobada totona do ia hagugurua, bona unai gavamani be Iesu Keriso ese do ia Lohiaia. (Salamo 110:1, 2) Iesu ese ena murinai idia raka taudia ia hamaoroa unai gavamani o basileia totona do idia guriguri: “Aiemai Tamana guba dekenai oi noho, . . . Oiemu Basileia do ia mai.”​—Mataio 6:9, 10.

Dirava ena Basileia be tanobada ibounai do ia lohiaia bona hisihisi ibounai do ia haorea. Inai Basileia be taunimanima do ia durua gavamani hereana! Unai dainai Iesu be tanobada ai “Basileia ena sivarai namona” ia harorolaia goadagoada bona ena hahediba taudia ia hadibaia unai bamona idia karaia danu.​—Mataio 4:23; 24:14.

Iehova Dirava be taunimanima ia lalokau henidia bada dainai, ia gwauhamata idia totona unai gau namodia ibounai do ia karaia. Unai ese oi ia durua ia oi dibaia bona ia kahirakahira oi lao totona, a? Bema unai bamona oi karaia, edena dala ai namo oi davaria diba? Atikol ma ta ese unai do ia herevalaia.