Dirava Ese Dahaka Ia Karaia?

Bema oi ura ta oi dibaia namonamo, namona be ia karaia vadaeni gaudia bona ia hanaia hekwakwanai idauidau oi diba. Unai hegeregerena, bema oi ura Dirava oi dibaia namonamo, namona be ia karaia vadaeni gaudia oi diba. Unai bamona oi karaia neganai, do oi diba Dirava ese idaunegai ia karaia gaudia ese hari ita idia durua, bona vaira negana ai hahenamo do ita abia.

DIRAVA BE ISEDA NAMO TOTONA GAU IBOUNAI IA KARAIA

Iehova Dirava be Havaraia Tauna Badana, bona “gau ibounai ia havaraia negana amo ema bona hari, taunimanima ese iena siahu bona iena kara idauidau idia lalopararalaia diba. Bona ia karaia gaudia amo unai idia lalopararalaia.” (Roma 1:20) “[Iehova] ese iena siahu dekena amo, tanobada ia karaia. Iena aonega dekena amo, tanobada ena kahana ibounai ia haginia, bona guba ibounai danu [Iehova] ese ia karaia.” (Ieremia 10:12) Dirava ia havaraia gaudia edia hairai ese idia hahedinaraia ita ia laloa bada.

Mani oi laloa, iseda mauri be idau momokani badina Iehova ese ita be “ena toana” hegeregerena ia karaia. (Genese 1:27) Unai ena anina be dala ma haida ai ena kara namodia ita hahedinaraia diba. Ia ese ita dekenai diba ia henia, unai amo ena lalohadai bona ena ura ita lalopararalaia totona. Unai bamona ita karaia neganai iseda mauri do ita moalelaia. Mai anina bada gauna be, Iehova ese dala ia kehoa ia ita tura henia totona.

Dirava ese tanobada ai ia karaia gaudia amo iena lalokau ita dekenai ia hahedinaraia. Aposetolo Paulo ia gwau, Dirava be “gau namodia ia karaia dainai, [ita] dekenai ia hahedinaraia ia be daika. [Ita] dekenai medu bona aniani momo negadia ia henia, vadaeni aniani momo [ita] abia bona [iseda] kudouna ia hamoalea.” (Kara 14:17) Dirava ese gau momo ia henia iseda mauri do ita moalelaia totona. Unai sibona lasi, to ia ura gau ma haida ia henia danu.

Iehova ese tanobada ia karaia badina ia ura taunimanima ese do idia noholaia ela bona hanaihanai. Baibel ia gwau: “Tanobada be [Iehova] ese taunimanima dekenai ia henia,” ia ese “tano do ia noho kava totona ia karaia lasi, to tano mai anina namona, taunimanima idia noholaia diba gabuna, ia karaia.” (Salamo 115:16; Isaia 45:18) Daidia ese do idia noholaia, bona ena daudau be edena bamona? Baibel ia gwau: “Kara maoromaoro taudia ese, Dirava ia henidia tano dekenai do idia noho ela bona hanaihanai.”​—Salamo 37:29.

Unai hegeregerena, Iehova ese tau bona hahine ginigunana, Adamu bona Heva, ia karaia, bona tanobada paradaisona ai idia ia atoa, do idia “naria totona.” (Genese 2:8, 15) Dirava ese gaukara rua ia henidia, ia gwau: “Emui bese do umui havaraia, do umui momo herea. Tanobada ena gabu ibounai dekenai do umui noho, bona unai tano do umui biagua.” (Genese 1:28) Unai dainai Adamu bona Heva be tanobada ai mauri hanaihanai do idia moalelaia diba. To madi, idia ese Dirava idia gwau-edeede henia dainai “kara maoromaoro taudia” bona tanobada “dekenai do idia noho ela bona hanaihanai” ena hahenamo idia haboioa. To do ita itaia, edia kara ese Iehova ena ura ita totona bona tanobada dekenai ia haidaua lasi. Ginigunana, mani Dirava ese ia karaia gauna ta ita laloa.

DIRAVA ESE BAIBEL IA HENIA

Baibel be Dirava ena Hereva. Dahaka dainai Iehova ese ita dekenai Baibel ia henia? Badina ia ura Ia ita dibaia. (Aonega Herevadia 2:1-5) Momokani, Baibel ese Dirava totona ita laloa henanadai ibounai ia haerelaia lasi​—buka ta ese unai ia haerelaia diba lasi. (Hadibaia Tauna 3:11) To, Baibel ese ita ia durua Dirava ita dibaia totona. Dirava ese taunimanima ia kara henia dalana amo ia ita diba. Ia ese ia ura henia taudia bona ia ura henia lasi taudia ita diba. (Salamo 15:1-5) Ita ese iena lalohadai tomadiho, kara maoromaoro, bona kohu dekenai ita dibaia. Bona Baibel ia hahedinaraia, Iehova ena kara be ena Natuna, Iesu Keriso ese ena hereva bona kara amo ia hahedinaraia goevagoeva.​—Ioane 14:9.

Iehova ese ena Hereva, Baibel ia henia ena badina ma ta be ia ura mauri namona moalelaia dalana do ita dibaia. Iehova ese Baibel amo ita ia durua, ruma bese maurina ita moalelaia, kohu momo lasi maurina ita noholaia, bona lalohisihisi ita haheaukalaia totona. Inai magasin ena atikol ma ta ese ia hahedinaraia Baibel ese mauri ai mai anina bada henanadaidia ia haerelaia hegeregere: Dahaka dainai hisihisi momo idia vara noho? Vaira negai dahaka do ia vara? Danu ia hahedinaraia Dirava ese dahaka ia karaia ena ura ia hagugurua totona.

Baibel be buka idauna momokani, badina ia be Dirava sibona ese ia havaraia. Baibel be lagani 1,600 gunanai taunimanima 40 bamona ese idia torea, to ena hereva badana be tamona, badina Baibel be Dirava amo. (2 Timoteo 3:16) Idaunegai idia torea bukadia haida bamona lasi, ia be lagani momo lalonai idia gimaia namonamo, bona idaunegai Baibel manuskrip momo ese unai idia hahedinaraia. Danu, ena be Baibel idia ura koua toho, to momo ese Baibel idia hahanaia, idia hariharilaia bona idia duahia. Hari, Baibel be gabu ibounai dekenai idia hahanaia bona idia hariharilaia noho. Baibel ia noho karana ese ia hahedinaraia “Dirava ena hereva, be do ia gini noho ela bona hanaihanai.”​—Isaia 40:8.

DIRAVA ESE ENA URA IA GWAUHAMATALAIA VADAENI

Oibe iena ura gauna ia gwauhamatalaia ita totona be do ia hagugurua. Matamanai ita herevalaia bamona, Dirava ena palani be taunimanima ese tanobada do idia noholaia ela bona hanaihanai. To, Adamu ese Dirava ia gwau-edeede henia bona ia kara dika neganai, mauri hanaihanai ena hahenamo, ia bona ena natudia totona ia haboioa. “Tau tamona dekena amo kara dika be tanobada dekenai ia vareai, bona kara dika ese mase ia mailaia. Bona unai dainai mase be taunimanima ibounai dekenai ia hanaia lao, badina idia ibounai be idia kara dika vadaeni.” (Roma 5:12) Adamu ese Dirava ia gwau-edeede henia dainai toana be Dirava ese ena ura tanobada totona do ia hagugurua lasi. Iehova be dahaka ia karaia?

Iehova be ena kara badadia hegeregerena ia kara. Ia ese Adamu bona Heva edia kara davana ia henia, to lalokau dainai dala ia karaia edia natudia totona. Iehova be mai aonega ida unai hekwakwanai hamaoroamaoroa dalana ia laloa, bona maoromaoro haere ia henia. (Genese 3:15) Kara dika bona mase amo do ita roho mauri dalana tamona be Dirava ena Natuna, Iesu Keriso amo. Unai ia vara totona Iesu be dahaka ia karaia?

Adamu ena gwau-edeede karana dainai dika idia davaria taudia hamauria totona, Iehova ese Iesu ia siaia tanobada dekenai mauri ena dala be taunimanima ia hadibaia bona “ena mauri ia henia, taunimanima momo edia mauri davana karaia totona.”a (Mataio 20:28; Ioane 14:6) Iesu sibona be mauri davana ia karaia diba badina ia be goevadae tauna Adamu hegeregerena. To Iesu be Adamu bamona lasi, ia be kamonai karana ia hahedinaraia ela bona ia mase. Iesu be kara dika ta ia karaia lasi bona ia mase dainai, Iehova ese ia hatoreaisi lou bona guba maurina ia abia. Iesu be hari Adamu ese ia karaia diba lasi gauna​—mauri hanaihanai ena helaro be kamonai taudia dekenai ia henia lou. “Tau tamona ena gwau-edeede karana dainai, taunimanima momo be kara dika taudia ai idia lao. Unai hegeregerena, tau tamona ena kamonai karana dainai, taunimanima momo be kara maoromaoro taudia ai do idia lao.” (Roma 5:19) Iesu ena mauri davalaia boubouna amo, Dirava ese ena gwauhamata do ia hagugurua, taunimanima be paradaiso ai do idia noho ela bona hanaihanai.

Iehova ese Adamu ena gwau-edeede karana dainai idia vara hekwakwanai ia hamaoromaoroa dalana amo ena kara ita dibaia. Ita itaia gau ta ese Iehova do ia koua diba lasi ena ura gauna do ia hagugurua totona; ia gwauraia herevana be “do ia karaia momokani.” (Isaia 55:11) Danu ita diba Iehova be ita ia lalokau henia bada. “Dirava ena lalokau ita dekenai be inai dala ai ia hahedinaraia, Dirava ese ena Natuna korikorina be tanobada dekenai ia siaia mai, ia amo mauri do ita abia totona. Lalokau ena anina be inai, ita ese Dirava ita lalokau henia dainai lasi, to ia ese ita ia lalokau henia bona ena Natuna ia siaia iseda kara dika ia koua boubouna ia henia totona, unai amo ita bona Dirava huanai maino ia karaia.”​—1 Ioane 4:9, 10.

Dirava “ese ena Natuna be hisihisi amo ia koua lasi, to ita ibounai totona ia henia,” unai dainai ita abia dae Dirava be ‘mai moale ida ma gau ibounai be ita dekenai do ia henia danu.’ (Roma 8:32) Dirava be ita totona dahaka ia gwauhamatalaia? Mani murina atikol oi duahia.