Tomadiho ta Idia Badinaia Lasi Taudia Haroro Henia Dalana

1. Lagani momo gunanai tano haida ai dahaka ia vara?

LAGANI tausen momo lalonai, tanobada hegegemadai ai taunimanima momo be tomadiho idauidau idia badinaia. To, lagani momo murinai, gau momo idia idau. Taunimanima momo be sibodia idia gwauraia idia be tomadiho ta idia badinaia lasi taudia. Momokani, hari inai negai tano haida dekenai taunimanima be dubu idia lao lasi.b​—⁠Mat. 24:12.

2. Dahaka badina haida dainai taunimanima momo be tomadiho ta idia badinaia lasi?

² Dahaka dainai tomadiho ta idia badinaia lasi taudia edia namba be ia bada ia lao noho?c Haida be moale karadia idia laloa bada eiava edia hekwakwanai idia lalohekwarahilaia. (Luka 8:14) Idia haida be guna tomadiho ta idia badinaia to hari idia gwau Dirava ia noho lasi. Taunimanima ma haida be idia diba Dirava ia noho, to idia laloa tomadiho be idaunegai idia karaia karana ta, ia be anina lasi bona saiens ida ia hegeregere lasi. Idia kamonai edia turadia, tisa taudia, eiava nius halasia oreadia idia gwau mauri be evolution amo ia matamaia, to Dirava idia abia dae lasi ena badina be idia amo idia do kamonai lasi. Ma haida be tomadiho gunalaia taudia idia ura henidia lasi badina moni idia mataganigani henia bona dagi idia laloa bada. Tano haida ai gavamani ese tomadiho karadia idia taravatua.

3. Inai stadi atikol ese ita do ia durua dahaka ita karaia totona?

³ Iesu ese ita ia hadibaia do ita lao ‘bese ibounai taudia be hahediba taudia ai ita halaoa.’ (Mat. 28:19) Edena dala ai tomadiho ta idia badinaia lasi taudia ita durua Dirava idia lalokau henia bona Keriso ena hahediba taudia ai idia lao totona? Gau ginigunana be, ta ese sivarai namona ia abia dae eiava lasi ena badina ita lalopararalaia be namo. Hegeregere, Europe taudia ita haroro henia neganai reana sivarai namona do idia kamonai eiava lasi, Asia taudia ese sivarai namona idia abia dae dalana danu be ia idau. Dahaka dainai? Badina Europe ai, taunimanima momo be Baibel ena hereva haida idia diba bona idia abia dae Dirava ese gau ibounai ia havaraia. To Asia ai, taunimanima momo be Baibel ena hereva haida sibona idia diba bona idia gwau reana Havaraia Tauna ia noho lasi. Inai stadi atikol ese ita do ia durua iseda teritori ai ita davaria taudia ita haroro henidia totona ena be tomadiho ta idia badinaia eiava lasi.

HARORO GAUKARA KARAIA NOHO

4. Dahaka dainai taunimanima idauidau ita haroro henidia noho?

⁴ Ita Haroro Noho. Lagani ta ta ai, tomadiho ta idia badinaia lasi taudia be Iehova ena Witnes taudia ai idia lao. Idia momo be kara maoromaoro taravatudia idia diba bona tomadiho idauidau edia kara koikoidia idia ura henia lasi. Idia haida be kara maoromaoro taravatudia idia diba lasi bona idia hekwarahi edia kara dikadia idia rakatania totona. Iehova ena heduru dainai, ita diba momokani “mauri hanaihanai idia ura kudou-maoro taudia” do ita davaria.​—Kara 13:48; 1 Tim. 2:3, 4.

5. Nega momo dahaka ita karaia dainai taunimanima be iseda haroro herevana do idia abia dae?

⁵ Mai Hebogahisi Bona Aonega ida Ita Hereva. Nega momo sivarai namona ita harorolaia neganai, taunimanima be ita gwauraia herevadia idia laloa bada lasi to ita gwauraia dalana idia laloa bada. Do idia moale bema mai hebogahisi bona aonega ida idia ita hereva henia bona ita hahedinaraia idia ita laloa bada. Idia ita doria lasi ita harorolaia herevadia idia kamonai totona. To, tomadiho dekenai edia lalohadai idia gwauraia neganai, unai ita lalopararalaia be namo. Hegeregere, ita diba haida be idia ura lasi idia diba lasi taudia ida tomadiho idia herevalaia. Dirava dibaia totona haida ita nanadaia neganai, idia laloa unai be hemataurai lasi karana. Ma haida be idia hemarai badina taunimanima vairanai eiava Iehova ena Witnes tauna ta ida Baibel idia duahia. Herevana daika oi haroro henia, namona be oi hereva henia tauna ena hemami oi laloa.​—2 Tim. 2:24.

6. Edena dala ai aposetolo Paulo be haroro dala idauidau ia badinaia, bona edena dala ai ena haheitalai ita tohotohoa diba?

⁶ Bema inai bamona hereva, hegeregere “Baibel,” “havaraia gaudia,” “Dirava,” eiava “tomadiho” ita gwauraia bona ta ia kamonai lasi, dahaka do ita karaia? Aposetolo Paulo bamona iseda haroro daladia ita haidaua diba. Paulo be Iuda taudia ia hereva henia neganai Toretore Helagadia ia herevalaia namonamo. Edena dala ai Paulo ena haheitalai ita tohotohoa diba? Bema Baibel ena hereva ia abia dae lasi tauna ita hereva henia, namo lasi Baibel ita gaukaralaia. Bema oi itaia taunimanima vairanai ta be ia hemarai Baibel ia duahia totona, reana ia dekenai emu tablet eiava fon amo Baibel siridia oi hahedinaraia.

7. Korinto Ginigunana 9:20-23 ena hereva bamona, Paulo ena haheitalai ita tohotohoa totona dahaka ita karaia be namo?

⁷ Oi Laloparara Bona Oi Kamonai. Namona be ita laloparara dahaka dainai taunimanima be unai bamona lalohadai idauidau idia abia. (Aon. 20:5) Mani Paulo ena haheitalai ita laloa lou. Ia be Iuda tauna. Ia be Idau Bese taudia ia haroro henidia neganai ena haroro dalana ia haidaua badina idia be Iehova bona Toretore Helagadia idia diba lasi. Reana tahua gaukara haida do ita karaia eiava unai bamona haroro daladia idia diba namonamo tadikaka taihu edia heduru ita abia, unai amo iseda teritori ai idia noho taudia edia lalohadai do ita lalopararalaia bona kamonai.​—1 Korinto 9:20-23 duahia.

8. Edena dala ta amo iseda herevahereva ita hamatamaia bona Baibel ita herevalaia diba?

⁸ Iseda tahua gauna be “kamonai taudia” ita tahua. (Mat. 10:11) Unai ita karaia totona, taunimanima ita hagoadaia edia lalohadai idia gwauraia totona. England ai ia noho tadikaka ta be taunimanima idauidau edia lalohadai ia diba totona, idia dekenai do ia gwau: Headava oi moalelaia totona dahaka oi karaia diba, edena dala ai emu natudia do oi hadibaia, eiava dahaka do oi karaia kara gageva oi haheaukalaia totona. Taunimanima edia lalohadai ia kamonai murinai do ia gwau: “Lagani 2,000 gunanai idia torea sisiba hereva namona be edena bamona oi laloa?” Bena ia be “Baibel” ia gwauraia lasi, to ena fon amo siri ia hahedinaraia bona ia duahia.

TAUNIMANIMA DURUA IDIA LALOPARARA TOTONA

9. Dirava idia ura lasi herevalaia taudia be edena dala ai ita durudia diba?

⁹ Taunimanima haida be idia ura lasi idia dekenai Dirava ita herevalaia. To bema edia mauri ai idia dibaia gaudia be idia dekenai ita herevalaia, reana do idia kamonai. Hegeregere, taunimanima momo be mauri bona tubutubu gaudia idia itaia neganai idia hoa. Unai dainai, reana inai bamona do oi gwau: “Oi diba saiens taudia ese mauri bona tubutubu gaudia idia itaia bona stadilaia murinai gau matamatadia momo idia karaia. Hegeregere, saiens taudia be taunimanima edia taiana idia itaia bona stadilaia murinai, microphone idia karaia bona danu camera idia karaia totona matana idia stadilaia. Mauri bona tubutubu gaudia oi itaia neganai dahaka oi laloa? Oi laloa idia be siahu ta amo idia vara, taunimanima ese ia havaraia, eiava gau ta ese ia karaia?” Edia lalohadai ita kamonai namonamo murinai, ita gwau: “Microphone bona camera idia karaia taudia be daika amo unai gaudia karaia dalana idia dibaia. Ane ia torea tauna ta ena hereva lau ura henia, ia gwau: ‘Taiana ia karaia Tauna, be ia kamonai diba lasi, a? Matana ia karaia Tauna be, ia itaia diba lasi, a? . . . Ia “be taunimanima ibounai edia hadibaia Tauna.” Saiens taudia haida be unai hereva idia abia dae.’” (Sal. 94:9, 10) Bena ia dekenai jw.org^® ai ia noho kahana ladana “Interviews and Experiences” ai vidio ladana “Viewpoints on the Origin of Life” hahedinaraia. (Oi lao PUBLICATIONS > VIDEOS.) Eiava buklet ladana Was Life Created? eiava buklet ladana The Origin of Life​—Five Questions Worth Asking oi henia.

10. Edena dala ai ia ura lasi Dirava ia herevalaia tauna ida iseda herevahereva ita hamatamaia diba?

¹⁰ Taunimanima momo idia ura vaira nega ai mauri namona idia moalelaia. To, momo be idia gari badina tanobada be do idia hadikaia bona taunimanima ese idia noholaia diba lasi. Norway ai sekit naria gaukara ia karaia tadikaka ta ia gwau, idia ura lasi Dirava idia herevalaia taudia be nega momo idia ura hari inai negai tanobada ai idia vara gaudia idia herevalaia. Mai hemataurai ida ia hereva henia tauna ia halou henia murinai, ia gwau: “Vaira nega ena noho namona be edena bamona oi laloa? Dahaka oi laloa, vaira nega namona be politikol taudia, saiens taudia, eiava tau ta ese ia havaraia diba?” Ia hereva henia tauna ena haere lau kamonai namonamo murinai, vaira nega namona ia herevalaia Baibel siri ta ia duahia eiava ia herevalaia sibona. Haida be Baibel ena gwauhamata​—tanobada be do ia dika lasi bona kara namo idia karaia taudia be do idia noho hanaihanai herevana​—⁠idia moalelaia.​—Sal. 37:29; Had. 1:4.

11. Dahaka dainai dala idauidau ai iseda herevahereva ita hamatamaia, bona edena dala ai Roma 1:14-16 ai Paulo ena haheitalai ita tohotohoa diba?

¹¹ Ita ura taunimanima hereva henia dala idauidau ita gaukaralaia. Dahaka dainai? Badina taunimanima ta ta edia noho daladia be idauidau. Ta ia ura henia gaudia be ma ta amo ia idau. Haida be idia ura Dirava eiava Baibel idia herevalaia, to ma haida be gau ma haida idia herevalaia guna bena gabeai Dirava eiava Baibel idia herevalaia. Herevana taunimanima edia lalohadai be idauidau, namona be dala ita tahua noho mauri dala idauidau taudia ita haroro henia totona. (Roma 1:14-16 duahia.) Namona be ita laloatao danu, hereva momokani idia ura bada kudou-maoro taudia be Iehova ese do ia durua.​—1 Kor. 3:6, 7.

ASIA TAUDIA DEKENAI HEREVA MOMOKANI HAROROLAIA

12. Asia taudia be Dirava ia noho lasi lalohadaina idia abia dainai, edena dala ai idia ita durua diba?

¹² Tanobada hegegemadai ai, haroro gaukara lalonai pablisa taudia momo be Asia taudia idia davaria. Hegeregere, gabu haida ai gavamani ese tomadiho karadia idia taravatua. Asia ena tano haida ai, taunimanima momo be Dirava ia noho lasi lalohadaina idia abia. Edia hadibaia karana lalonai Havaraia Tauna ia noho lalohadaina idia herevalaia diba lasi. Haida be idia ura diba namonamo dainai Baibel stadi idia abia dae, to ma haida be idia ura lasi gau matamatadia idia dibaia. Edena dala ai idia ita durua diba? Unai bamona taudia haroro henia daladia idia diba namonamo pablisa be gau ma haida idia herevalaia guna bena Baibel eiava Dirava idia herevalaia. Idia hereva henia tauna idia laloa bada, bona bema ia hegeregere Baibel ena hakaua herevana ese ena mauri ia durua dalana ia herevalaia.

13. Edena dala ai taunimanima dekenai Baibel ita herevalaia? (Rau 1 ai ia noho laulau itaia.)

¹³ Taunimanima momo be Baibel ena aonega herevadia idia laloa bada. (Had. 7:12) New York ai, Mandarin gado idia herevalaia taudia ia vadivadi henia taihu ta ia gwau: “Lau ura lau hahedinaraia taunimanima lau laloa bada bona edia lalohadai idia gwauraia neganai lau kamonai. Bema lau diba idia be ma tano ta amo idia mai, idia do lau nanadaia: ‘Emu noho iniseniai be edena bamona? Moni gaukara ta oi davaria vadaeni, a? Inai gabu taudia be oi idia kara namo henia, a?’” Nega haida unai bamona hamatamaia herevadia amo taihu ese Baibel ena hahediba herevana ta ia hahedinaraia diba. Reana taihu be inai henanadai do ia gwauraia: “Taunimanima ita tura henia totona dahaka ita karaia be namo? Ia namo oi dekenai Baibel ai ia noho aonega herevana ta lau hahedinaraia? Ia gwau: ‘Heai hamatamaia kara, be ranu bada gabuna ena magu makohia kara bamona. Unai dainai heai do ia vara lasi neganai, do oi raka siri.’ Oi laloa inai aonega herevana ese ita do ia durua ma haida ita tura henia totona, a?” (Aon. 17:14) Unai bamona herevahereva karana ese ita do ia durua, diba ma haida idia ura abia taudia ita dibaia totona.

14. Asia ena ist kahanai ia noho tadikaka ta ese edena dala ai Dirava idia abia dae lasi taudia ia durua?

¹⁴ To, bema ma haida be ita idia hamaoroa idia be Dirava idia abia dae lasi be edena bamona? Asia ena ist kahanai ia noho tadikaka ta be tomadiho ta idia badinaia lasi taudia ia haroro henia neganai, ia gwau: “Iniseniai, bema ta ia gwau, ‘Lau be Dirava lau abia dae lasi,’ ena hereva ena anina be ia be sene diravana ta ia tomadiho henia lasi. Unai dainai edia hereva amo lau laloparara idia gwauraia diravana be taunimanima ese idia karaia kaivakuku ta. Nega haida idia dekenai Ieremia 16:20 lau duahia, ia gwau: ‘Tau ta ese sibona ena dirava do ia karaia diba, a? Io, to idia be dirava momokani lasi.’ Bena idia dekenai inai henanadai lau henia: ‘Edena dala ai dirava korikorina bona taunimanima ese idia karaia diravana edia idau do ita diba?’ Edia lalohadai idia gwauraia neganai, lau kamonai namonamo bena idia dekenai Isaia 41:23 lau duahia, ia gwau: ‘Gabeai do idia vara karadia ai dekenai do umui hamaoroa, vadaeni unai neganai, ai be do ai diba umui be dirava momokani!’ Iehova ese vaira nega ia perovetalaia dalana lau herevalaia totona, haheitalai ta lau gaukaralaia.”

15. East Asia ai ia noho tadikaka ena ekspiriens amo dahaka ita dibaia?

¹⁵ East Asia ai ia noho tadikaka ta be lou henia ia karaia neganai inai haroro dalana ia badinaia. Ia gwau: “Idia dekenai Baibel ena aonega herevadia, idia guguru peroveta herevadia, bona iunives ia biagua taravatudia lau hahedinaraia. Bona lau gwau, unai gaudia ibounai ese idia hahedinaraia gau ibounai ia Havaraia Tauna ia noho. Lau itaia bema ta be ia abia dae Dirava be ia noho, vadaeni Baibel ese Iehova ia herevalaia dalana be ia dekenai lau hahedinaraia.”

16. Heberu 11:6 ena hereva bamona, dahaka dainai iseda Baibel stiuden ita durua Dirava idia abidadama henia bona Baibel ena hereva idia abia dae bona edena dala ai idia ita durua diba?

¹⁶ Tomadiho ta idia badinaia lasi taudia ita stadi henia neganai, namona be idia ita durua noho unai amo do idia abia dae momokani Dirava ia noho. (Heberu 11:6 duahia.) Bona idia ita durua Baibel ena hereva idia abia dae momokani totona. Idia ida ita stadi negadia ai, namona be hamomokania gaudia amo ita hahedinaraia Baibel be Dirava ena Hereva. Unai gaudia be hegeregere, Baibel ai idia noho peroveta herevadia idia guguru dalana, Baibel ese saiens bona histori ia herevalaia dalana eiava Baibel ese dina ta ta ai iseda mauri ia durua dalana ita herevalaia diba.

17. Iseda lalokau karana ese edena dala ai taunimanima do ia durua?

¹⁷ Taunimanima dekenai lalokau karana ita hahedinaraia neganai idia ita durua Keriso ena hahediba taudia ai idia lao totona, herevana idia be tomadiho ta idia badinaia noho eiava lasi. (1 Kor. 13:1) Iseda tahua gauna be ita ura idia ita hadibaia Dirava be ita ia lalokau henia bona ia ura Ia ita lalokau henia danu. Guna taunimanima tausen momo be tomadiho idia laloa maragi eiava idia laloa bada lasi, to unai bamona taudia be lagani ta ta ai bapatiso idia abia badina Dirava lalokau henia dalana idia dibaia. Unai dainai taunimanima idauidau ita haroro henidia noho bona idia dekenai ita hahedinaraia idia ita laloa bada. Edia lalohadai idia gwauraia neganai ita kamonai. Edia hemami ita lalopararalaia be namo. Emu kara bona hereva amo idia oi hadibaia noho Keriso ena hahediba taudia ai idia lao totona.