Umui Hagoadaia Heheni Noho
1 Paulo ese ita ia hamaoroa, ia gwau: “Umui ibounai be diari ena taudia.” Ita ia hereva henia goadagoada, do ita gima noho, do ita laloa namonamo noho, bona iseda tuari dabua aukadia do ita atoa hanaihanai. Badina be dahaka? Badina be “Dirava . . . [ena] ura be hahemauri do ita abia, iseda Lohiabada Iesu Keriso dekena amo. . . . Unai dainai umui ta ta dekenai goada do umui henia, bona durua umui henia.” (1 Tes. 5:5-11) Inai nega dikana be kahirakahira do ia ore haraga. Unai dainai ita hagoadaia heheni be mai ena badina namona. Edena bamona ita karaia diba?
HARORO GAUKARA KARAIA NEGANAI
2 Ita hagoadaia heheni dalana ta be inai: Tadikaka bona taihu idauidau danu ita gaukara hebou, haroro gaukara lalonai. Namona be ita ta ta ita diba heheni momokani. Haroro gaukara lalonai ita gaukara hebou neganai dala namona ita davaria ekspiriens namodia ita abia hebou totona. Danu, inai hesiai gaukara karaia totona ita heduru heheni diba. Unai dala amo ita ese iseda maduna ginigunana hegeregerena ita haroro bona taunimanima be hahediba taudia ai ita halaodia, bona iseda tadikaka ita durudia danu. (Mal. 3:16; Mat. 28:19, 20) Vadaeni, namona be dala oi tahua ma pablisa haida danu umui gaukara hebou totona, ani? Oi be guna ia danu umui gaukara hebou lasi tauna ta oi abia hidi be namo, ani?
ISEDA HAHEITALAI NAMONA AMO
3 Aposetolo Paulo ia diba iena haheitalai namona ese ena tadikaka edia lalona ia hagoadaia. (Fil. 1:12-14) Haheitalai namona be gau badadia dekenai bona gau maragidia dekenai ita hahedinaraia neganai, ita danu ese iseda tadikaka edia lalona unai bamona ita hagoadaia diba. Hegeregere, oi be hanaihanai grup danu umui hebou, haroro gaukara karaia totona, a? Oi hegaegae namonamo totona do oi henia toho bukana o magasin oi duahia vadaeni, a? Do oi gwauraidia hedinarai daladia oi laloa namonamo vadaeni, a? Unai bamona oi karaia neganai, unai be ma haida vairanai haheitalai namona oi hahedinaraia bona oi sibona emu haroro herevana oi hanamoa danu.
KAMONAI MATAMATA TAUDIA BONA MANOKA TAUDIA DURUDIA
4 Kamonai matamata taudia momo bona iseda orea taudia manokadia haida be vanegai Memorial dekenai idia mai, unai manoka taudia be guna haroro gaukara idia karaia to hari idia karaia lasi. Idia iboudiai ita durudia, hebou dekenai idia mai loulou totona be namo, badina be unai amo idia be lauma dalanai do idia goada idia lao diba.—Heb. 10:24, 25.
5 Iseda tadikaka ma haida be hua haida lalodiai haroro gaukara idia karaia lasi o hebou momo idia reaia, ani? Reana idia lalo-metau, hekwarahi idauidau idia davaria dainai, a? Unai bamona taudia ta oi boiria diba, ia be oi danu haroro gaukara umui karaia hebou totona, o umui ruaosi be Bible stadi ta dekenai umui lao totona, a? Oi be ia danu kongregesen ena gaukara ma ta lalonai umui gaukara hebou diba, a? Nega momo, bema lalo-metau tauna oi hereva henia mai emu hebogahisi danu, ia oi durua momokani diba.—Her. 25:11.
6 Namona be iseda lauma tuari dabuana ita naria namonamo bona iseda tadikaka ita durudia, idia danu be unai bamona idia karaia totona, ita ese aposetolo ena sisiba do ita badinaia, ia gwau “manoka taudia umui durua.” Danu, Iesu ena hereva ena anina be ita dekenai do ia guguru, ia gwau: “Henia kara ena moale be bada, abia kara ena moale be maragi.”—Kara 20:35.
[Questions]
1. (a) Dahaka dainai ita gima noho bona ita laloa namonamo noho be namo? (b) Dahaka dainai ita hagoadaia heheni be namo?
2. (a) Ita durua heheni dalana ta be dahaka? (b) Ita be edena bamona ita durua heheni diba, haroro gaukara lalonai ita gaukara hebou neganai?
3. (a) Haheitalai namona be gau maragidia dekenai danu ita hahedinaraia neganai, iseda kara ena anina be dahaka ma taunimanima haida dekenai? (b) Filipi 1:12-14 ese ia hahedinaraia hegeregerena, Paulo ese edena dala amo tadikaka bona taihu iboudiai ia hagoadadia?
4. (a) Daidia be hari inai negai ita durudia be mai anina bada? (b) Dahaka dainai Heberu 10:24, 25 be hari inai negai ita laloa namonamo be namo?
5. (a) Haroro gaukara idia manokalaia taudia be edena bamona ita durudia diba? (b) Hereva Lada-isidia 25:11 ese ita ia hagoadaia dahaka ita karaia totona?
6. (a) Ita ta ta ibounai be inai sisiba hereva “manoka taudia umui durua” be edena bamona ita badinaia diba? (b) Bema unai bamona ita karaia, dahaka do ita davaria?