Memero bona Kekeni Neganai Iehova Ena Lalokau Abia Dae Karana
1 Memero bona kekeni e, Iehova ena lalokau karadia umui itaia, a? Ena lalokau dainai kara haida umui karaia ia umui hamoalea totona, a? Dahaka karadia umui karaia diba, ia umui hamoalea totona?
2 Umui momo be mai emui tamana bona sinana bona umui idia lalokau henia dainai sibodia edia ura gaudia haida idia reaia, bona tauanina dalanai bona lauma dalanai umui idia naria, bona emui lalona idia hagoadaia, emui lalohadai mauri dekenai idia namo totona. Momokani, unai idia karaia be hahenamo badana Iehova ena amo. Danu, iena orea dekena amo magasin bona buka idauidau ia halasia umui memero bona kekeni totona, umui idia durua diba mauri dalanai umui raka totona bona dina ta ta edia hekwarahi umui hanaia totona. Bema umui ese unai heduru gaudia umui gaukaralaidia, vadaeni memero bona kekeni dekenai idia vara hekwakwanai badadia do umui hanaidia diba. Vadaeni, Dirava ese unai ia karaia dainai umui laloa Iehova ese umui ia lalokau henia, a?—1 Ioane 4:8, 19.
3 Iehova ese ita ibounai dekenai Bible ia henia, herevana ita be buruka taudia eiava ita be matamata taudia. Danu, ena Natuna, Iesu Keriso amo abidadama taudia iboudiai, burukadia bona matamatadia danu, edia mauri davana ia karaia. Memero bona kekeni e, Basileia ena helaro be umui abia dae; unai helaro ena anina be tanobada paradaisona do umui noholaia diba, bona unuseniai umui ese hekwakwanai do umui davaria lasi. Hari inai nega lalonai memero bona kekeni momo ese hekwakwanai momo idia davaria, badina Iehova ena ura idia badinaia lasi.
4 Ena be Iehova umui noia lasi, to ia sibona ena ura dainai umui ia durua bada; unai dainai emui kudouna dekenai umui moale ia dekenai. (Roma 5:8) Emui kudouna dekenai Iehova umui tanikiu henia be namo, to iena lalokau dainai edena kara umui karaia diba ia umui tanikiu henia totona?
EMUI KARA AMO EMUI LALOKAU UMUI HAHEDINARAIA
5 Kara haida umui karaia diba hereva momokani umui abia dae momokani totona. Hegeregere, do umui tahua diba gauna ta be, lagani tamona lalonai, Bible ena hereva ibounai do umui duahia haorea diba. Bema dina ta ta iboudiai ena rau 4 eiava 5 umui duahia, lagani tamona ai do umui haorea diba. Index gaukaralaia dalana umui tahua emui henanadai edia haere umui davaria totona. Stadi karadia namodia umui goadalaia noho neganai, unai ese umui do ia durua lauma dalanai umui tubu totona. (Her. 2:2-4; 1 Tim. 4:15) Umui hegaegae guna hebou totona, bona hebou lalonai haere umui henia diba. Kongregesen ena hebou bona hebouhebou badadia dekenai hereva badadia umui torea nout buka dekenai, bena gabeai taunimanima haida dekenai umui kikilaia hebou diba. Bema unai bamona umui karaia, umui hahedinaraia umui moale unai heduru dainai, bona do umui tubu lauma dalanai.—2 Pet. 1:5-8.
6 Gau haida umui karaia diba kongregesen durua totona. Umui ese buruka eiava mai edia gorere tadikaka umui durua neganai, umui hahedinaraia umui ese Dirava ena lalokau umui abia dae. Kingdom Hall naria gaukarana durua totona, emui lalona umui hadaia vadaeni moni sisina hua iboudiai do umui henia totona, a? Mareko 12:41-44 ena sivarai umui duahia neganai, do umui diba Iehova bona ena Natuna idia moale moni bada lasi taudia ese moni sisina idia henia neganai. Namona be Kingdom Hall bona ena tano hagoevaia gaukarana dekenai umui heduru. Reana distrik bona sekit hebouhebou dekenai gaukara haida umui karaia diba danu.
HAIDA DURUDIA LAUMA DALANAI
7 Aposetolo Paulo ese ia goada karaia haida be lauma dalana ai ia durudia totona; unai amo ia hahedinaraia ia ese Iehova ena lalokau ia abia dae. Ena be umui be memero bona kekeni, to Paulo ena kara umui tohotohoa diba; emui haroro gaukara karaia dalana umui hanamoa noho diba, bona emui haroro negana umui habadaia diba. Hua eiava pura ta ta iboudiai hora hida do umui tahua haroro gaukara dekenai be umui laloa hegaegae guna, a? Memero bona kekeni momo ese edia sikuli turadia bona ma haida dekenai Bible stadi idia karaia. Bema Iehova ena heduru umui noia bona umui goada karaia, reana umui danu unai bamona umui karaia diba. Bema umui bapatiso vadaeni, sikuli ena holide lalonai heduru pioneer gaukara umui karaia diba, bona unai amo lauma dalanai taunimanima haida umui durudia diba. Haida umui hagoadaia diba, umui danu heduru pioneer gaukara idia karaia totona, a?
8 Aposetolo Paulo ese Keristen taudia ia sisiba henidia, ia gwau Dirava ena hariharibada do idia abia kava lasi. (2 Kor. 6:1) Namona be emui kara amo do umui hahedinaraia umui ese Iehova ena lalokau umui abia dae, badina ia ese umui ia durua bada dainai. Bema emui memero bona kekeni negana lalonai Dirava umui laloatao, momokani iena lalokau amo umui do ia hanamoa ela bona hanaihanai.—Koh. 12:1.
[Questions]
1. Kongregesen ena memero bona kekeni be dahaka henanadai toi idia haerelaia be namo?
2. (a) Memero bona kekeni ese dahaka hahenamo ta idia davaria edia tamana bona sinana edia amo? (b) Iehova ena orea dekena amo dahaka hahenamo badana idia davaria? (c) Ioane Ginigunana 4:8, 19 ena hereva hegeregerena, dahaka dainai Iehova ita lalokau henia? (d) Iehova ese oi totona dahaka ia karaia dainai, oi ura oi lalokau henia?
3. Iehova ese dahaka hahenamo haida do ia henia matamata taudia bona buruka taudia dekenai?
4. Memero bona kekeni ese hahenamo momo idia davaria vadaeni dainai, dahaka henanadai idia laloa be namo?
5. (a) Timoteo Ginigunana 4:15 dekenai dahaka sisiba namona matamata taudia bona buruka taudia totona ia noho? (b) Petero Iharuana 1:5-8 ena hereva hegeregerena, dahaka ese ita ia durua diba, bena do ita noho kava lasi bona iseda kara be mai anina?
6. Iesu ena hereva Mareko 12:41-44 dekenai ena anina memero bona kekeni dekenai be dahaka?
7. Aposetolo Paulo hegeregerena, memero bona kekeni ese dahaka idia karaia diba ma haida be lauma dalanai idia durudia totona?
8. Memero kekeni ese dahaka do idia karaia diba, unai amo do idia hahedinaraia Dirava ena hariharibada idia abia kava lasi?