Memero Kekeni e, Iehova Ena Kudouna Umui Hamoalea
(Kahana 1)
1 Memero kekeni edia goada negana lalonai, mauri ena mamina be namo. Aonega Pavapava Solomon ia torea, ia gwau: “Tauhau e, emu tauhau negana lalonai oi moale, emu tauhau dinadia ai oiemu kudouna ese oi do ia hamoalea be namo.” (Koh. 11:9) To, memero kekeni e, namona be umui laloatao, Dirava ese emui kara do ia tahua.
2 Ena be umui diba eiava umui diba lasi, to emui mauri lalonai umui karaia karadia be mai anina. Hegeregere, ia be mai anina emui tamana bona sinana dekenai. Hereva Lada-isidia 10:1 ia gwau: “Aonega merona ese ena tamana ia hamoalea, to kavakava merona ese ena sinana ena lalona ia hahisia.” To mai anina bada gauna be inai, emui mauri lalonai umui karaia karadia be mai anina umui ia Havaraia Tauna, Iehova Dirava dekenai. Hereva Lada-isidia 27:11 dekenai, Iehova ese memero kekeni ia hagoadadia inai bamona: “Natugu e, oi aonega, lauegu lalona oi hamoalea, lau ia gwau henia tauna do lau haere henia totona.” Hari inai negai, memero kekeni be Iehova ena kudouna idia hamoalea diba dalana be dahaka? Kongregesen be lauma dalanai ia goada totona idia heduru diba. Dala idauidau amo unai idia karaia diba.
3 Haheitalai Namona Amo: Umui memero kekeni be taunimanima iboudiai totona Baibel ia perovetalaia “metau dikadia momo” negana lalonai umui noho. (2 Tim. 3:1) Reana sikuli dekenai Witness lasi memero kekeni ese emui lalona idia ania toho, bona reana tisa taudia ese umui abia dae Baibel herevadia idia kirikirilaidia. Hegeregere, pablisa kekeni ta ena tisa tauna ia gwau evolusen herevana be ia maoro bona Baibel ena hereva be gori sibona. To, mai abidadama danu unai pablisa kekeni be Baibel ena maoro ia hahedinaraia. Unai dainai, Baibel stadi haida ia hamatamaia diba. Idia kamonai taudia haida be hebou dekenai idia lao hamatamaia. Memero kekeni edia abidadama karana ese Dirava dadaraia tanobadana ia gwauraia dika, bona unai ese kudou-maoro taudia be hereva momokani dekenai ia veridia.—Heb. 11:7.
4 Sikuli dekenai, ruma dekenai, bona kongregesen dekenai, umui memero kekeni be iseda orea memero kekeni ma haida edia abidadama umui hagoadaia diba. Kongregesen lalonai, emui lagani hegeregere memero kekeni ese dika idia karaia garina umui hagoadadia diba, a? (Roma 1:12) Emui haheitalai namona amo, haida umui durudia Iehova idia abidadama henia totona, unai ese Iena kudouna ia hamoalea!
5 Dabua Bona Tauanina Ena Toana: Taihu kekeni ta ena hemataurai dabua dainai idia kirikirilaia, idia gwau ia be “daua toho diba lasi” kekeni, to edia hereva dainai Dirava ena taravatu utua karana, inai tanobada ese idia karaia karana, ia karaia lasi. To, ia gwau ia be Iehova ena Witness kekeni dainai taravatu ia badinaia. Oi goada unai taihu bamona, eiava Satana ena tanobada taudia oi koudia lasi dainai edia lalohadai bona kara oi tohotohoa, a? Ai moale badina umui memero kekeni momo be Iehova ena hadibaia herevadia umui badinaia, bona inai tanobada ena kara, taunimanima abia isi, bona inai tanobada ena hahediba herevadia bona ena lohia, demoni unai, umui dadaraidia dainai!—1 Tim. 4:1.
6 Umui Abia Hidi Moale Bona Laga-Ani Karadia: Namona be tamana bona sinana ese edia natudia idia durudia mai aonega danu moale bona laga-ani karadia namodia do idia abia hidi totona. Tadikaka ta ese ia ura henia bada ruma bese namona ta ena kara ia gwauraia. Ia gwau lauma gaudia idia lalodia bada, bona moale karana idia karaia neganai, unai tamana bona sinana ese do idia hakaudia bona naridia noho. Tadikaka ia gwau: “Lau moale badina unai ruma bese idia gaukara hebou. Haroro neganai tamana bona sinana ese natudia idia durudia idia hegaegae totona, to unai sibona lasi, moale karana idia karaia neganai, idia durudia ruma bese ia moale bada totona. Uda dekenai idia loaloa, miusiam dekenai idia lao, eiava ruma dekenai idia noho bona gadara ta idia karaia, eiava idia gaukara, eiava ma kara ta idia karaia hebou. Idia bona haida idia lalokau heheni dalana oi itaia neganai, oi diba herevana dahaka hekwakwanai do ia vara, dina vairai dekenai hereva momokani ena dala dekenai do idia raka noho.”
7 Momokani, moale karadia haida be nega tamona ruma bese taudia iboudiai idia karaia diba lasi. To, namona be umui memero kekeni umui diba gauna be inai: umui laga-ani negana lalonai moale karana namona umui abia hidi be gau badana. Satana ia ura dikadika taunimanima momo ia hakaudia kerere. Memero kekeni idia do manada lasi dainai, iena koikoi bona lalona ania karadia dainai idia moru haraga diba. (2 Kor. 11:3; Ef. 6:11) Hari inai negai, Satana be dala idauidau amo umui ia veria, ia ura umui be sibona emui ura umui tahua bona idia maoromaoro lasi karadia umui karaia.
8 Televisen ese ita ia hadikaia diba, ia be kohu ura henia bona sihari kava maurina ia gwauraia namo. Muvini piksa bona video lalonai, nega momo dagedage bona sihari kava karadia idia hahedinaraia. Taunimanima momo idia ura henia miusik be dika bona bodaga karadia idia hahedinaraia. Satana ena lalo-ani gaudia edia toana be namo, to Keristen memero kekeni momo herea idia veria lalohadai kerere bona kara kerere idia karaia totona. Unai siahu dadaraia totona, kara maoromaoro gaudia umui tahua goadagoada be gau badana. (2 Tim. 2:22) Bema moale karana eiava laga-ani karana dekenai emui lalohadai eiava kara umui hamaoromaoroa be namo, edena bamona unai umui karaia diba? Salamo torea tauna ese haere ia hahedinaraia, ia gwau: “Mai egu lalona ibounai oi lau tahua. Lau oi durua, emu hahegani do lau rakatanidia lasi totona.”—Sal. 119:10.
9 Taunimanima momo be spot gadara bona moale karana dekenai idia kwalimu taudia idia lalodia bada. Iehova umui gari henia neganai, unai ese umui do ia durua mai edia kara dika taudia lalodia bada karana umui karaia lasi totona. Hari inai negai, taunimanima momo be sihari kava karadia idia laloa bada danu. Unai umui karaia garina, namona be kara bodaga hahedinaraia gaudia bona miusik dikadia umui dadaraidia. Miusik sivaraina dekenai, Gima Kohorona, April 15, 1993 gauna ai ia gwau: “Miusik be harihari gauna Dirava ena amo. To taunimanima momo ese idia laloa kerere bona idia laloa bada dainai dika idia davaria. . . . Emu lalona oi hadaia miusik oi laloa sisina bona Iehova ena gaukara oi laloa badabada. Naria namonamo, miusik namodia sibona oi abia hidi. Unai neganai Dirava ia henia harihari gauna, miusik, do oi gaukaralaia kerere lasi, to oi gaukaralaia namonamo diba.”
10 Emui lalona umui hadaia kara dika iboudiai umui dadaraidia totona. (Sal. 97:10) Lalo-ani hereva dainai dika umui karaia gwauraia neganai, namona be Iehova ena lalohadai unai kara dekenai umui laloa guna, bona gabeai dahaka do ia vara umui laloa danu: rogorogo kava, sihari kava gorere dikana, lalohadai idia dika, hemarai, bona kongregesen dekenai hahenamo haboioa umui lalodia. Bema televisen, muvini piksa, video, ane, eiava kiki hebou karadia lalonai dika karadia idia gwauraia namo, umui dadaraidia. Baibel ia gwauraia “kavakava taudia” umui bamodia lasi. (Her. 13:19) Turana abia hidi namonamo; kongregesen lalonai Iehova bona iena kara maoromaoro taravatudia idia abia dae taudia sibona umui tura henidia.
11 Oibe, idia ura Iehova ena kudouna idia hamoalea memero kekeni ese Efeso 5:15, 16 ena sisiba do idia badinaia, ia gwau: “Emui kara do umui naria namonamo. Aonega taudia bamona do umui noho, kavakava taudia bamona lasi. Harihari emui nega namona ia noho Dirava ena kara do umui karaia totona. Emui nega do umui haorea kava lasi, badina hari nega be nega dikana.” Hari inai nega dokona lalonai, dahaka ese umui ia durua “emui kara do umui naria namonamo” totona?
Memero Kekeni e, Iehova Ena Kudouna Umui Hamoalea
(Kahana 2)
1 Lauma Dalanai Idia Naria: Mataio 5:3 (NW) dekenai, Iesu ia gwau: “Idia diba lauma gaudia idia tahua be namo taudia idia moale.” Umui danu do umui moale bema umui diba lauma gaudia umui tauha be namo. Lauma gaudia umui tahua ena anina be sivarai namona umui harorolaia goadagoada, badina unai ese ita kamonai sivaraina dekenai iseda abidadama ia habadaia.—Roma 10:17.
2 Reana mamina umui abia vadaeni, pura iboudiai haroro gaukara umui karaia be ia auka sisina. Reana umui laloa umui karaia namonamo diba lasi dainai. Bema pura iboudiai haroro gaukara umui karaia, emui haroro dalana do umui hanamoa bona do umui daradara lasi, do umui diba umui hegeregere umui karaia totona.
3 Namona be umui hegaegae idia manada vadaeni kongregesen pablisa taudia danu umui haroro hebou totona, hegeregere regular pioneer bona elda taudia. Idia haroro neganai, bona ruma taudia edia koua herevadia idia hanaia neganai, edia hereva umui kamonai henia namonamo. Namona be Reasoning buka bona Iseda Basileia Gaukara pepana lalonai idia torea heduru herevadia umui gaukaralaia momo. Bena daudau lasi murinai, haroro gaukara do umui moalelaia bada, badina emui lalona ibounai ida Iehova umui hesiai henia.—Kara 20:35.
4 Haida be sikuli dekenai dala ia kehoa dainai idia haroro diba, bona hahediba taudia karaia gaukara dekenai idia kwalimu. (Mat. 28:19, 20) Keristen merona ta ia gwau: “Tisa ese ai idia hadibaia lasi negana lalonai, nega momo dala ia kehoa lau haroro totona, holide idia kahirakahira neganai unai be momokani. Egu desk dekenai Baibel buka bona magasin lau rakatanidia, haida do idia itadia totona, bona idia ura kamonai sikuli memero kekeni momo be lau dekenai idia mai ai herevahereva totona.” Daudau lasi murinai, unai memero kekeni haida bona tisa ta danu be Keristen heboudia dekenai idia mai. Oibe, unai tisa be ia goada ia lao bona kahirakahira ia be gwauhamata Witness tauna ta ai do ia lao. Umui memero kekeni ese Iehova ena ladana umui hanamoa neganai, ia moale bada herea.
5 Lauma dalanai umui goada dalana ma ta be sibona umui stadi. Iehova ena kudouna ita hamoalea totona, namona be ia ita diba, iena ura ita diba, bona iena taravatu ita dekenai ita diba be gau badana. Nega umui atoa sibona emui stadi umui karaia totona, a? Hanaihanai nega umui atoa danu umui stadi totona, hanaihanai nega umui atoa umui aniani totona hegeregerena, a? (Ioane 17:3) Sediual umui karaia Baibel umui duahia totona bona Haroro School ena Baibel duahiduahi karaia totona danu, a? Hebou iboudiai totona umui hegaegae guna, a? Gima Kohorona bona Noga! magasin iboudiai umui duahidia, a?
6 Baibel bona tiokratik Baibel stadi bukadia umui duahidia neganai, idia be Iehova ena sivarai, iena lalohadai, bona iena ura umui dekenai idia hadibaia. Namona be unai sivarai be edena bamona umui ia durua umui laloa. Umui duahia sivaraina be guna umui duahia sivaraina dekenai umui hakapua. Unai be laloa namonamo karana. Laloa namonamo karana amo unai sivarai be emui kudouna dekenai ia diho momokani bona umui ia hasiahua kara ta umui karaia totona.—Sal. 77:12.
7 Memero kekeni be idia diba lauma gaudia idia tahua be namo bona kongregesen heboudia dekenai idia mai neganai, ai moale. Keristen memero kekeni be hebou dekenai hagoadaia haere namodia idia henia hanaihanai neganai, memero kekeni ma haida idia hagoadaia unai do idia karaia totona. Namona be emui lalona umui hadaia hebou ta ta iboudiai dekenai, haere tamona do umui henia totona. Kongregesen lalonai, hebou vairanai bona murinai, lagani idauidau taudia umui bamodia umui hagoadaia heheni totona. (Heb. 10:24, 25) Tadikaka ta ia gwau iena tamana bona sinana ese ia idia hagoadaia hebou ta ta iboudiai dekenai lagani bada tadikaka ta eiava taihu ta do ia hereva henia totona. Guna, ia ese kongregesen ena lagani bada taudia ia bamodia karana amo heduru bada ia abia, bona hari unai kara ia do laloa bada.
8 Lauma Gaudia Tahua Noho: Madi, hari inai negai, memero kekeni momo edia mauri lalonai gau ta idia tahua lasi bona hakaua herevana idia abia lasi. To, bema tiokratik gaukara umui tahudia bona umui hagugurudia neganai, umui moale bada, ani? Unai gaukara umui tahua neganai, Dirava ese umui ia hadibaia dainai, unai gaukara be hari do umui moalelaia bona gabeai mauri hanaihanai ena hahemauri do umui abia.—Koh. 12:1, 13.
9 Gaukara ta umui tahua neganai, namona be umui gurigurilaia. Emui tamana bona sinana bona elda taudia danu umui herevahereva. Emui lalona bona emui aonega umui tahua namonamo, bona umui karaia diba gaudia sibona umui tahudia, namo lasi kara haida umui tahua, haida ese idia karaia dainai. Ita ibounai be idau—tauanina ai, lalohadai ai, lalona ena goada ai, bona lauma dalanai. Unai dainai, namo lasi umui laloa haida ese idia karaia gaukara ibounai umui karaia diba.
10 Do umui tahua diba gaukara haida be dahaka? Bema umui be pablisa lasi eiava umui be bapatiso umui do abia lasi, namona be umui hekwarahi unai umui karaia totona. Bema umui be pablisa taudia, namona be hora umui abia hidi bona umui hekwarahi pura ta ta iboudiai haroro dekenai unai hora umui davaria totona. Namona be umui goada karaia lou-henia gaukarana dekenai hadibaia taudia namodia ai umui lao totona. Bema umui do sikuli bona umui bapatiso vadaeni, namona be holide neganai heduru pioneer gaukara karaia totona umui goada karaia. Oibe, gaukara bada ia noho “Lohiabada ena gaukara do umui karaia goadgoada” totona.—1 Kor. 15:58.
11 Tamana Bona Sinana Idia Durudia be Gau Badana: Kongregesen lalonai, namo lasi memero kekeni idia laloa sibodia idia hekwarahi mauri hanaihanai idia abia totona. Iehova be iena orea dekena amo, heduru taudia momo ia henia memero kekeni idia durua dina ta ta iboudiai dala maorona idia abia hidi totona, bona mauri ena hekwakwanai idia hanaia totona. Momokani, idia bapatiso vadaeni tamana bona sinana be mai edia maduna edia natudia idia durudia dala maorona idia abia hidi diba totona. Korinto Ginigunana 11:3 ai, Baibel ia gwau ruma bese kwarana be tau. Unai dainai, Keristen ruma besena lalonai, tamana be ena natudia dekenai Dirava ena taravatu ia hadibaia gaukarana ia gunalaia, bona ena adavana ese ia durua. (Ef. 6:4) Beibi negana amo unai idia karaia hamatamaia. Natuna ena harana be lagani ginigunana dekenai nega toi amo ia bada, namo lasi tamana bona sinana idia laloa unai beibi dekenai gau ta idia hadibaia diba lasi. (2 Tim. 3:15) Natudia idia tubu idia lao neganai, namona be tamana bona sinana ese idia hadibaia Iehova idia lalokau henia totona, bona tura henia namonamo totona.
12 Tamana bona sinana edia haheitalai namona be heduru gauna ginigunana. Lauma dalanai unai ese natudia do ia durua bada herea, edia hereva momo amo dahaka idia karaia bona dahaka idia karaia lasi karana ia hanaia. Tamana bona sinana ese haheitalai namona idia karaia ena anina be ruma dekenai, adavana dekenai, bona natudia dekenai, lauma huahua do idia hahedinaraia. (Gal. 5:22, 23) Momo herea idia diba vadaeni, namo havaraia totona, Dirava ena lauma ena siahu be bada herea. Ia ese umui ia durua emui natudia edia lalohadai bona kudouna hadibaia namonamo totona.
13 Tamana bona sinana edia haheitalai namona stadi karana dekenai, hebou lao henia karana dekenai, bona haroro gaukara idia karaia hanaihanai, be gau badana danu. Bema ruma lalonai mai moale danu hereva momokani ena sivarai umui kikilaia, haroro gaukara umui karaia goadagoada, bona sibona emui stadi umui laloa bada, unai ese emui natudia ia hagoadaia lauma gaudia do idia laloa bada totona.
14 Umui hegaegae namonamo neganai, ruma bese stadi amo natudia be diba bada idia abia bona stadi do idia moalelaia, unai be ruma bese idia lalo-tamona negana unai. Nega umui atoa natudia edia kudouna umui hamareredia totona. (Her. 23:15) Ruma bese momo be ruma bese stadi lalonai unai pura ena Gima Kohorona stadi idia hegaegaelaia, to nega ta ta ai, hekwakwanai ia vara neganai, ruma bese hagoadaia sivaraina umui kikilaia be namo. Lalona veria henanadai henia karana amo, bona ruma bese taudia ta ta edia haere umui kamonai henia amo, edia lalohadai umui diba bona unai be namo. Ruma bese kwarana ese stadi lalonai ena ruma bese taudia ta ta iboudiai ia hagoadaia be gaukara badana. To idia tubu bada neganai, bema lauma dalanai idia goada unai be hahenamo bada herea! Iboudiai idia haere neganai, stadi do idia moalelaia.
15 Hari, mai lalokau danu, emui natudia umui hadibaia be gau badana, hahemauri do idia davaria totona. (Her. 22:6) Unai umui laloatao neganai, do umui lalo-parara unai be mai anina bada hadibaia gaukarana. Namo lasi umui laloa unai mai anina bada gaukara umui karaia neganai sibona umui hekwarahi. Emui ruma bese maduna umui huaia namonamo totona, namona be Iehova dekenai umui tabekau. To unai sibona lasi. Haida ese umui idia durua diba danu.
Memero Kekeni e, Iehova Ena Kudouna Umui Hamoalea
(Kahana 3)
1 Haida Idia Heduru Diba Dalana: Elda taudia e, umui gima noho memero kekeni ese Kingdom Hall gaukara lalonai idia heduru diba totona. Edia tamana bona sinana edia gwaumaoro umui abia murinai, umui boiridia bena idia heduru diba Kingdom Hall hagoevaia, helai gaudia atoa maoromaoro, soun masini ena kohu atoa lou, bona Iseda Basileia Gaukara pepadia bona Haroro School pepadia idia haridia totona. Natudia maragidia oi hagoadadia kongregesen heboudia dekenai haere idia henia totona. Hesiai Hebou lalonai namona be elda taudia bona hesiai taudia ese edia hereva lalonai henanadai idia henia neganai, idia gima noho maragidia edia imadia idia abia isi idia tahua totona. Bema tama sina be haheitalai ta idia karaia eiava idia oi henanadai henidia, namona be dala oi tahua edia natudia haida be idia badinai idia noho bona reana hereva maragina ta idia henia diba.
2 Edia hekwarahi dainai umui hanamodia. Kongregesen lalonai, memero kekeni edia heduru be bada. Edia kara namodia amo, idia momo be ‘iseda Hahemauri Tauna, Dirava, ena hahediba herevadia dekenai hairai idia havaraia.’ (Tito 2:6-10) Ena be natudia be haere maragina sibona idia henia, to umui hanamodia be gau badana. Unai ese idia ia hagoadaia bona gabeai do idia hegaegae ma idia karaia lou totona. Unai bamona umui karaia be davana bada gauna ta umui henia bamona. Umui elda bona hesiai taudia e, kongregesen lalonai, memero kekeni ese hereva ta idia henia eiava haheitalai ta idia karaia neganai, idia dekenai umui lao bona edia hereva dainai umui hanamodia, a?
3 Pioneer taudia e, dahaka do umui karaia diba umui durudia totona? Sikuli memero kekeni be adorahi bona Saturday bona Sunday umui durudia totona, reana emui sediual umui haidaua diba sisina, ani? Idia dekenai umui kiki hebou neganai, umui hahedinaraia ful-taim haroro gaukara be mai emui ura bada danu umui abia hidi, a? Emui vairana toana amo umui hahedinaraia haroro gaukara umui moalelaia, a? Nega momo memero kekeni umui hamaorodia unai gaukara be namo herea, a? Memero kekeni danu ruma-ta-ruma-ta gaukara umui karaia neganai, durua bona hagoadaia hereva umui henidia, a? Bema oibe, umui pioneer taudia be unai memero kekeni hadibaia ena mai anina bada gaukara dekenai umui heduru.
4 Kongregesen lalonai, namona be iboudiai ese memero kekeni hadibaia ena mai anina bada gaukarana idia laloa. Oi hegaegae diba idia danu haroro gaukara umui karaia hebou totona, a? Ruma-ta-ruma-ta gaukara umui do karaia lasi neganai, idia danu hereva umui hegaegaelaia diba, a? Umui haroro hebou neganai, lauma gaukara ma haida do idia karaia totona umui hagoadadia, a? Namona be pablisa ta ta iboudiai idia lalo-parara, hagoadaia hereva maragina ese memero kekeni ia durudia diba edia mauri lalonai lauma gaudia idia tahua totona, bona gabeai idia ese namo do idia davaria ela bona hanaihanai.
5 Memero Kekeni be Sibodia Idia Durua Diba: Memero kekeni e, umui ta ta ibounai ai hagoadaia Iehova ena hadibaia herevadia umui badinaia noho bona inai tanobada gaudia umui dadaraidia totona. Namona be hanaihanai emui kara bona lalohadai umui tahua. Emui mauri lalonai Iehova ena ura badinaia karana dekenai emui lalohadai be dahaka? Umui goada karaia noho Satana ena ura umui dadaraia noho totona, a? Vaia taunimanima edia kara, memero kekeni danu, idia ura edia lagani tamona taudia idia lalo-namo henidia, reana umui diba taunimanima momo bamona umui ura kara dika umui karaia, a? Aposetolo Paulo ia diba tanobada ena kara umui karaia totona, umui ia doria siahuna be bada, badina Roma 7:21-23 dekenai ia gwauraia.
6 Tanobada ena siahu idia dadaraia, edia lagani tamona taudia bamona lasi to kara idauna idia karaia, bona Dirava ena hahediba herevadia idia badinaia totona, idia gari lasi be gau badana. Idaunegai taudia be unai bamona idia karaia diba. Noa ena gari lasi sivaraina mani umui laloa. Iena abidadama goadana bona iena nega kara kerere taudia amo ia gini siri dainai, ia ese tanobada ibounai ia kota henia bamona. (Heb. 11:7) Umui goada karaia badina namo do umui davaria. Namo lasi Satana ena taunimanima ida idia raka taudia edia kara umui tohotohodia, idia be manoka, lalo-goada lasi, bona gari taudia. To, namona be Iehova ia lalo-namo henia taudia umui tahudia umui bamodia totona. (Fil. 3:17) Namona be Dirava ia gwauhamatalaia tanobada matamatana lalonai do idia vareai taudia umui bamodia bona idia ida umui raka hebou. Namona be umui laloatao mauri hanaihanai lao henia dalana be tamona sibona.—Mat. 7:13, 14.
7 Ita itaia memero kekeni ese iseda Dirava ena ladana idia hanamoa bona idia matauraia neganai ita moale, bona Dirava danu ia moale bada! Ita daradara lasi, memero kekeni ese Iehova do ia havaraia gaudia idia harorolaia momo ia itaia neganai, ia moale bada. Idia be “harihari gaudia” ia dekena amo, bona ia ura namo gaudia sibona idia davaria. (Sal. 127:3-5; 128:3-6) Ena Tamana ena laloa hegeregerena, Keriso Iesu ese natudia bamoa karana ia moalelaia, bona Iehova idia tomadiho henia karana dekenai idia ia hagoadaia totona, nega ia atoa. Idia dekenai lalokau karana ia hahedinaraia. (Mar. 9:36, 37; 10:13-16) Memero kekeni ita lalodia Iehova bona Keriso Iesu ese idia lalodia bamona, a? Iseda memero kekeni idia diba Iehova bona aneru edia laloa be dahaka edia abidadama bona haheitalai namona idia itaia neganai, a? Namona be hahenamo bona hagoadaia hereva idia abia lauma gaudia do idia tahua totona, bena unai neganai Iehova do idia hamoalea. Memero kekeni e, bema umui goada karaia, harihari bona gabeai laganidia dekenai danu, hahenamo momo do umui davaria!
[Questions for Part 3]
1. Kongregesen lalonai, memero kekeni durudia totona, elda taudia be dahaka idia karaia diba?
2. Memero kekeni hanamoa karana be edena bamona ia durudia?
3. Kongregesen lalonai, pioneer taudia ese memero kekeni idia durua diba dalana be dahaka?
4. Kongregesen lalonai, memero kekeni hadibaia gaukara dekenai, iboudiai idia heduru diba dalana be dahaka?
5. Lauma dalanai do idia tubu totona, memero kekeni be dahaka idia karaia diba sibodia idia durua totona?
6. Memero kekeni be daidia do idia bamodia be namo?
7. Memero kekeni dekenai Iehova Dirava bona Keriso Iesu edia laloa be dahaka?