Bible Stadi Taudia Dekenai Bible Gaukaralaia Dalana Ita Hadibaia
1 “Dirava ena hereva ai mailaia neganai, umui kamonai henia bona umui abia dae. Oibe, umui abia dae momokani taunimanima edia hereva bamona lasi, to Dirava ena hereva momokani bamona.” (1 Tes. 2:13) Ita be Keristen taudia momokanidia dainai, dala ita tahua Bible ena hereva ita hahedinaraia goevagoeva totona. Unai dainai, Bible stadi oi karaia neganai, namona be emu Bible stadi oi durua do ia lalo-parara ia dekenai oi hadibaia herevadia be Iehova ena lalohadai, taunimanima edia lasi. Bema iseda Bible stadi taudia ita hadibadia Bible idia gaukaralaia namonamo totona, edia kudouna lalonai Bible ena siri do idia abidadama henidia, edia abidadama do ia goada bona idia abidia dae herevadia edia badina be Bible amo do idia gwauraia hedinarai diba.—2 Tim. 3:16, 17; 1 Pet. 3:15.
2 Bible stadi tauna be edena negai oi hadibaia matamaia Bible ia gaukaralaia namonamo totona? Edena bamona do oi hadibaia edena Bible bukadia be guna, edena be gabe gaudia, bona Bible siri davaria dalana be edena bamona do oi hadibaia? Bible stadi tauna ese dahaka ia karaia diba Bible siri badadia haida ia diba totona? Edena dala amo oi durua diba? Dala idauidau amo iseda Bible stadi tauna ita durua namonamo diba.
BIBLE OI GAUKARALAIA
3 Bible stadi oi hamatamaia neganai, namona be Bible buka iboudiai edia lista be ia dekenai oi hahedinaraia, bena Bible lalonai bukadia davaria dalana oi hahedinaraia danu. Society ena buka bona magasin lalonai, Bible siridia momo edia hereva idia torea hanai. Ma haida edia karoa bona siri edia namba idia torea, to siri edia hereva idia torea hanai lasi. Bible stadi matamatana oi hamatamaia neganai, namona be unai siri iboudiai Bible lalonai umui duahidia. Unai dala amo do ia hedinarai goevagoeva umui stadilaia herevadia be Bible amo idia mai. Unai umui karaia totona, nega bada do umui negea, to Bible stadi tauna ese Bible ena buka do ia diba namonano, bona do ia diba, buka lalonai idia torea herevadia be Bible amo idia abia.
HAHEITALAI: Bible stadi matamatana ta: Bible stadi ia naria tauna ese Bible stadi tauna matamatana ia durua Bible ia gaukaralaia totona. Unai murinai, Bible stadi tauna ia hamaoroa Mataio 24:14, Salamo 37:34 bona Apokalupo 21:3 ia kehoa bena ia duahidia.
4 Bible stadi tauna be mai ena henanadai neganai, namona be oi durua Bible ena haere be siri tahua karana amo do ia davaria. Unai dala amo do ia diba Dirava ena haere ia abia. (Ioane 17:17) Bible stadi tauna oi durua, siri ena anina ia lalohadailaia totona, bona Bible ena haere ia laloa bada totona. Bible stadi umui karaia ore neganai, namona be Bible stadi tauna oi hamaoroa siri badadia rua o toi ia tahua bena sibona ena hereva amo edia anina ia gwauraia hedinarai. Unai dala amo do ia hegeregere iena abidadama ena badina do ia gwauraia hedinarai. Danu, Bible ia gaukaralaia dainai, iena Bible stadi amo ia diba gaudia be mai ena lalo-goada ida ma haida dekenai do ia herevalaia diba, gari lasi.—Kara 17:1-3.
5 Namona be emu Bible stadi tauna oi hagoadaia iena Bible stadi, Gima Kohorona stadi, bona hebou ma haida totona ia hegaegae neganai, Bible siri ia duahidia bona edia anina ia laloa namonamo. Unai dala amo do ia hegeregere iena Bible be hebou lalodiai do ia gaukaralaia namonamo, bona Bible amo do ia haere. Ia sibona ese siri ia duahidia bona ia lalodia namonamo neganai, hereva momokani be iena lalona ai do ia atoa dobu momokani.
6 Bema iseda Bible stadi taudia ita hadibadia Bible gaukaralaia dalana dekenai, heduru bada do idia abia. Do idia diba idia hadibaia herevadia be Dirava ena amo. Oibe, “Dirava ena hereva be ia mauri noho, bona ia be mai ena siahu.” (Heb. 4:12) Ita ura ma haida do ita durudia ‘hereva momokani do idia hadibaia maoromaoro’ totona.—2 Tim. 2:15.
[Questions]
1. (a) Keristen taudia ese Bible edena bamona idia lalohadailaia? (b) Dahaka dainai iseda Bible stadi taudia ita durudia Bible idia gaukaralaia namonamo totona be namo? Edena Bible siridia ese idia hahedinaraia unai ita karaia be namo?
2. Bible stadi matamata oi hamatamaia neganai, edena henanadai idia vara?
3. (a) Tau ta ena stadi ginigunana dekenai, dahaka oi hahedinarai henia diba? (b) Dahaka dainai siri iboudiai umui duahidia be namo?
4. (a) Emu Bible stadi tauna ena henanadai be edena dala namona amo oi haerelaia diba? (b) Bible stadi ia naria tauna ese hereva badadia ia gwauraia lou neganai, dahaka ia karaia diba? (c) Kara 17:1-3 ena hereva hegeregerena, Paulo ese dahaka kara mai anina bada ia karaia, taunimanima ia hadibadia neganai?
5. Hereva momokani be Bible stadi tauna ena lalona ai be edena bamona ia atoa dobu diba?
6. Bema emu Bible stadi tauna oi hadibaia Bible gaukaralaia namonamo dalana dekenai, dahaka hahenamo ia abia diba?