Haroro Gaukara Dekenai Oi Goada Oi Lao
1 Oi tubu oi lao karana dekenai, aonega herevana ta ia gwau: “Oi gini gabunai gaukara ta oi hamatamaia. To unuseniai do oi gini noho lasi.” Unai hereva be ia maoro emu haroro gaukara ia namo ia lao totona. Haroro gaukara oi karaia hamatamaia neganai, reana hereva kwadogina Basileia sivaraina dekenai oi harorolaia diba! To lagani haida idia lao vadaeni bona oi goada oi lao lasi, to hereva kwadogina sibona mo oi do herevalaia noho, dahaka do oi karaia diba?
2 Gau ginigunana be Iehova oi guriguri henia aonega do oi abia hahediba gaukara do oi karaia namonamo totona. (Her. 15:14; Iak. 1:5) Gau iharuana be oiemu guriguri hegeregerena kara do oi karaia. Hegeregere nega oi atoa bona Reasoning buka dekenai eiava Iseda Basileia Gaukara pepadia dekenai idia torea haroro herevana bona karaia dalana do oi tahua. Bema oi laloa idia ta do oi gaukaralaia namonamo diba, unai hereva oi duahia momo emu lalona dekenai oi laloatao totona. Gau ihatoina be haroro gaukara dekenai tadikaka oi bamodia bona oi hegaegaelaia herevana do oi gwauraia diba.
OI IDIA DURUA TURADIA
3 To reana oi gwau: “Unai bamona lau karaia be ia auka sisina.” Momokani, to emu turana idia noho oi idia durua totona. Bema oi be mero eiava kekeni ta, namona be emu tamana bona sinana eiava ia manada vadaeni pablisa taudia danu oi kiki hebou. Idia oi henanadai henia dahaka do oi hereva diba ruma ta ruma ta gaukara dekenai taunimanima danu oi kiki hebou totona. Reana do idia gwau haheitalai amo unai kara do umui hegaegaelaia. Hegeregere ta be ruma tauna bamona do ia gini bona taunimanima idia gwauraia momo koua herevana ta do ia gwauraia, bena oi ese unai koua herevana hanaia dalana do oi karaia toho. Bema nega momo unai bamona do umui hegaegae, mai aonega danu taunimanima kiki hebou dalana do oi manadalaia.
4 Oi do idia durua turana taudia be momo. Idia haida be pioneer taudia, idia ese haroro gaukara idia karaia momo dainai bona Pioneer Gaukara School dekenai idia lao dainai, haroro dalana idia manadalaia. Bema mai ena dala, oiemu buka stadi naria tauna eiava haroro naria tauna be oi ia bamoa diba ruma ta ruma ta gaukara dekenai, bena taunimanima hereva henidia bona hereva idia lalohadailaia namonamo dalana do ia hahedinaraia diba oi dekenai.
KAMONAI TAUDIA LOU HENIDIA
5 Kamonai taudia ese ita hariharilaia buka eiava magasin idia abia neganai, ita ura lauma dalanai unai taudia ita durudia noho. Unai anina be edia lalona ita veria ma diba haida do idia ura kamonai henia totona. Unai dainai, lou-henia oi do karaia lasi neganai, namona be nega ginigunana umui kikilaia herevana oi laloa lou, bona ena lalona veria totona, unai hereva dekenai ma hereva haida do oi atoa kau, badina guna unai hereva ia ura kamonai henia. Bona laloaboio lasi, ena be hadohado bona dairia gaukaradia ita karaia, to Iehova ese unai gaukara ia hatubua. Unai dainai heduru ita abia totona namona be ia dekenai ita guriguri. (1 Kor. 3:6; 2 Kor. 9:10) Diba idia abia totona haida ita durudia neganai, unai ese ita ia hagoadaia danu.
6 Mai anina bada gauna ma ta be Bible stadi oi hamatamaia toho. Bema lauma dalanai oi do tubu noho dainai unai gaukara oi do manadalaia lasi, namona be guriguri amo Iehova do oi noia noho, oi ia durua mamoe bamona tauna ta do oi davaria bona stadi amo do oi ubua noho totona. Reana heduru gauna namona be Bible stadi karaia dalana ia manadalaia vadaeni tauna oi bamoa stadi ia karaia neganai, bena iena hahediba dalana do oi tohotohoa diba. Danu, namona be March 1, 1986 Gima Kohorona magasin rau 18-24 ena heduru hereva, hahediba karaia dalana dekenai oi duahia lou. Bema unai dala idauidau amo do oi hegaegae noho, Dirava ese oiemu guriguri ia haerelaia neganai do oi hegeregere Bible stadi ta do oi karaia totona.
OI URA KARAIA GAUDIA OI HAGUGURUDIA
7 Do oi tahua gaudia, hegeregere emu hahediba gaukara hanamoa, lou-henia karaia, bona Bible stadi ta hamatamaia be nega kwadogina dekenai do oi hagugurudia diba lasi. Oi be mai emu dala heduru eiava regular pioneer gaukara do oi tahua totona, a? Haroro gaukara dekenai oi goada oi lao noho neganai, taunimanima ma haida do oi hagoadaia diba. Bema lauma dalanai gabu tamona dekenai oi noho lasi, to do oi goada oi lao noho, Iehova dekena amo hahenamo momo do oi davaria.