Kara Oi Karaia Oi Goada Oi Lao Totona
1 English gado idia diba taudia be sedira 1992 Yearbook idia duahia haorea vadaeni. Ita moale bada herea badina lagani 1991 lalonai, tano 211 dekenai, iseda tanobada ibounai gaukarana be ia bada herea; Basileia pablisa iboudiai be 4,250,000 bona ma haida—lagani gunana amo 6.5 pesen amo ia bada daekau unai! Momokani, tanobada ibounai dekenai Basileia gaukara be ia bada ia lao bona unai ese ia hahedinaraia hari inai nega lalonai Isaia 2:2-4 bona Mika 4:1-4 edia hereva idia guguru.
2 Ena be 1992 ena hesiai laganina ena ripoti be ia do ore lasi, to ia hedinarai goevagoeva Iehova ese ia hanamoa badina unai hesiai laganina ena gaukara ia bada herea. Tanobada hegegemadai taunimanima ita boiridia noho tadikaka bamona oreana dekenai idia vareai totona. Memorial heboudia bona distrik hebouheboudia dekenai idia lao taudia edia namba ese ia hahedinaraia taunimanima milion momo be Basileia ena sivarai idia kamonai henia. Bese idauidau dekena amo taunimanima be Dirava ena siahu dekena amo idia boiboilaia herevana idia kamonai henia, unai hereva ia gwau: “Taunimanima e, umui mai, Iehova ena ororo dekenai do ita daekau, Iakobo ena Dirava ena dubu ai; bona ia ese ena kara ita do ia hadibaia, bona ita be ena dala dekenai do ita raka.”
3 Emu Lalona Oi Hadaia Do Oi Goada Oi Lao Totona: Iehova ena orea be ia heau noho. Kamonai matamata taudia momo herea be Iehova ena ororo bamona tomadiho momokanina dekenai idia lao, unai dainai gau badana be idia ta ta iboudiai be kara idia karaia lauma dalanai idia goada idia lao totona bona murinai taunimanima matamata ma haida do idia durudia unai bamona do idia karaia totona. Iehova ena ororo dekenai idia daekau taudia idia goada idia lao be gau badana, badina unai hereva ia gwau idia be ma haida dekenai do idia gwau ‘Oi mai!’ Aposetolo Ioane be Apokalupo 22:17 dekenai unai hereva bamona ta ia gwauraia, ia gwau: “Lauma Helaga bona Headava Matamata Hahine idia gwau, ‘Oi mai.’ Bona inai hereva idia kamonai taudia danu, namona be idia gwau, ‘Oi mai.’ ”
4 Iesu ese taunimanima boiridia dalana ia hahedinaraia. Taunimanima ia hadibadia bona ena hereva idia abia dae, ia boiridia ia danu haroro gaukara do idia karaia totona bona idia ia hadibaia edena dala amo do idia karaia. (Mat. 4:19; 10:5-7, 11-14) Iesu ena hahediba taudia ese ia idia bamoa bona iena hadibaia dalana idia itaia dainai haroro dala namona idia diba. Vadaeni haroro gaukara dekenai iena kara idia tohotohoa. Iena haroro dalana idia diba namonamo bona gari lasi dekenai idia haroro dainai edia inai taudia ese idia raraidia bona idia diba idia be Iesu ena hahediba taudia. Kara 4:13 ia gwau: “Petero bona Ioane idia itaia, idia be gari lasi, . . . idia diba vadaeni idia be Iesu ena bamona taudia.”
5 Iesu be guba dekenai ia do giroa lou lasi neganai, ia ese iena hahediba taudia dekenai hahegani ta ia henia, ia gwau Keristen hesiai gaukarana do ia bada ia lao totona gau badana be taunimanima be hahediba taudia ai do idia halaodia, bona do idia hadibadia, guna taunimanima ese idia idia hadibadia hegeregerena. Mataio 28:19, 20 dekenai Iesu ia haganidia, ia gwau: “Umui lao, bese ibounai be diba tahua taudia do umui halaoa, . . . idia dekenai do umui hadibaia, umui dekenai lau henia hereva ibounai be do idia badinaia.” Bona unai nega amo ia mai hari unai gaukara ia do noho hamomokania herevana be inai, ia gwau: “Umui kamonai bona laloa noho, lau be hanaihanai umui danu ita noho ela bona tanobada dokona.”
6 Iesu Keriso ena hahediba taudia momokanidia be iena hereva idia badinaia, idia ese iena hahegani hegeregerena taunimanima dekenai iena hereva iboudiai idia hadibadia bona hahediba taudia ai idia halaodia. To, tanobada hegegemadai Iehova ena Witness taudia edia orea ia bada herea dainai, vanegai bapatiso idia abia kongregesen taudia, bapatiso idia do abia lasi pablisa taudia, bona Bible stadi taudia, reana idia haida be hari kongregesen ena hebou dekenai idia mai hanaihanai taudia, ita durudia dalana ita laloa be gau badana.
7 Heberu 6:1 ese ita ibounai ia hagoadaia ‘ita goada ita lao totona.’ Keristen ena dala dekenai ita goada totona, hesiai gaukara ena ripoti atoa sibona be ia hegeregere lasi. Ita goada totona, gau badana be hanaihanai sibona eda stadi ita karaia, hebou dekenai ita lao, bona mai moale danu haroro gaukara ita karaia. Danu, namona be taunimanima ma haida ita durudia hereva momokani do idia diba bona hahemauri idia abia totona. Namona be ita hekwarahi noho iseda diba ‘Buka Helaga hegeregerena ai ita gaukaralaia’ karana ita hanamoa totona. (Kara 17:2) Lauma dalanai do ita goada totona, nega bada ia ania, bona gau badana be Dirava ita abidadama henia bada bona haroro gaukara do ita manadalaia. Aonega dalana be idia goada tadikaka bona taihu edia heduru ita abia haroro gaukara do ita manadalaia totona. Haroro gaukara dekenai idia edia kara amo diba ita abia. Namo lasi ita kerere neganai sibona diba ita abia.
Idia Do Manada Lasi Taudia Idia Karaia Diba Gaudia
1 Keristen kongregesen ginigunana idia haginia neganai heduru henia dalana idia hahedinaraia danu. Iesu ese ena hahediba taudia ia hadibadia. (Mar. 3:14; Luka 9:1; 10:1) Bena idia ese ma haida idia hadibadia. Timoteo be aposetolo Paulo dekena amo hagoadaia bona heduru bada herevadia ia abia, bona hahediba tauna Apolo ia goada ia lao badina idia manada vadaeni taudia Akula bona Priskila idia durua dainai. (Kara 18:24-27; 1 Kor. 4:17) Hari inai nega lalonai, Keristen kongregesen lalonai idia noho lo taudia be unai taudia edia haheitalai namona idia tohotohoa, idia do manada lasi taudia idia hadibadia bona idia hagoadadia, kamonai matamata taudia bona memero kekeni danu. Roma 15:1, 2 hegeregerena idia karaia, ia gwau: “Ita abidadama goada taudia be namo manoka taudia ita durudia edia abidadama do ia gini totona.”
2 Edia natudia idia durua lauma dalanai idia tubu idia lao totona, tama sina edia maduna be kara haida idia karaia. Unai anina be ruma bese stadi idia karaia, edia natudia idia hadibadia edena bamona sibodia edia stadi idia karaia diba, idia hagoadadia nega ibounai hebou dekenai idia lao bona haere idia henia totona, bona idia kamonai henia gaudia idia badinaia totona. (Ef. 6:4; 1 Tim. 5:8) Kongregesen Buka Stadi naria taudia be edia grup taudia bona idia naria haroro grup taudia iboudiai be lauma dalanai idia tubu idia lao totona, gau badana be idia ese durudia dalana idia gunalaia. Haroro naria tauna bona ma elda taudia haida, hesiai taudia bona kongregesen taudia ma haida danu be idia heduru diba.
3 Durua Hereva Oi Henia: Reana ta ese ena Keristen hesiai gaukara ena kahana tamona dekenai heduru ia ura abia, hegeregere sibona ena stadi dalana dekenai. Reana heduru hereva amo ta ese ia badinaia diba sediual ia karaia be namo. Reana ta ia ura heduru ia abia hebou dekenai haere do ia henia totona eiava do ia henia herevana ia hegaegaelaia totona. Ma haida be reana idia ura diba edena bamona Bible ena hereva badadia edia sivarai ma haida be buka amo do idia tahua diba.
4 Orea dekenai idia vareai matamata taudia ese haroro gaukara dekenai heduru idia abia be gau badana. Reana pablisa ta be ena ruma ta ruma ta haroro gaukarana, lou-henia gaukarana, eiava Bible stadi hamatamaia bona karaia gaukarana ia ura hanamoa. Ma nega haida dekenai, haroro gaukara karaia namonamo totona ia badinaia diba sediual hegaegaelaia dalana ita hadibaia sibona be ia hegeregere. Bema ita hegaegae namonamo heduru ia ura abia tauna eiava hahinena ida ita gaukara hebou totona, ia ita durua ia tahua gaudia do ia hagugurudia totona.
5 Dirava ena Hereva ese ita ia hagoadaia ma taunimanima haida dekenai iseda goada lauma dalana dekenai ita hahedinaraia totona. (1 Tim. 4:15) Dirava ena ura ita diba neganai, namona be kara haraga ena ura ita badinaia badina ita idia raraia taudia do idia diba iseda mauri lalonai ita be Keristen momokani karana ita hahedinaraia. Danu, namona be taunimanima hadibaia dalana dekenai iseda diba ita habadaia noho ita hadibaia taudia be Iesu Keriso ena gwauhamata hahediba taudia ai do idia lao totona.—Iak. 1:22-25.
[Questions for Kara Oi Karaia]
1, 2. Isaia 2:2-4 oi duahia. Hari inai nega lalonai, unai siri be edena bamona ia guguru?
3. Apokalupo 22:17 ese ia hahedinaraia kamonai matamata taudia edia maduna be dahaka?
4. (a) Mataio 4:19; 10:5-7, 11-14 oi duahia. Taunimanima dekenai idia gwau ‘Oi mai!’ dalana hahedinaraia totona Iesu be dahaka ia karaia? (b) Iesu ena hahediba taudia edia inai henia taudia be edena bamona idia diba idia be Iesu ena hahediba taudia?
5. Guba dekenai ia do giroa lou lasi neganai, Iesu ese ena hahediba taudia dekenai dahaka hahegani hereva ia henidia? Unai gaukara idia karaia ela bona edena negai?
6, 7. (a) Lauma dalanai ita goada totona dahaka ita karaia be namo? (b) Dahaka dainai nega ta ta ai haida edia heduru ita tahua be namo?
[Questions for Idia Do Manada Lasi]
1. Manada lasi taudia durua karana dekenai, idau negai Keristen taudia edia haheitalai namona be dahaka?
2. Tama sina be edena bamona edia manada lasi natudia idia durudia diba?
3-5. Timoteo Ginigunana 4:15 dekenai, Paulo ese Timoteo dekenai dahaka sisiba namona ia henia?