Kudouna Ibounai Ida Hesiai Gaukara Ita Karaia
Kahana 2: Gaukara Ena Moale Habadaia Dalana
1 Bema kara ta ita ura henia unai kara ita karaia be ia auka lasi. Danu, bema tau ta ia hegaegae guna, do ia karaia gauna do ia moalelaia. Unai be momokani iseda hesiai gaukara ita karaia namonamo totona danu.—2 Tim. 4:5.
HEGAEGAE BE GAU BADANA
2 Bema iseda hesiai gaukara karaia totona ita hegaegae guna bona unai gaukara be nega momo ita karaia, iseda moale unai gaukara dekenai do ia bada danu. Hegeregere, haroro gaukara ita karaia neganai bema tau ta ia gwau ia be Muslim tauna, dahaka do ita gwau diba? Ia hegaegae namonamo guna tauna reana do ia gwau: “Namo herea. Guna, lau be Muslim taudia ta ta sibona lau hereva henidia. To, oiemu tomadiho ena hahediba herevadia haida lau diba badina buka ta dekenai lau duahia. (Bema oi be mai emu Reasoning buka, rau 23 dekenai oi kehoa.) Ia gwau umui abia dae Iesu be peroveta tauna ta, to tau ta ladana Muhammad be peroveta tauna ginigabena bona badana. Unai hereva oi abia dae, ani? Oi abia dae Mose danu be peroveta momokani tauna, a? Dirava ese Mose ia hadibaia iena ladana be daika. Lau ura Buka Helagana amo unai hereva oi itaia. Ia namo?” Esodo 6:3 oi duahia diba. Unai bamona hereva amo reana umui kiki hebou dalana ta oi kehoa diba.
3 Ita momo, bema hereva ta ita tahua neganai, edena rau dekenai ia noho ita laloatao be ia auka. To bema ita hegaegae namonamo, Reasoning buka ena karoa ta, “Conversation Stoppers” [Ura Lasi Herevadia Haerelaia Daladia], gaukaralaia dalana ita manadalaia diba. Unai karoa ena rau haida dekenai, ita idia durua totona, tomadiho idauidau taudia ita haerelaidia diba daladia idia torea.
HEGAEGAE DALANA
4 Hesiai Hebou dekenai bema buka ta do idia kikilaia, namona be unai buka oi mailaia hebou dekenai, bona idia kikilaia herevana bona idia karaia haheitalai be unai buka dekenai oi hahegeregerea. Unai dala amo, haida edia hegaegae karana amo namo bada do oi abia diba.
5 Haroro gaukara karaia totona bema oi hegaegae guna namo do oi davaria. Namona be magasin bona buka oi abia hegaegae. Nega sisina lalonai Kiki Herevana oi itaia lou. Idia gwauraia Bible siridia oi duahidia, bona hua ena harihari gauna dekenai sivarai ta oi tahua do oi kikilaia totona. Ruma bese taudia be unai hegaegae karana idia karaia hebou be heduru namona.
6 Hegaegae totona, do umui kikilaia herevana umui karaia toho. Nega idauidau dekenai unai umui karaia diba—hegeregere, Kongregesen Buka Stadi murinai, tadikaka ta ena ruma dekenai umui lao neganai, motuka lalonai gabu ta dekenai umui heau neganai, bona haroro neganai ruma ta umui rakatania bona ruma ma ta umui lao henia neganai. Hegaegae totona kiki herevana ita henia toho neganai, ita kikilaia hebou neganai, bona taunimanima edia koua herevadia hanaia daladia ita haheitalaia neganai, moale ita davaria diba bona ita ia durua hesiai gaukara ita karaia namonamo totona.
7 Bema ita hegaegae namonamo, unai ese ita do ia hagoadaia iseda kudouna ibounai ida haroro gaukara do ita karaia totona, bena do ita karaia namonamo diba bona mai moale ida anina do ita davaria.—Ioane 2:17.
[Questions]
1, 2. (a) Hesiai gaukara ita karaia namonamo totona ita idia durua gaudia rua be dahaka? (b) Bema tau ta ia gwau, “Lau be Muslim tauna,” Esodo 6:3 ita duahia karana be edena bamona ita ia durua ia ida ita herevahereva totona?
3. Bema ita be mai iseda Reasoning buka, edena bamona ita gaukaralaia diba bema taunimanima idia ura lasi ita be idia danu Bible ena hereva ita herevalaia?
4-6. Ita hegaegae Iehova bona Basileia edia sivarai do ita harorolaia namonamo totona, ita idia durua gaudia haida oi gwauraia hedinarai.
7. Bema ita hegaegae namonamo haroro gaukara do ita karaia totona, dahaka hahenamo do ita davaria?