Kudouna Ibounai Ida Hesiai Gaukara Ita Karaia
Kahana 3: Ma Haida Idia Goada Idia Lao Totona Oi Durudia
1 Nega momo hesiai gaukara hadibaia karana idia haheitalaia neganai, lo tadikaka Paulo bona ia gaukara goadagoada tau matamatana Timoteo edia turana karana idia herevalaia. (1 Kor. 4:17) Paulo ese Timoteo ia hamaoroa Timoteo ia diba gaudia be ma haida dekenai ia henia. (2 Tim. 2:1, 2) Hari inai negai kongregesen lalonai unai bamona ita karaia.
2 Ma Haida Oi Hadibaia: Ita itaia ma haida ita hadibaia be gau badana, badina Papua New Guinea dekenai pablisa edia namba be lagani toi gunanai amo ma pablisa 300 dekenai ia bada ia lao. Reana idia momo be diba bada idia abia bema lo pablisa taudia ese idia hadibaia. Taihu ta be guna hua tamona tamona lalonai hora tamona eiava rua sibona ia haroro, to lo pablisa ta ese ia durua neganai ia haroro namonamo diba. Guna haroro gaukara ia ura henia bada lasi to gabeai ia be sivarai namona harorolaia goadagoada pablisa ta ai ia lao. Hari ia be pioneer goadana ta, bona iena gaukara dalana gunana ia laloa neganai ia gwau: “Ta ese lau ia hadibaia dahaka lau hereva, bena gabeai lau be hesiai gaukara lau moalelaia.”
3 Bema oi be elda ta, hesiai tauna ta, pioneer ta, eiava diba pablisa tauna ta, edena dala ai oi be ma haida oi durudia idia goada idia lao totona? Gau ginigunana be oiemu Kongregesen Buka Stadi naria tauna oi hamaoroa oi ura ma pablisa ta oi durua.
4 Gaukara Oi Karaia Namonamo bona Oi Hegaegae: Umui gaukara hebou totona nega umui makaia be durua dalana ta. Reana, ia haroro hamatamaia neganai, oiemu bamona ia gari bona ia diba lasi dahaka ia karaia be namo, to ta be ia ida ia gaukara hebou neganai do ia moale badina heduru ia abia diba. (Koh. 4:9) Bema dala ia noho, teritori umui abia hidi neganai, Bible herevadia idia ura idia kikilaia hebou taudia idia noholaia gabuna umui tahua. Unai ese matamata tauna do ia durua do ia hereva bona iena gari do ia ore totona.
5 Hadibaia dalana oi karaia noho totona, namona be kamonai taudia lou henia dalana oi herevalaia. Unai umui karaia totona namona be ruma tauna be nega ginigunana umui davaria neganai, henanadai ta umui henia bona umui hamaoroa umui giroa lou neganai haere umui henia diba. Namona be ia diba momo lasi pablisa oi durua ia hegaegae totona, bena iena lou henia dekenai ia giroa neganai ia danu umui lao. Bema stadi umui hamatamaia bona pablisa matamatana be karaia dalana dekenai ia daradara, reana lo pablisa tauna ese stadi nega haida ia naridia ela bona pablisa matamatana ia hegeregere ia ese ia naria totona.
6 Orea lalonai matamata taudia momo be idia vareai haraga dainai, ia hedinarai aonega dalana be haroro gaukara totona ita hadibadia namonamo. Namona be haroro gaukara dekenai idia manada vadaeni taudia amo heduru idia abia. Bema ta oi durua diba, gabeai, ia danu be “ma taunimanima haida dekenai unai hereva do [ia] gwauraia lou.”—2 Tim. 2:2.
[Questions]
1. (a) Korinto Ginigunana 4:17 duahia. Paulo be edena dala ai Timoteo ia durua vadaeni? (b) Timoteo Iharuana 2:1, 2 duahia. Paulo be Timoteo dekenai dahaka sisiba ia henia? Hari inai negai ita dekenai ena anina be dahaka?
2, 3. (a) Dahaka ese taihu ta ia durua ia be gaukara goadagoada pablisa ta ai ia lao bena gabeai pioneer goadana ta ai ia lao totona? (b) Bema ma haida oi durudia diba hesiai gaukara dekenai, dahaka oi karaia guna be namo?
4, 5. Pablisa matamatana hadibaia dalana karaia namonamo bona hegaegaelaia totona, dahaka umui karaia diba?
6. Badina be dahaka ita be 2 Timoteo 2:2 ena sisiba ita badinaia be gau badana hari inai nega lalonai?