Pablisa Matamatadia Hadibaia Idia Haroro Totona
1. Nega ginigunana ai haroro gaukara oi karaia neganai, emu hemami be edena bamona?
1 Nega ginigunana ai ruma-ta-ruma-ta haroro gaukara oi karaia negana oi laloatao, a? Reana unai neganai oi gari, ani? To emu hadibaia tauna o pablisa ma ta ida oi gaukara hebou neganai, oi ia durua dainai oi moale, ani? Hari oi be haroro gaukara oi manadalaia vadaeni dainai, namona be pablisa matamatadia ma haida oi durua idia haroro totona.
2. Pablisa matamatadia ese dahaka idia dibaia be namo?
2 Pablisa matamatadia idia ura haroro herevana hamatamaia dalana, Baibel gaukaralaia dalana, lou henia karaia dalana, Baibel stadi hamatamaia bona karaia noho dalana idia dibaia. Danu, namona be haroro daladia ma haida idia diba, hegeregere dala haroro bona bisinesi haroro. Emu kara bona heduru herevadia amo pablisa matamatadia oi durua diba, unai haroro daladia idauidau idia hanamoa totona.
3. Edena dala ai iseda kara ese ma haida ia durua?
3 Kara Amo: Iesu be ena hahediba taudia dekenai haroro dalana ia hahedinaraia. (Luka 8:1; 1 Pet. 2:21) Bema pablisa matamatana oi hamaoroa do umui gaukara hebou, namona be auka lasi o pablisa ese ia gaukaralaia diba haroro herevana ta—reana iseda buka ai idia noho haroro herevana ta—oi hegaegaelaia. Bena, pablisa oi hamaoroa oi be ruma ginigunana—o iharuana danu—do oi karaia, unai amo ia be emu haroro herevana ia kamonai diba. Reana ruma ginigunana umui rakatania neganai, ia oi nanadaia emu haroro herevana dekenai dahaka ia itaia. Unai amo do ia itaia haroro lalonai ma haida ia bamoa karana be mai anina bada, bona iena haroro herevana murinai ia oi durua neganai, emu heduru do ia abia dae.
4. Pablisa matamata ena haroro herevana ita kamonai murinai, edena bamona ita durua diba?
4 Hereva Amo: Iesu danu be ena hahediba taudia dekenai haroro dalana ia hadibaia. (Mat. 10:5-14) Pablisa matamatana be unai bamona oi durua diba. Ia ese ruma tauna ia haroro henia neganai, oi kamonai namonamo. Bena ruma tauna umui rakatania neganai, pablisa tauna oi hanamoa bona ia karaia namonamo gaudia haida oi gwauraia, herevana oi itaia ena haroro dalana ia hanamoa be namo. Heduru herevadia oi do gwauraia lasi neganai, namona be ruma iharuana ia karaia guna, unai amo do oi itaia unai haroro dalana ia hanamoa eiava lasi. Reana ia gari sibona. Danu laloatao, pablisa ta ta edia diba be idauidau, bona gau ta hamaoromaoroa dalana be idauidau.—1 Kor. 12:4-7.
5. Pablisa matamata dekenai dahaka heduru herevadia oi gwauraia diba?
5 Nega haida pablisa matamata ta be heduru totona oi do ia nanadaia. To bema ia henanadai lasi, oi ese ia oi durua. Edena bamona oi durua diba? Idia manada pablisa haida be inai bamona henanadai idia gaukaralaia, “Ia namo heduru herevana ta lau gwauraia?” o, “Emu haroro herevana be edena bamona oi laloa?” Eiava inai bamona oi hereva diba, “Lau be pablisa matamata neganai, lau dekenai ia auka gauna be . . . , to lau ia durua gauna be . . . . ” Nega haida Herevalaia bukana umui herevalaia hebou. Unai amo ena haroro herevana lalonai do ia gaukaralaia gauna sibona oi gwauraia, bona do ia lalohekwarahi lasi.
6. Haroro gaukara dekenai, edena dala ai ‘auri ta ese auri ma ta ia segea’?
6 Auri ta ese Auri ma ta Ia Segea: Paulo ese haroro gaukara ia manadalaia tauna Timoteo ia hagoadaia ena hadibaia gaukara do ia goadalaia noho, vadaeni taunimanima ibounai ese do idia itaia ena goada ia bada ia lao noho. (1 Tim. 4:13, 15) Herevana lagani momo lalonai haroro gaukara oi karaia vadaeni, to namona be emu haroro daladia oi hanamoa noho. Oi idia bamoa pablisa taudia amo gau haida oi dibaia, herevana idia haida be hari sibona haroro gaukara idia hamatamaia, bona oi hegaegae ma haida—gau badana be pablisa matamatadia—oi durua sivarai namona idia harorolaia namonamo totona.—Aon. 27:17.