Iehova Ena Hesiai Gaukara Dekenai Ita Gaukara Goada
1 Iehova ena hesiai gaukara ita karaia be maduna namona. Diba maoromaoro ia dekenai bona ena vara edea Natuna, Iesu, dekenai ita abia dainai, lalokau ese ita ia doria Iena ura ita karaia goadagoada totona. (Ioane 17:3) Reana iseda tauanina do idia hesiku, to Iehova ese ita do ia hagoadaia ita gaukara goadagoada noho totona.—Isa. 40:29.
2 Iehova Dirava bona Iesu Keriso ese ita dekenai lalokau bada idia hahedinaraia, unai dainai iseda moale idia dekenai edena bamona do ita hahedinaraia diba? (2 Kor. 5:14, 15) Dala badana ta be Iesu ena kara ita tohotohoa, ia ese ena Tamana ena ladana bona ena Basileia harorolaia gaukarana ia hesikulaia lasi. (1 Pet. 2:21) Bema abidadama goadana ita abia, iseda mauri ibounai lalonai Dirava ese ita ia henia sivarai namo harorolaia gaukarana do ita karaia.—Mat. 24:14.
3 Haroro gaukara ita karaia ena bada be dahaka? Taunimanima idia haroro nega ena bada be idauidau. Haida be idia buruka momokani, haida idia gorere, eiava mai edia maduna ruma bese lalonai. To ita ibounai be iseda kudouna ibounai danu Iehova ena hesiai gaukara ita karaia be gau badana. Anina be ita ta ta ibounai be haroro gaukara ita karaia goadagoada, unai amo iseda abidadama ena goada ita hahedinaraia bona iseda gwauhamata ita hamomokania. (2 Tim. 2:15) Dala idauidau dekenai ita ta ta ibounai be unai ita karaia diba. Unai dala haida be dahaka?
4 Iseda Haroro Gaukara Habadaia Daladia: Gau ginigunana be ita ura iseda haroro gaukara dalana ita hanamoa. Unai ita karaia diba bema hahediba gaukara dekenai iseda diba ita habadaia. Haroro School ena badina badana ta be ita ia durua haroro gaukarana namona ita karaia totona. School ena hereva ta ita hegaegaelaia neganai, iseda haroro gaukara edena bamona ia durua diba ita laloa, a? Iseda haroro gaukara durua totona School lalonai ita idia henia sisibana ita badinaia, a? (sgMO rau 22-24) Danu, Hesiai Hebou dekenai haroro gaukara durua totona hereva namodia momo ita idia henia. Namona be kara haraga unai heduru herevadia ita badinaia.
5 Gau iharuana be iseda nega ita haria namonamo heduru pioneer eiava regular pioneer gaukara do ita karaia totona. Bema unai bamona do ita karaia, iseda Tamana, Iehova, ena hesiai gaukara do ita karaia goadagoada noho diba. (1 Kor. 15:58) Pioneer gaukara oi karaia diba lasi neganai dahaka oi karaia diba? Namona be pioneer taudia edia lalohadai oi abia bona idia bamona haroro gaukara do oi ura henia bada bona teritori dekenai idia noho taudia do oi ura durudia momokani. Danu, namona be emu nega oi gaukaralaia kamonai taudia oi lou henidia bona Bible amo oi stadi henidia totona, bena unai amo idia oi durudia Iehova bona ena ura karadia idia diba totona.
6 Bema haida idia boiridia hesiai taudia momo lasi gabudia dekenai do idia lao totona bona unai hereva dainai ita lao, reana unai ese iseda goada lauma dalanai do ia habadaia. (Isa. 6:8) Haida be kongregesen ma ta dekenai idia lao badina unuseniai elda taudia be momo lasi, eiava unai kongregesen idia ura heduru idia abia edia teritori ibounai idia haroro henia totona. Unai bamona idia karaia taudia ese hahenamo momo idia davaria vadaeni.
7 Hereva momokani ita diba matamaia neganai, Iehova bona Keriso Iesu ita lalokau henidia dainai, iseda mauri lalonai gau momo ita haidaua vadaeni. Hari, iseda guba Tamana ita bamoa karana bona iena Natuna be ita totona ia karaia karana ita lalodia bada dainai, iseda mauri ma ita haidaua diba iseda haroro gaukara do ita habadaia totona, a? Namona be ita ta ta ibounai be ita gaukara goadagoada bona Iehova ena hesiai gaukara lalonai gaukara momo ita karaia noho.—Roma 12:11.
[Questions]
1. (a) Ioane 17:3 duahia. Lalokau ese ita ia doria dahaka do ita karaia totona? (b) Isaia 40:29 ese ita dekenai dahaka hagoadaia herevana ia henia?
2. (a) Iehova bona Iesu ese ita dekenai lalokau idia hahedinaraia dainai, dahaka ita karaia iseda moale idia dekenai ita hahedinaraia totona? (b) Abidadama goadana ese ita do ia durua dahaka do ita karaia totona?
3. (a) Keristen taudia ta ta iboudiai edia maduna be dahaka? (b) Timoteo Iharuana 2:15 duahia. Ita ia hagoadaia dahaka do ita karaia totona?
4. Iseda diba haroro gaukara dekenai ita habadaia totona, Society ese ita idia henia heduru gaudia rua be dahaka? Dahaka dainai unai heduru herevadia ita badinaia haraga be namo?
5. (a) Iehova ena hesiai gaukara ita karaia goadagoada daladia ma haida be dahaka? (b) Bema pioneer gaukara ita karaia be dala lasi, dahaka ita karaia diba?
6, 7. (a) Hereva momokani ita diba matamaia neganai dahaka ita karaia vadaeni? (b) Ena be nega daudau hereva momokani lalonai ita noho, to namona be ita sibona dekenai dahaka henanadai do ita henia?