Basileia Gaukara be Kohu Namona Dainai Ita Habadaia
1 Iesu ia gwau Basileia ena helaro be davana bada kohu bamona. (Mat. 13:44-46) Iesu ena parabole lalonai taunimanima haida ese edia kohu ibounai idia hoihoilaia mai anina bada gauna do idia hoia totona. Ita be idia bamona, a? Bema oibe, ena be unai ita karaia neganai ita hekwarahi bona iseda ura haida ita reaia, to Dirava ena Basileia do ita atoa guna.—Mat. 6:19-22.
2 Iseda Basileia gaukara be kohu namona dainai, namona be ita ura ita habadaia. Iseda mauri lalonai dahaka ita karaia? Iseda Basileia gaukara ita habadaia, a? Ita habadaia diba daladia be ruma-ta-ruma-ta gaukara, lou-henia gaukara, Baibel stadi gaukara, bona gabu idauidau bona nega idauidau ita haroro.
3 ‘Egu Haroro Gaukara be Edena Bamona Do Lau Habadaia Diba?’ Hesiai lagani matamatana ia matamaia dainai, namona be ta ta sibona sibona be ena gaukara do ia tahua namonamo, bona dala do ia tahua ena haroro gaukara ena nega do ia habadaia totona, bona sibona ia nanadaia gauna be inai: ‘Dala lau hegaegaelaia diba nega ta ta dekenai eiava hua iboudiai heduru pioneer gaukara do lau karaia totona, a? Bema kara haida lau haidaua, regular pioneer gaukara do lau karaia diba, a?’ Bema September 1 ia do mai lasi neganai edia ladana idia henia, unai pioneer matamatadia be vaira lagani dekenai Pioneer Gaukara School dekenai idia lao diba.
4 Pablisa haida ese edia lalona idia hadaia gabu idauidau bona nega idauidau dekenai edia haroro gaukara idia habadaia totona. Nega momo unai gaukara amo huahua momo idia davaria. Ma haida idia laloa namona be edia lou-henia gaukara idia hanamoa eiava Baibel stadi matamatadia do idia tahua.
5 Bema ita itaia gau ta dainai iseda haroro gaukara ia bada momokani lasi, dahaka do ita karaia haroro gaukara habadaia totona? Edia gaukara idia habadaia vadaeni taudia haida idia gwau, namona be emu lalona oi hadaia bona herevana dahaka do ia vara, Basileia ena gaukara do oi atoa guna. (Mat. 6:33) Unai do oi karaia totona gau badana be Iehova dekenai oi abidadama bona ia sibona dekenai oi tabekau. (2 Kor. 4:7) Emu lalona ibounai ida oi guriguri noho karana amo iena heduru oi tahua. (Luka 11:8, 9) Ita diba momokani bema ita goada karaia iseda nega Iehova ena hesiai gaukara dekenai do ita habadaia totona, ia ese iseda gaukara do ia hanamoa.—1 Ioa. 5:14.
6 Edia haroro gaukara idia habadaia vadaeni tadikaka bona taihu ida oi herevahereva. Oi nanadaidia hekwakwanai be edena bamona idia hanaia bona dahaka dainai idia lalo-manoka lasi. Idia dekenai idia vara gaudia be reana oi idia durua, bena do oi lalo-parara, dala ia noho emu haroro gaukara do oi habadaia diba totona.
7 Gima Kohorona magasin eiava Iseda Basileia Gaukara pepana lalonai haroro gaukara ia gwauraia sivaraidia oi duahidia neganai, mai emu guriguri danu dala oi tahua unai heduru hereva be emu haroro gaukara dekenai do oi badinaia totona. Kongregesen heboudia dekenai eiava hebouhebou dekenai oi lao neganai unai bamona do oi karaia be namo danu. Inai hereva dekenai ita kikilaia heduru herevadia be hari lagani ena sekit hebouhebou ena program amo. Ia be sivarai ginigunana, murinai sivarai ma haida do idia halasia, bona unai hereva ese ita idia hagoadaia hebouhebou dekenai ita kamonai herevana ita badinaia totona.
8 Iesu ese ena haroro gaukara ia laloa bada, ia atoa guna. Ia gwau: “Egu aniani be inai, lau ia siaia Diravana ena ura do lau karaia.” (Ioa. 4:34) Ita be unai bamona ita laloa, a? Bema oibe, dala do ita tahua iseda haroro gaukara do ita habadaia diba totona, bona taunimanima dekenai “kara namodia” ita karaia, iseda kohu namodia amo ita durudia.—Mat. 12:35; Luka 6:45.
[Questions]
1. Dirava ena Basileia ita atoa guna neganai, reana ita dekenai dahaka ia vara?
2. Iseda haroro gaukara do ita habadaia totona dahaka ita karaia diba?
3. (a) Ta ta sibona sibona be hesiai lagani matamatana ia matamaia neganai, dahaka ia karaia diba? (b) Dahaka dainai unai ita karaia be namo?
4. Dahaka kara haida ita karaia diba eiava ita hanamoa diba?
5. Iseda haroro gaukara habadaia totona, dahaka be gau badana?
6. Edia haroro gaukara idia habadaia vadaeni taudia ida ita herevahereva neganai, edena bamona ita ia durua?
7. Magasin dekenai idia torea sivaraidia ita duahia, bona kongregesen heboudia bona hebouhebou dekenai haroro gaukara idia kikilaia sivaraidia ita kamonai neganai, dahaka ita karaia be namo?
8. (a) Iesu ese ena haroro gaukara be edena bamona ia laloa? (b) Iseda haroro gaukara do ita habadaia totona, dahaka ese ita ia hasiahua?