Lou-Henia Gaukara Ena Maduna Oi Huaia
1 Lou-henia gaukarana ita karaia totona ita idia hagoadaia gaudia haida idia noho. Ita ura ita idia henia hesiai gaukarana ita karaia namonamo, Paulo ese ia karaia bamona. (Kara 20:21, 24) Bema ita goada karaia kamonai taudia iboudiai ita lou henidia totona, iseda lalona ena mamina do ia namo bona iseda hesiai gaukara ibounai do ita karaia namonamo.—2 Tim. 4:5.
2 Diba Ita Abia Neganai Maduna Ita Abia Danu: Taunimanima be idia mase garina namona be lou-henia gaukarana ita karaia namonamo. (Ioane 17:3) Iehova ena hahemaoro karadia ita diba, bona ita diba Aramagedono be ia kahirakahira, unai dainai namona be kara dika idia karaia taudia ita hamaorodia idia diba totona, to unai sibona lasi, namona be “kara dika rohorohodia iboudiai, hanua lalonai idia karaia ese idia taitailaia bona idia ganaganalaia taudia” ita durudia danu. (Esek. 9:4) Namona be idia ita durudia Iehova ena tanobada oreana lalonai idia vareai totona.
3 Hereva momokani ena diba maoromaorona idia lalo-pararalaia totona, taunimanima be heduru idia abia be gau badana. (Kara 8:30, 31; 18:26) Unai be lou-henia gaukara ena maduna ita huaia ena badina ma ta, ita be taunimanima dekenai ita lou henidia ita hadoa hereva momokani uhedia ita “dairia” totona. Guna, ta ese ita ia lou-henia loulou, diba maoromaoro Iehova bona Iena ura dekenai ita ia hadibaia totona. Bema unai bamona ia karaia lasi, lauma dalanai ita goada diba lasi, ani?—Mat. 7:12.
4 Lalokau bona Lalo-Goada Oi Hahedinaraia: Lou-henia gaukarana be dala namona ta iseda lalokau taunimanima dekenai ita hahedinaraia totona. Pioneer tadikaka ta be matakepulu tauna, bona ia gwau: “Bapatiso lau abia ena nega amo ia mai hari, lau ura dikadika Bible dekenai lau diba gaudia be ma taunimanima dekenai lau hadibaia. Ena be egu matana idia dika, to lau moale badina unai ese lau ia koua lasi; unai hahediba gaukarana lau karaia diba. . . . Danu, egu kwarana dekenai, dala dekenai ruma hida idia noho lau laloatao, bona unai amo Bible stadi idia ura henia taudia lau lou henidia diba.” Unai matakepulu tadikakana be ena kudouna amo ia itaia bamona, bona ia goada karaia lou-henia gaukarana bona ena Keristen lalokau karana taunimanima dekenai ia hahedinaraia totona.
5 Lou-henia gaukarana ita karaia neganai, nega momo dala ia kehoa Bible ita gaukaralaia namonamo diba totona, bona iseda abidadama kara ena badina haida ita kikilaia diba totona. (1 Pet. 3:15) Unai ese ruma tauna ia durua, to unai sibona lasi, ita ia hagoadaia danu hereva momokani ita laloa bada totona. Lou-henia gaukarana amo moale ita abia; unai bamona moale be ma gau ta amo ita abia diba lasi. Bona unai moale ena bada ita dogoatao noho diba. Bema mai goada danu lou-henia gaukarana ita karaia hanaihanai iseda moale ena bada do ia ore lasi.—Her. 10:22.
6 Iseda lou-henia gaukara ena maduna ita laloa bada be gau badana. Iehova ena taunimanima be idia ura gau namodia taunimanima dekenai idia henia, unai ia hedinarai goevagoeva tanobada ibounai ena 1991 ena hesiai lagani ena ripoti dekenai. (Her. 3:27) Unai lagani lalonai ita karaia lou-henia ena namba be 344,926,952, bona ita karaia Bible stadi ena namba be 3,947,261. Hahediba matamata taudia 300,945 ese Iehova dekenai edia mauri idia gwauhamatalaia bona bapatiso idia abia. Unai bamona ia vara badina mai iseda ura danu lou-henia gaukarana ita goadalaia.—1 Tes. 2:8.
[Questions]
1. Dahaka gau rua ese ita idia hagoadaia lou-henia gaukarana ita karaia totona?
2. (a) Ioane 17:3 duahia. Unai siri ese ita ia durua ita bona taunimanima ma haida dekenai dahaka ita karaia totona? (b) Dahaka ita karaia Esekiel 9:4 ia herevalaia taudia ita durudia totona?
3. (a) Etiopia tauna be dahaka do ia abia be namo? (b) Priskila bona Akula edia haheitalai namona be dahaka, ita tohotohoa totona?
4. Unai matakepulu tadikakana be edena bamona ena kudouna amo gau haida ia itaia bamona?
5. Bema mai goada danu lou-henia gaukarana ita karaia, dahaka hahenamo do ita abia?
6. Lagani 1991 ena hesiai laganina lalonai iseda orea ia bada ia lao ena badina ta be dahaka?