Lou-Henia Gaukara Karaia Ena Maduna
1 Ita be sivarai namona harorolaia taudia dainai, hahegani ita abia taunimanima be hahediba taudia ai do ita halaodia totona. (Mat. 28:19, 20) Unai ita karaia totona lou-henia gaukarana ita karaia be gau badana. Unai be iseda mai anina bada Keristen hesiai gaukara ena kahana ta; unai gaukara oi laloa bada, a? Oiemu diba lou-henia karaia gaukarana dekenai oi habadaia neganai do oi moale.—Her. 22:29.
2 Gwauhamata Keristen taudia ta ta iboudiai be mai edia maduna taunimanima be hahediba taudia ai do idia halaodia totona. Unai ita karaia totona iseda ura haida ita reaia taunimanima dekenai Basileia ena helaro do ita harorolaia totona. Lou-henia gaukarana amo ita be kamonai taudia ita durudia diba lauma dalana ai do idia hegeregere totona.
3 Kamonai Taudia Iboudiai Lou Henidia: Basileia ena sivarai idia kamonai henia taudia iboudiai ita lou henidia be gau badana. Ena be taunimanima haida be idia ura lasi iseda harihari gaudia idia abia, to idia momo be kamonai taudia. Idia hahedinaraia idia be kamonai taudia badina idia ura ita danu Bible ena hereva idia kikilaia. Iesu bona aposetolo taudia ese idia hahedinaraia bema kamonai taudia danu Bible ena hereva ta ita kikilaia, unai ese edia lalona ia veria diba Basileia ena sivarai ma haida do idia ura kamonai henia totona.—Mar. 10:21; Kara 2:37-41.
4 Namona be lou-henia gaukarana ita karaia badina ita ura Bible stadi ita hamatamaia. Reana ruma tauna dekenai Bible stadi karaia dalana do ita hahedinaraia diba. Bema oi guriguri heduru oi abia kudou-maoro tauna ta do oi davaria bona oi hadibaia totona, Iehova ese oiemu guriguri do ia haerelaia. Iehova ese oiemu hekwarahi bada iena hesiai gaukara dekenai do ia hanamoa. Namona be Iehova ena heduru oi tahua bona emu lalona oi hadaia Bible stadi ta do oi hamatamaia totona, ani?
5 Pepapepa Gaukaralaia Namonamo: Pepapepa oi gaukaralaidia namonamo diba Bible stadi oi hamatamaia totona. Tadikaka bona taihu momo ese laulau idia kikilaia karana amo kiki hebou dalana idia kehoa diba. Namona be ruma tauna danu paragraf ta ta oi duahia bena murinai anina oi kikilaia. Bema paragraf lalonai henanadai ia noho, oi duahia murinai ruma tauna oi nanadaia iena lalohadai unai henanadai dekenai be dahaka. Namona be Bible siri iboudiai oi duahidia bona ia dekenai edia anina oi hahedinaraia. Bena murinai pepapepa dekena amo stadi hamatamaia herevana oi kikilaia diba.
6 Reasoning Bukana Eiava Bible Ena Hereva Badadia Buklet Oi Gaukaralaia: Reasoning bukana eiava Bible Ena Hereva Badadia buklet gaukaralaia karana amo lou-henia gaukarana oi karaia namonamo diba. Ruma tauna do oi lou henia bona iena diba Bible dekenai oi habadaia totona, namona be hereva namona ta Reasoning buka ena Index amo eiava Bible Ena Hereva Badadia buklet amo oi abia hidi do umui kikilaia totona. Reasoning bukana dekenai, sinado maragina ladana Scriptures Often Misapplied henunai hereva haida ese oi idia durua diba taunimanima edia henanadai oi haerelaia totona. Pioneer taudia idia gwau Reasoning buka ena rau 204 dekenai, How do Jehovah’s Witnesses arrive at their explanations of the Bible? henunai ia noho heduru herevadia idia badinaia dainai, nega momo Bible stadi idia hamatamaia. Idia be kamonai taudia dekenai idia hahedinaraia Bible ese hereva ibounai ia hamomokania. Unai dala namona amo Bible stadi momo idia hamatamaia.
7 Iesu bona aposetolo taudia hegeregeredia, namona be Iehova ena mamoe taudia durua karana ita laloa bada. (Luka 9:11) Bema taunimanima ita lalokau henidia bada, unai ese ita ia durua idia dekenai Basileia ena hereva momokani ita haroro henidia totona. (2 Kor. 2:17) Lauma dalanai taunimanima ita durudia karana ita laloa bada neganai, ita ese lou-henia gaukara ena maduna do ita huaia diba.
[Questions]
1, 2. (a) Dahaka dainai lou-henia gaukarana ita karaia? (b) Hereva Lada-isidia 22:29 oi duahia. Unuseniai dahaka sisiba namona ia noho? (c) Lou-henia gaukarana ena namo be dahaka?
3. (a) Daidia do ita lou henidia be namo? (b) Mareko 10:21 oi duahia. Iesu ena kara amo dahaka ita diba?
4. (a) Ita ta ta ibounai be dahaka ita tahua be namo? (b) Dahaka do ita karaia ita tahua gauna do ita hagugurua totona?
5. Bible stadi hamatamaia totona pepapepa be edena bamona ita gaukaralaia diba?
6. Lou-henia karaia neganai, Reasoning bukana be edena bamona oi gaukaralaia namonamo diba? Bible Ena Hereva Badadia buklet be edena bamona oi gaukaralaia diba?
7. Dahaka ese ita ia durua lou-henia gaukarana do ita karaia totona?