Haroro Gaukara Hegaegaelaia Dala Namodia
1 Reana oi be hesiai gaukarana ta oi karaia lasi badina oi diba lasi dahaka do oi herevalaia, a? Bema unai bamona, do oi moale badina Iseda Basileia Gaukara pepana dekena amo heduru hereva momo do idia halasia.
2 Iseda Basileia Gaukara pepana lalonai heduru hereva momo do idia torea, iseda ruma ta ruma ta, lou-henia, eiava Bible stadi gaukaradia lalonai ita gaukaralaidia totona. Unai heduru herevadia ese ita do idia durua bona do ita laloa namonamo diba edena hereva do ita ura gaukaralaia. Haroro totona oi hegaegae neganai, namona be oiemu teritori dekenai ia hegeregere kiki herevana ta oi abia hidi. Bena murinai, oi laloa namonamo, unai kiki herevana be ia hegeregere do oi henia totona, eiava oi laloa namona be oi haidaua sisina, ena anina oiemu teritori dekenai idia vara gaudia ia hahedinaraia totona, eiava oi haidaua sisina oi manadalaia herevana do oi henia totona. Oi haroro neganai, bema oi sibona emu hereva dalana amo sivarai oi kikilaia, oiemu hereva ena mamina do ia namo. Oi ura emu hesiai gaukara oi habadaia, a? Namona be oi do karaia lasi hesiai gaukarana ena kahana ta oi karaia toho. Reana unai heduru herevadia ese oi do idia durua unai bamona do oi karaia totona.
3 Bema oi ese haroro gaukara totona hebou ta oi naria, namona be Iseda Basileia Gaukara lalonai idia noho heduru herevadia oi diba namonamo. Namona be oiemu pepa oi stadilaia namonamo, bona oi hahedinaraia oiemu teritori dekenai edena hereva umui gaukaralaia be ia namo.
4 Ita ibounai be ita karaia namonamo diba gaudia ita moalelaidia. Ai ura dikadika inai heduru herevadia ese matamata taudia bona idia manada vadaeni pablisa taudia danu do idia durudia edia Basileia haroro gaukarana idia karaia namonamo totona bona idia moalelaia totona.