Lou-Henia Oi Karaia Neganai Dahaka Do Oi Herevalaia?
1 Iseda haroro gaukara ita karaia namonamo totona, hegaegae be gau badana, bena kamonai taudia ita lou henidia neganai, edia lalona ita veria diba hereva ma haida ita kikilaia hebou totona. Edena bamona unai ita karaia diba?
2 Keristen momokani taudia be taunimanima idia laloa momo, unai dainai ta oi lou-henia neganai, nega ginigunana oi vadivadi henia neganai umui kikilaia herevana ma oi gwauraia lou sisina.
Bema guna tau ta ia gwau raskol karadia dainai ia lalo-hekwarahi momo, reana oi gwau diba:
◼ “Guna ita herevahereva hebou neganai, oi gwau kara dika ia bada ia lao dainai oi lalo-hekwarahi momo. Oi laloa bema polisi momo idia gaukara, unai dika do idia haorea diba, a?”
Bema tau ta ia lalo-hekwarahi tanobada dekenai idia vara gaudia dainai, reana oi gwau diba:
◼ “Guna ita herevahereva hebou neganai, oi ese mai anina bada herevana ta oi gwauraia, oi gwau tanobada dekenai maino ia bada lasi. Oi laloa tanobada lohia taudia ese tanobada do idia hanamoa bona do idia hamatamataia diba, a?”
Bema tau ta ia gwau ia lalohisihisi taunimanima be sibodia edia namo idia tahua momo dainai, reana oi gwau diba:
◼ “Guna ita herevahereva hebou neganai, hereva badana ta oi gwauraia, oi gwau taunimanima momo be idia mataganigani. Oi laloa Dirava ena lalohadai mataganigani taudia dekenai be dahaka? Efeso 5:5 dekenai Bible ena hereva be inai.”
Idia gwauraia hereva namodia ma haida be inai:
◼ “Guna ita herevahereva hebou dainai lau moale, unai dainai ma hereva ta lau tahua ita kikilaia totona, unai hereva be Iehova ese ruma lasi taudia edia hekwarahi ia diba. Namona be iena hereva Isaia 65:21-23 dekenai ita itaia.” “Lau moale badina guna oi gwau taunimanima be gavamani namona idia abia be namo.” “Guna henanadai namona ta oi gwauraia, oi gwau Dirava ese tomadiho iboudiai ia abidia dae eiava lasi?” “Guna ita be vaira neganai taunimanima do idia davaria gaudia be Dirava eiava siahu ta ese ia gwauraia hidi guna ena sivarai ita kikilaia neganai, lau laloa momo.” “Guna ita kikilaia herevana lau do laloa noho, bona lau diba inai buka, Tau Hereadaena, lalonai, inai hereva do oi moalelaia. (Ruma tauna dekenai unai hereva haida oi hahedinaraia diba).”
3 Atai dekenai ai torea hamatamaia herevadia ese idia hahedinaraia guna ruma taudia danu ita kiki hebou herevana ita moalelaia, bona ita ura ma ita hereva henidia lou.
4 Lou-henia oi do karaia lasi neganai, namona be oi laloa namonamo guna dahaka do oi herevalaia. Lou-henia ta ta iboudiai dekenai hereva tamona ita gwauraia lasi, to hereva idauidau ita gaukaralaidia be namo.
Bema oi lou henia tauna be ia bisi, reana oi gwauraia hereva namona be inai:
◼ “Lau diba oi bisi, to oi gaukara noho lalonai namona be inai hereva oi laloa. (Mataio 5:3 duahia).” Eiava oi gwau diba: “Bible siri toi lau torea oi duahia totona. Hari oi bisi dainai ita herevahereva diba lasi, to lau torea gauna oi abia bona ma nega ta dekenai do lau giroa mai bena miniti 5 bamona unai siri do ita kikilaia hebou.”
Hagoadaia lasi herevadia ita gwauraia be namo lasi:
◼ Ruma tauna dekenai hagoadaia lasi henanadai ita henia eiava unai henanadai ese unai tau ia hahemaraia, unai ese namo ta ia havaraia lasi. Unai henanadai haida be inai: “Lau rakatania bukana oi duahia, a?” “Henanadai haida oi ura gwauraia, a?” “Lau oi laloatao, a?” “Hari lau mai badina lau ura diba, oi ura Dirava ena ura inai tanobada dekenai ita kikilaia eiava lasi?”
5 Kamonai taudia ita do lou henidia lasi neganai, gau badana be ita hegaegae namonamo guna. Unai neganai mai iseda ura danu ita durudia namonamo diba.