Kamonai Taudia Durudia
1 Iseda magasin bona tiokratik buka ma haida ita hariharilaidia neganai, ita ese Iesu Keriso ia gwauraia sivaraina ita harorolaia. Unai dainai namona be ita goada karaia idia kamonai taudia iboudiai ita lou henidia totona.
2 Bema Noga! magasin ena hereva ta umui kikilaia bona ruma tauna ese unai hereva ia moalelaia, oi lou henia neganai namona be unai sivarai dekenai hereva ma haida oi kikilaia, reana unai hereva ia hamomokania Baibel siri tamona umui kikilaia bona paragraf tamona eiava rua umui duahidia. Bema ia ura ia kamonai noho, namona be oi hamaoroa Noga! magasin ese ena ruma bese taudia iboudiai ia durudia diba. Magasin matamatadia ta ta iboudiai ese sivarai idauidau idia kikilaia, hegeregere tanobada ia noho goeva dalana, sibona ita hanamoa dalana, hari idia vara hekwakwanai haheaukalaidia dalana, bona memero kekeni idia lalo-hekwarahilaidia henanadaidia. Bema ta ia ura momokani ia kamonai, namona be oi hamaoroa Noga! magasin English gado ai ena sabskripsen ia abia diba bona hua 6 lalodiai magasin ibounai 12 do ia davaria. Bema ruma tauna be Hiri Motu gado sibona ia diba Noga! sabskripsen ia abia diba lasi, to ita hamaoroa lagani tamona lalonai Noga! magasin matamatadia hani idia halasidia, bona bema ia ura ta ta idia halasidia neganai, iena ruma dekenai do oi mailaia diba.
3 Bema ruma tauna be Noga! magasin matamatana dekenai sivaraidia ia ura henia lasi be edena bamona? Namo lasi emui kiki oi hadokoa, to namona be Iehova ena Witness Taudia be Lalo-Tamona ai Dirava ena Ura Idia Karaia Tanobada Ibounai Dekenai buklet amo, eiava Reasoning buka ena rau 206 amo, ruma tauna dekenai Iehova ena Witness taudia edia gaukara dalana oi hadibaia.
4 Bema guna “Gima Kohorona” eiava “Noga!” magasin ta oi hariharilaia neganai oi ese 2 Timoteo 3:1-5 oi herevalaia, bona magasin ena rau 2 herevana oi kikilaia, oi lou henia neganai reana inai bamona do oi hereva:
◼ “Guna ita kiki hebou neganai, hari inai negai tanobada dekenai idia vara gaudia edia anina ita kikilaia. Taunimanima momo herea be Dirava bona Baibel lalonai ia gwauraia mauri taravatudia idia laloa bada lasi. Unai dainai taunimanima idia kara heheni dalana ia haidaua, 2 Timoteo 3:1-5 ena hereva hegeregerena. Oi laloa dina vairadiai kara namodia do idia vara ena helaro be mai ena badina, a?” Naria ia haere totona, reana 2 Petero 3:13 do oi duahia ia laloa totona, bona taunimanima totona Basileia ese dahaka do ia karaia oi hahedinaraia.
5 Ruma tauna oi lou henia neganai, reana oi itaia ia ura lasi ena tomadiho umui kikilaia, ia laloa unai be ia sibona ena gau. Reana inai bamona do oi hereva diba:
◼ “Hari, tanobada ia maragi ia lao bamona badina loaloa bona sivarai siaia daladia idia haraga idia lao dainai, bona ena be ita ura eiava ita ura lasi, to tanobada ibounai lalonai tomadiho idauidau idia noho dainai daradara ia havaraia. Unai dainai, bema iseda lalohadai ita hahedinarai heheni unai ese ita ia durua idau tomadiho taudia danu ita herevahereva hebou namonamo diba totona. Tomadiho hahediba herevadia dainai taunimanima edia inai heheni karana sedira do ia hamaragia diba. Dahaka oi laloa?” Naria ia haere totona, bena murinai ruma tauna ena lalona oi veria Mauri Hanaihanai buka ena rau 8 dekenai ia itaia totona.
6 Namona be ita goada karaia hereva momokani idia kamonai henia taudia iboudiai do ita lou henidia totona bona ita durudia mauri hanaihanai ia lao henia dalana do idia rakalaia totona.—Ioane 4:23, 24.
[Questions]
1. Dahaka dainai kamonai taudia iboudiai ita lou henidia be gau badana?
2. Noga! magasin ia abia tauna oi lou henia neganai, edena bamona oi durua noho diba?
4. Gima Kohorona magasin ia abia tauna oi lou henia neganai, dahaka do oi hereva?
5. Bema ruma tauna ia ura lasi iena tomadiho umui kikilaia hebou, dahaka do oi karaia diba?