Iehova Hanamoa Totona Emu Gaukara Oi Habadaia Diba, A?

(Kahana 1)

¹ Hereva kwarana be mai anina bada henanadaina ita iboudiai ita laloa totona. Mai iseda abidadama danu iseda biaguna Iesu Keriso ita tohotohoa, hari inai negai iseda Dirava ita hanamoa dalana be iena ladana ita harorolaia. Dirava ese ita ia lalo-namo henia totona unai gaukara ena maduna ita huaia be gau badana. (Mar. 13:10; Luka 4:18; Kara 4:20; Heb. 13:15) Unai sivarai namona be maduna namona, idia do boio “mamoe” dekenai ita mailaia bona reana Iehova ena orea lalonai do idia vareai​—oibe, ia be moale gaukarana!​—Ioane 10:16.

² Iehova hanamoa totona oi bona emu natudia be emui haroro gaukara umui habadaia diba, a? Tanobada hegegemadai, emu tadikaka bona taihu be pioneer gaukara idia karaia, bona edia namba be ia bada ia lao noho. April 1992 ai, United States dekenai, special, regular, eiava heduru pioneer gaukara idia karaia taudia be 172,145. April, 1992 ai, Papua New Guinea dekenai, pioneer gaukara idia karaia taudia be 464. Pioneer gaukara oi lalohadailaia namonamo, a? Oiemu natudia oi hagoadadia nega ibounai hesiai gaukarana do idia tahua totona, a?

³ Namona be oiemu lalohadai pioneer gaukara dekenai oi tahua, ani? Pioneer gaukara idia kikilaia neganai, oi be karaharaga oi gwau oi be mai emu maduna dainai pioneer gaukara oi karaia diba lasi, a? Momokani, taunimanima haida be pioneer gaukara idia karaia diba lasi. Baibel ia gwauraia maduna idia huaia dainai, eiava ma gau ta dainai, nega ibounai hesiai gaukarana idia karaia diba lasi. (1 Tim. 5:8) To hari, mai guriguri danu pioneer gaukara lalohadaina oi karaia, a? Emui ruma bese taudia umui kiki hebou idia ta do ia pioneer diba totona, a? July 1, 1983, Gima Kohorona ena rau 24 dekenai inai lalona veria herevana ia noho: “Namona be Keristen hesiai taudia iboudiai be mai edia guriguri danu idia laloa namonamo, pioneer gaukara do idia karaia diba eiava lasi. South African tauna ta mai ena adavana danu, lagani 15 lalonai pioneer gaukara idia karaia vadaeni taudia, be idia gwau: ‘Dahaka dainai pioneer gaukara ai karaia noho? Bema ai karaia lasi, aiemai kerere Iehova vairanai ai hunia diba lasi, ani?’ Pioneer gaukara idia karaia lasi taudia be sibodia dekenai inai bamona idia henanadai be namo: ‘Pioneer tauna ai lau lao lasi ena badina maorona be Iehova vairanai lau gwauraia hedinarai diba, a?’ ”

⁴ Gima Kohorona magasin ma ta lalonai unai sivarai dekenai ia gwau: “Ita ta ta ibounai be siboda do ita koia lasi. Reana oi gwau, ‘Lau ura, to egu tauanina be ia manoka,’ a? To momokani oi ura, a? Bema ita ura lasi karaia, namo lasi eksius ita gwauraia; ita gwau tauanina ia manoka.”​—w78 8/15 rau 23.

⁵ Idia Ura Edia Natudia Idia Kwalimu Tamadia bona Sinadia: Hereva Lada-isidia 15:20 ia gwau: “Aonega merona ese ena tamana ia hamoalea.” Dirava ena hereva idia badinaia tamadia bona sinadia idia moale bada herea bema edia natuna memero bona kekeni be idia gwauhamata bona edia mauri lalonai Iehova ena gaukara idia ura karaia. To, emui natudia be unai aonega dalana be sibodia do idia abia hidi diba lasi. Inai tanobada ena siahu be bada bona edia lalona ia veria diba. Tama sina e, umui laloa bada gaudia be emui natudia do idia laloa bada. Bema hanaihanai nega ibounai hesiai gaukara ena namo umui herevalaia, bema hanaihanai emui natudia umui hagoadaia pioneer taudia do idia bamodia totona, bema gaukara iboudiai amo oi diba momokani nega ibounai hesiai gaukarana be hereadae emui natudia idia karaia totona, vadaeni emui hagoadaia herevana do idia abia dae. Oi durudia bena do idia diba, taunimanima vairanai lasi, to Iehova vairanai ladana namona do idia abia be namo.

⁶ Memero kekeni e, umui abia hidi dala namona be Hereva Lada-isidia 22:1 lalonai, ia gwau: “Ladana namo abia hidi ese kohu momo ia hanaia; taunimanima ese ita idia moale henia ena namo ese siliva bona golo ena namo ia hanaia.” Oiemu kara dainai edena bamona ladana do oi abia, a? Baibel ita duahia neganai, guna idia gwauhamata bona Dirava ena gaukara idia karaia dainai ladana namo idia abia tatau bona hahine edia sivarai mani oi lalodia. Ta be Luka, idia lalokau henia doketa tauna, bona Enok, ia be Dirava momokanina ida ia raka. Samuel be edukeisini hereadaena ia abia, ia mero maragi neganai Iehova ena dubu gaukara ia karaia hamatamaia. Oi laloa unai dala idia abia hidi dainai gabeai unai abidadama taudia idia lalohisihisi, a? Idia lalohisihisi ena badina be lasi, ani? Idia iboudiai idia moale, gaukara namona idia karaia, bona edia mauri idia namo. Bona Iehova ese idia ia lalo-namo henidia noho!​—Sal. 110:3; 148:​12, 13; Her. 20:29a; 1 Tim. 4:8b.

⁷ Natudia edia mauri ia namo neganai, edia tamana bona sinana idia moale. Edia natudia be “Iehova ena harihari gaudia” idia dekenai, bona guna idia hadibadia, bona idia sisiba henidia namonamo dainai, gabeai hahenamo momo idia abia. (Sal. 127:3) Bema natuna merona eiava kekenina be ia goada karaia Iehova ena ladana ia hanamoa totona, ena tamana bona sinana idia moale bada, ani? Hari inai negai, memero kekeni momo be Luka, Enok, bona Samuel edia kara idia tohotohoa, toretore ta ese unai ia hamomokania, ia gwau: “Lauegu lagani be 16. Bapatiso lau abia ena hua 9 murinai, regular pioneer gaukara lau karaia matamaia, . . . bona unai nega amo Iehova dekena amo hahenamo lau abia. . . . Danu, pioneer gaukara ese oi ia durua oi do sikuli noho lalonai. Lau be Witness dainai, guna egu sikuli turadia be lau idia hevasehalaia, to hari, sibona lau stadi momo dainai, ‘lau idia hevasehalaia taudia lau haere henidia diba.’ ”

⁸ Edukeisini Abia Haroro Gaukara Do Oi Karaia Namonamo Totona: Namona be, hari, edukeisini ita herevalaia. Lalohadai maorona edukeisini dekenai ita abia be gau badana. November 1, 1992, Gima Kohorona ena sivarai ta ena ladana be “Mai Ena Badina Dainai Diba Abia.” Hereva kwarana maragina ladana “Diba Ia Hegeregere Sikuli Dalana” henunai inai hereva idia torea: “Ena be nega ibounai pioneer hesiai gaukara idia karaia to Keristen taudia be sibodia edia mauri durua gaudia idia abia be namo. (2 Tesalonika 3:​10-12) . . . Keristen memero kekeni ta be Bible ena hahegani ia badinaia totona bona iena Keristen maduna ia huaia totona, namona be do ia sikuli ela bona edena neganai? . . . Sivarai namona idia harorolaia pioneer taudia dekenai . . . ‘moni davana ia hegeregere gaukarana’ be dahaka? Nega momo unai taudia be dina haida sibona dekenai moni gaukara idia karaia edia tadikaka dekenai eiava edia ruma bese dekenai ‘hekwarahi’ idia henia lasi totona.​—1 Tesalonika 2:9.”

⁹ Bema pioneer gaukara do ia karaia dainai ta ia laloa namona be ma edukeisini sisina ia abia nega ibounai hesiai gaukarana do ia karaia namonamo totona, November 1, 1992, Gima Kohorona magasin ia gwau: “Witness mero o kekeni be unai ia karaia iena ruma bese ida ia do noho neganai, unai amo ia be hanaihanai ia karaia Keristen stadi karadia, hebou karadia, bona haroro karadia ia karaia noho diba.”

¹⁰ Inai sivarai be Africa dekena amo, lagani 22 merona ta be ia ura dikadika pioneer gaukara ia karaia, to ena tama sina idia gwau vocational sikuli dekenai do ia lao. Unai diba ia tahua noho lalonai, heduru pioneer gaukara karaia totona aplikeisini pepana ia torea. Iena lagani hegeregere taudia idia hevaseha henia, idia gwau iena sikuli exam dekenai do ia kwalimu lasi. Hanaihanai idia dekenai iena haere be inai: “[Dirava ena] Basileia bona iena kara maoromaoro do umui tahua guna.” Sibona ena tauanina ia biagua namonamo, daba ta ta iboudiai ia toreisi haraga bona hora rua lalodiai sikuli totona ia stadi, bona adorahi kahanai, sikuli ia ore neganai, haroro gaukara ia karaia. Sikuli taudia idia hoa badina special sponsorship award henia totona exam idia karaia neganai stiuden namodia toi idia abia hidi totona, unai pioneer merona be namba 3 gabuna ia abia. Namba 2 gabuna ia abia stiuden be kamonai tauna, pioneer tadikaka ese sikuli dekenai Baibel stadi ia henia. Gabu namba 1 ia abia stiuden be Witness goadana ma ta.

Iehova Hanamoa Totona Emu Gaukara Oi Habadaia Diba, A?

(Kahana 2)

¹ Pioneer taudia edia gaukara dainai kongregesen elda taudia idia moale, bona unai gaukara goadagoada taudia idia hagoadadia noho. Elda taudia be idia ura unai bamona idia karaia badina idia diba idia gaukara goadagoada pioneer taudia be kongregesen idia durua bada. Lagani tamona regular pioneer gaukara idia karaia murinai, idia hegeregere Pioneer Gaukara School lalonai idia vareai totona bona diba ma haida idia hadibadia totona. Unai sikuli kosi be heduru bada herea pioneer taudia edia gaukara hanamoa totona. Ena be pioneer taudia be gaukara idia gunalaia, to mai edia lalokau hagoadaia herevadia idia abia be gau badana, bona elda taudia idia gima noho unai idia karaia totona be gau badana.​—1 Pet. 5:​1-3.

² Pioneer gaukara durua totona elda taudia be dahaka idia karaia diba? Gau ginigunana be nega ta ta ai unai gaukara namona idia karaia diba taudia idia lalodia. Elda taudia be idia pioneer diba taudia do idia hereva henidia, hegeregere, heduru pioneer gaukara idia karaia loulou taudia, idia buruka dainai moni gaukara amo idia doko taudia, ruma naria taihudia, bona stiuden taudia. Elda taudia ese idia hereva henidia neganai, do idia doridia lasi pioneer gaukara do idia karaia totona, reana haida idia ura idia karaia to idia daradara, to elda taudia edia hagoadaia hereva idia kamonai neganai, idia lalo-parara unai gaukara idia karaia diba.

³ Pioneer gaukara idia ura karaia taudia idia hagoadadia neganai, namona be elda taudia idia laloatao heduru pioneer gaukara be hua momo idia karaia murinai lasi, to maoromaoro regular pioneer gaukara idia karaia diba. (km 8/86 insert [Aust.], par. 24-26) To, elda taudia be pioneer gaukara ia ura karaia tauna be ia hegeregere eiava lasi haroro hora iboudiai do ia hagugurudia totona do idia sekea guna.

⁴ Aplikeisini pepana ia torea bona Kongregesen Hesiai Komiti bona seketere idia sekea henanadai iboudiai ia torea maoromaoro totona, bena murinai Society dekenai do idia siaia.

⁵ Pioneer taudia be hekwakwanai idia davaria neganai, seketere tauna ese elda taudia do ia hamaorodia be namo. Unai be mai anina bada pioneer momo be kongregesen dekenai idia gaukara neganai. Ma danu, hesiai lagani dokonai pioneer taudia edia gaukara idia sekea, to Kongregesen Ena Ripoti (S-10-MO) hegeregerena, namona be March lalonai seketere tauna be haroro naria tauna danu idia hebou bena daika be pioneer hora dekenai idia hegeregere lasi bona heduru ia abia be namo do idia kikilaia. Bema unai bamona tauna idia durua haraga, reana hesiai lagani dokonai ena hora do ia hagugurua diba.

⁶ Hari idia pioneer matamaia taudia momo be memero bona kekeni, bona hereva momokani oreana dekenai idia noho daudau momokani lasi. Mai edia ura ibounai ida gaukara idia karaia dainai ai moale! To hari idia pioneer matamaia taudia be ruma ta ruma ta gaukara idia karaia namonamo totona, lou-henia namodia idia karaia totona, bona Baibel stadi dekenai hadibaia gaukarana idia karaia namonamo totona, gau badana be ta ese ia hadibadia. Bema unai diba ia abia lasi, unai pioneer karaia matamaia tauna do ia lalohisihisi bona reana lagani tamona eiava rua murinai pioneer gaukara do ia rakatania, badina ena haroro gaukara amo huahua momo do ia davaria lasi dainai. Elda taudia idia gima noho neganai, pioneer tauna ia hekwakwanai eiava ena gaukara ia goadalaia lasi neganai, do idia diba haraga. Bema karaharaga pioneer tauna idia durua ena hekwakwanai ia hanaia totona, reana lagani momo lalodiai ena pioneer gaukara amo huahua momo do ia davaria diba.

⁷ Gabu Daudau Ranuna Lalonai Oi Haoda Diba? Iesu ena hahediba taudia haida be haoda taudia. Nega haida, hanuaboi ibounai idia haoda murinai, edia reke lalonai gwarume ta be lasi. (Ioane 21:3) Lagani momo lalodiai tanobada ena kahana haida dekenai ‘taunimanima idia haoda henia’ neganai, reana pioneer taudia haida idia laloa unai kongregesen “ranu” dekenai “gwarume” ma haida idia noho lasi. (Mat. 4:19) To, unai be lalohadai kerere, ita moale badina idau gabu ai pablisa bona pioneer taudia be stadi momo idia karaia ena sivarai ita kamonai dainai, ani? Ia hedinarai goevagoeva unai idau tanodia dekenai pioneer bona misinari taudia idia moale bada. (wMO92 9/1 rau 20 par. 15) Vadaeni, bema idia gaukara goadagoada pioneer taudia haida be mai edia dala idau tano dekenai idia lao idia durudia totona, namona be branch opesi do idia hadibaia guna.

⁸ Reana haida be pioneer gaukara idia karaia matamaia badina idia diba unai idia karaia be maoro, to do idia karaia namonamo diba eiava lasi idia daradaralaia. Reana aplikeisini idia torea neganai idia laloa idia karaia namonamo diba lasi. Bona reana edia haroro gaukara amo huahua momo idia davaria lasi. To, nega ia hanaia murinai, karaia dalana dekenai edia diba idia habadaia, bona ia hedinarai Iehova ese edia gaukara ia hanamoa. Unai dainai, edia moale ia bada bona edia daradara ia ore ia lao. Gabeai unai pioneer taudia haida be Betele, misinari, Hesiai Gaukara Hadibaia Sikulina, eiava Sekit bona Distrik loaloa hesiai gaukara idia karaia.

⁹ Reana oi be dala lasi idau tano dekenai do oi lao oi noho totona, eiava Gilead sikuli dekenai oi lao totona, to inai tano dekenai gabu idauidau momo idia noho haoda gaukarana oi karaia diba totona. Papua New Guinea dekenai gabu momo dekenai idia boiboi pioneer edia heduru do idia abia totona. Unai idau gabu dekenai oi lao noho totona, reana oiemu mauri dalana do oi haidaua sisina, to lauma dalanai hahenamo bada do oi davaria.​—Mat. 6:​19-21.

¹⁰ Eiava reana oiemu sekit dekenai ia noho kahirakahira kongregesen ta do oi durua diba. Bema oi hegeregere unai oi karaia totona, mai moale danu emu sekit naria tauna ese oi ia hadibaia oiemu sekit lalonai edena kongregesen be ma pioneer ta ia abia be namo ia durudia totona.

¹¹ Pioneer bona pablisa haida be idau tano dekenai idia lao lasi to edia gabu dekenai kongregesen haida idia durua diba. Reana idia be gado idauna ta idia diba. Bema oi be idau gado ta oi diba, unai gado idia diba kongregesen lalonai oi lao diba oi durudia totona, a? Idau gado ta idia diba taudia edia heduru be bada taunimanima idauidau dekenai Basileia ena sivarai idia hadibaia totona. Ena be unai bamona oi karaia be mai ena hekwarahi, to hahenamo momo do oi davaria danu.​—1 Tim. 2:4; Tito 2:11.

¹² Bema hari, mai emu goada ibounai ida Iehova ena ladana oi hanamoa, oiemu gaukara maduna oi moalelaia noho. Bema oi laloa emu gaukara do oi habadaia diba, guriguri amo Iehova dekenai oi gwauraia hedinarai. Emu hesiai gaukara do oi habadaia totona, emu mauri be edena bamona oi hegaegaelaia diba oi laloa namonamo. Oi ura karaia gauna be pioneer gaukara ia laloa bada elda tauna eiava sekit naria tauna ida oi kikilaia. Do oi ura karaia gauna oi gurigurilaia, bona oi badinaia diba dalana oi abia hidi murinai, karaharaga oi karaia hamatamaia, badina Iehova ia gwauhamata, ia gwau iena ladana idia hanamoa taudia be do ia hanamodia.​—Heb. 13:​5, 6; 1 Sam. 2:30.

[Questions for Part 1]

1. (a) Hari inai negai, Witness ta ta iboudiai edia maduna namona be dahaka? (b) Unai gaukara maduna ia gwauraia Baibel siri haida oi duahia.

2. Tama sina dekenai dahaka mai anina bada henanadai idia henidia?

3. (a) Daidia be pioneer gaukara idia karaia diba? (b) Daidia be pioneer gaukara idia karaia diba lasi?

4. Dahaka ita karaia lasi be namo?

5. (a) Dirava ena hereva idia badinaia tamadia bona sinadia ese edia natudia idia hagoadaia dahaka do idia karaia totona? (b) Tamana bona sinana ese dahaka idia karaia diba bena edia natudia idia diba taunimanima vairanai lasi, to Iehova vairanai, ladana namona idia abia be namo?

6. (a) Hereva Lada-isidia 22:1 ena hereva badana be dahaka? (b) Ladana namo idia abia taudia haida oi gwauraidia. (c) Dahaka dainai idia abia hidi dalana dainai gabeai idia lalohisihisi lasi?

7. (a) Tama sina be edena bamona natudia idia moalelaidia? (b) Lagani 16 pioneer tauna ta ia abia hidi gaukarana dainai dahaka ia laloa?

8, 9. Tesalonika Iharuana 3:​10-12 bona 1 Tesalonika 2:9 dekenai dahaka sisiba namona ia noho idia ura gabeai pioneer gaukara do idia karaia taudia totona?

10. (a ) Africa tadikaka ta be vocational sikuli dekenai ia do noho neganai, dahaka ia karaia diba? (b) Edia abidadama karana dainai Witness rua ese dahaka hahenamo idia abia?

[Questions for Part 2]

1. (a) Dahaka dainai elda taudia idia ura pioneer taudia idia hagoadadia? (b) Petero Ginigunana 5:​1-3 oi duahia. Elda taudia ese hahegani idia abia dahaka do idia karaia totona?

2. Elda taudia be edena bamona tadikaka bona taihu idia hagoadadia diba pioneer gaukara do idia karaia totona?

3, 4. Ta ese pioneer aplikeisini pepana ia torea neganai, Kongregesen Hesiai Komiti bona seketere edia maduna be dahaka?

5. (a) Pioneer durua totona, kongregesen seketere ena mai anina bada gaukarana be dahaka? (b) Edena negai unai heduru idia henia? Dahaka dainai?

6. Idia pioneer matamaia taudia momo be dahaka heduru idia abia be namo? Nega momo unai heduru idia abia neganai dahaka ia vara?

7, 8. Dahaka dainai pioneer momo edia moale ia bada ia lao bona edia daradara ia ore ia lao? Bona dahaka ia havaraia?

9, 10. Ena be edia mauri dalana do ia haidaua sisina, to pioneer taudia ese huahua momo idia davaria totona dahaka idia karaia diba?

11, 12. (a) Pioneer bona pablisa taudia haida be idia karaia gaukara maduna namona ma ta be dahaka? (b) Bema Witness tauna ta be ena goada ibounai ida ia gaukara, namona be iena lalona ena mamina be dahaka? (c) Heberu 13:​5, 6 ena hagoadaia herevana ita dekenai be dahaka?