Pioneer Gaukara Do Oi Karaia Diba, A?
1 Lagani gunanai, “Diari Loalaia Taudia” Distrik Hebouhebou dekenai, hereva ia henia tauna ta ia gwau: “Pioneer gaukara oi karaia diba, a? Pioneer gaukara do oi karaia, a?” Ia gwau unai henanadai be mai anina bada badina Aramagedono be ia kahirakahira, unai dainai haroro gaukara ita karaia haraga be gau badana.—1 Kor. 7:29a.
2 Momokani, pioneer gaukara be ia auka. Karaia totona sibona eda ura ita biagua bona ita hegaegae namonamo be gau badana. To, ita karaia haroro gaukarana be “hekwarahi kava lasi.” (1 Kor. 15:58) Iseda nega bona goada idia haorea gaudia ma haida dekenai unai ita hereva diba, a? Keristen taudia be Iehova idia lalokau henia dainai, iena hesiai gaukara idia karaia goadagoada, bona idia momo be pioneer gaukara lalonai idia vareai.—1 Ioane 5:3; Apok. 4:11.
3 Iehova ena hesiai gaukara idia karaia memero kekeni momo be haisikuli amo idia doko bona pioneer gaukara idia lalohadailaia. Unai be namo. Ma gaukara ta ena namo ese nega ibounai hesiai gaukarana ena namo ia hanaia lasi, ani? (Mat. 6:33) Basileia ena sivarai namona harorolaia be gau badana; unai be Iehova ena gaukara, bona iseda matamata negana amo unai gaukara ita karaia badabada be moale bada gauna!—Mat. 24:14.
4 Umui tama bona sina e, emui natudia umui hagoadaia nega ibounai hesiai gaukarana do idia karaia totona, a? Oiemu natudia idia diba momokani oi ura idia be edia lalona ibounai, edia lauma ibounai, edia aonega ibounai, bona edia goada ibounai ida unai gaukara namona do idia karaia totona, a? (Mar. 12:30) Memero bona kekeni pablisa momo be gabeai regular pioneer gaukara do idia karaia totona, idia do sikuli noho lalonai nega momo heduru pioneer gaukara idia karaia. Edia abidadama karana ese Iehova ena kudouna ia hamoalea!—Her. 27:11.
5 Momokani, haida be mai edia maduna dainai pioneer gaukara idia karaia diba lasi. To, herevana oi headava eiava lasi, herevana oi be matamata eiava buruka tauna, namona be mai guriguri danu oi laloa namonamo, Iehova hesiai henia totona bona sivarai namona harorolaia totona oi pioneer diba, a? (Kol. 3:23) Idia headava matamata taudia momo idia goada karaia edia hesiai gaukara idia habadaia totona, badina idia ura idia ta eiava idia ruaosi be pioneer gaukara do idia karaia.
6 Bema hari oi be dala lasi regular pioneer gaukara oi karaia totona, oi ese heduru pioneer gaukara do oi karaia diba, a? April lalonai, reana oiemu kongregesen dekenai momo idia hegaegae heduru pioneer gaukara do idia karaia totona. Idia oi bamodia diba, a? Ena be Iehova ena abidadama hesiai taudia iboudiai ese hahenamo momo idia davaria, to mamoe bamona taudia tahudia totona edia nega Basileia gaukarana dekenai idia habadaia taudia, be hahenamo ma haida idia abia.—Kara 20:35.