Auka Lasi Haroro Hereva Namodia
1 Iesu ese Dirava ena Basileia be auka lasi dalanai ia harorolaia. Ia diba mamoe bamona taudia be hereva momokani idia kamonai neganai do idia ura henia. Danu, ia diba taunimanima edia lalohadai, edia kara, bona edia laloa maoromaoro ena goada be idauidau. Unai dainai, ia ese auka lasi hamatamaia hereva, henanadai, bona haheitalai hereva idauidau ia gaukaralaidia kamonai taudia edia lalona ia veria bona edia kudouna ia hamareredia totona. Namona be iena kara ita tohotohoa bona auka lasi haroro hereva namodia ita kikilaia.
2 Hamatamaia Hereva Namodia Hegaegaelaidia: Hamatamaia hereva namona be taunimanima idia hekwarahilaia momo gauna, unai be “Moni Gaukara Abia/Ruma Abia.”
Reana inai bamona oi hereva diba:
◼ “Ai be emu dekena taudia danu ai kiki hebou sivaraina be edena bamona taunimanima iboudiai be moni gaukara bona ruma idia abia diba. Oi laloa tanobada ena gavamani idauidau be unai idia havaraia diba, a? . . . To ta ia noho bona ia goada unai hekwakwanai iboudiai do ia kokidia totona; unai be taunimanima ia Havaraia Diravana.” Isaia 65:21-23 oi duahia. Bena murinai ruma tauna ena lalohadai unai sivarai dekenai do oi tahua.
3 Taunimanima momo be “Kara Maoromaoro Lasi/ Hisihisi” ena hamatamaia herevana idia ura kamonai henia.
Reana inai bamona oi henanadai diba:
◼ “Reana nega haida oi laloa inai bamona: Taunimanima be kara maoromaoro lasi bona hisihisi idia abia dainai, Dirava ia lalodia, a?” Oi naria ruma tauna do ia haere totona bona murinai Kohelete 4:1 bona Salamo 72:12-14 oi duahidia. Bema ia hegeregere Mauri Hanaihanai buka oi herevalaia totona, namona be rau 150 ia lao 153 oi kehoa bona nega sisina lalonai oi hahedinaraia tanobada dekenai hari idia vara gaudia ese Baibel ena peroveta herevadia idia hagugurua. Bena murinai rau 161 ia lao 162 oi kehoa bona oi hahedinaraia taunimanima hanamoa totona Dirava ese ma dahaka do ia karaia. Ruma tauna oi nanadaia edena laulau ia moalelaia bada.
4 Ruma tauna danu oi kiki sisina murinai, bema oi laloa Mauri Hanaihanai bukana be hegeregere lasi ia dekenai, ena lalona oi veria magasin, buklet, eiava pepapepa ta ena sivarai ia duahia totona.
Hegeregere, paragraf 2 ena hamatamaia herevana oi kikilaia murinai, reana inai bamona oi hereva diba:
◼ “Inai buklet, ladana Dirava ese Ita Ia Laloa Eiava? lalonai, ia hahedinaraia goevagoeva Dirava ese dahaka ia gwauhamata dina ta ta iboudiai mauri durua gaudia ita do ia henia totona, bona ia hahedinaraia edena bamona namo do ita davaria diba.” Buklet oi kehoa rau 26 bona 27 ai, bona paragraf 21 ena hereva oi kikilaia.
5 Paragraf 3 ena hamatamaia herevana oi kikilaia murinai, namona be Inai Tanobada Do Ia Ore Eiava? pepapepana ena hereva badadia do oi gwauraia hedinarai.
Reana inai bamona oi hereva diba:
◼ “Hari inai tanobada lalonai hisihisi bona hekwakwanai idauidau momo idia vara. Inai pepapepa ese ia hahedinaraia Baibel ese tuari, aniani lasi, bona gorere do idia vara ia perovetalaia. To danu, taunimanima totona Dirava ese nega namona ia gwauhamatalaidia.” Pepapepa ena rau 5 ena paragraf dokona oi duahia.
6 Taunimanima edia namo ita tahua dainai bona auka lasi haroro herevana amo edia kudouna ita hamareredia toho dainai, mamoe bamona taudia be do idia kamonai.—Ioane 10:16.
This article is repeated in km 7/96.