Kongregesen Idia Hakaua Taudia—Gima Kohorona Stadi Ia Naria Tauna
1 Gima Kohorona—Iehova Ena Basileia Ia Harorolaia be “hesiai tauna mai ena kamonai, bona mai ena kara maoromaoro” ese nega korikori ai lauma aniani ia hariharilaia dalana badana. (Mat. 24:45) Gima Kohorona Stadi ia naria elda tauna ena maduna be bada. Gau badana be ia be hadibaia tauna namona bona Keristani mauri dalana dekenai ia be haheitalai namona.—Roma 12:7; Iam. 3:1.
2 Gima Kohorona Stadi ia naria tauna ese kongregesen ia hadibaia namonamo totona, namona be pura ta ta iboudiai ia hegaegae namonamo. Namona be ia guriguri bona ia laloa dobu. Ita diba kongregesen ia laloa bada badina stadi lalonai ia hekwarahi iseda lalona ia hamarerea totona. Ia ese unai stadi ena hereva badadia ia hahedinaraia goevagoeva bona ita ia durua edia anina unai hereva ena sinado dekenai ita lalo-pararalaia totona.
3 Ia hegaegae namonamo ena anina be Baibel siri iboudiai ia duahia guna bona edia anina unai hereva dekenai ia tahua. Kongregesen taudia ese Dirava ena Hereva idia laloa bada totona, idia ia hagoadaia stadi lalonai Baibel idia gaukaralaia namonamo. Bema kongregesen taudia edia haere lalonai hereva badana ta idia gwauraia lasi eiava siri badana ta ena anina idia reaia, henanadai namona ma ta ia henia unai heduru herevana abia totona. Unai dala amo, ita ia durua unai hereva ena anina ita lalo-pararalaia namonamo bona iseda mauri lalonai ita dibaia gaudia ita badinaia dalana ita diba totona.
4 Gima Kohorona Stadi ia naria tauna ia hekwarahi, sibona ena hadibaia karana ia hanamoa noho totona. Ia hereva momo lasi, to ita ia hagoadaia ita haere—sibona eda hereva amo, hereva kwadogi amo, bona anina korikori gwauraia karana amo. Nega haida ita do ia hadibaia lou namona be paragraf ta ta edia haere ginigunana be ia kwadogi bona henanadai ia haerelaia maoromaoro sibona. Haere ma haida ese Baibel siri edia anina, unai paragraf ena anina idia durua herevadia, eiava ita badinaia diba daladia idia hahedinaraia diba. Ta ta sibona eiava ruma bese taudia idia hegaegae hebou ia herevalaia badabada amo, Gima Kohorona Stadi ia naria tauna ese iboudiai edia ura ia habadaia idia haere totona.
5 Ita be Iehova ese ‘ia hadibaia’ taudia dainai, “harihari gaudia” ita laloa bada, bona Gima Kohorona Stadi ia naria tauna be unai bamona ita laloa. Ia gaukara goada ‘hadibaia gaukara ia karaia’ totona.—Isa. 54:13; Ef. 4:8, 11; 1 Tim. 5:17.