Lalohadai Maorona Ita Dogoatao Noho
1 Tano idauidau momo lalodiai haroro gaukara ia bada ia lao sivaraidia ita duahia dainai ita moale bada herea! To, gabu ma haida dekenai nega momo Basileia pablisa taudia idia haroro neganai, taunimanima idia ura lasi hereva ena anina idia tahua, idia ura lasi kamonai, eiava idia dagedage henidia. Iseda teritori lalonai, bema taunimanima momo be unai bamona, edena bamona mai iseda lalohadai maorona ida ita haroro noho diba? Lalohadai kerere be edena bamona ita dadaraia diba, badina namo lasi unai kara ese iseda moale ia haorea bona hahediba taudia karaia gaukarana do ita goadalaia lasi, ani?
2 Lalohadai maorona ita dogoatao neganai unai ese ita ia durua gau iboudiai do ita laloa namonamo totona. Ena be gaukara be ia auka, to namo lasi lalohadai kererena ese ita idia biagua. Iesu be haheitalai hereadaena ita tohotohoa totona. Taunimanima haida sibodia ese ia harorolaia herevana idia abia dae. Ena hadibaia herevadia dainai taunimanima momo idia hekwakwanai. Idia vara gaudia ese iena haheauka idia tohoa bada. Tomadiho gunalaia taudia ese iena gaukara idia gwauraia dika bona idia hegaegae do idia hamasea totona. Ia dekenai idia kanudi, idia pataia, idia botaia, bona gabeai idia hamasea. To, ia karaia gaukarana ia moalelaia. Dahaka dainai? Ia lalo-parara Dirava ena ura ia karaia be gau badana, bona unai gaukara ia hesikulaia lasi.—Ioa. 4:34; 13:17; Heb. 12:2.
3 Iseda Haroro Gaukara Dekenai Lalohadai Maorona Ita Dogoatao Noho: Unai do ita karaia totona, namona be gau haida ita lalodia tao. Namona be ita laloatao, taunimanima momo ese ita harorolaia sivaraina idia ura lasi kamonai, eiava ita idia dagedage henia. (Mat. 13:14, 15) Ena be aposetolo taudia idia oda henidia Iesu ena ladana dekenai do idia haroro lasi totona, to mai edia abidadama danu edia haroro gaukara idia karaia noho, bona uma ena anina idia gogoa noho. (Kara 5:28, 29; 6:7) Ita diba vadaeni, gabu haida dekenai, taunimanima haida sibona do idia kamonai. (Mat. 7:14) Unai dainai, iseda teritori lalonai bema taunimanima tamona sibona be sivarai namona ia kamonai, ita moale. Danu, ita laloatao, ena be haida ese ita idia dagedage henia, to idia dekenai sivarai namona ita harorolaia toho danu be namo. (Esek. 33:8) Ita idia dagedage henia taudia haida be gabeai Iehova tomadiho henia taudia ai idia lao. Vadaeni, iseda haroro gaukara ita laloa namonamo neganai, ena be taunimanima haida sibona do idia kamonai, to ita diba iseda gaukara amo moale ita davaria diba. Dirava ena Basileia harorolaia totona, taunimanima edia iduara dekenai ita ginidae neganai, taunimanima idia diba ita be haroro taudia.—Esek. 2:4, 5.
4 Lalohadai maorona ita dogoatao noho ena badina be momo. Tanobada hegegemadai haroro gaukara ia bada ia lao dainai, bona idia vara gaudia ese idia hahedinaraia hisihisi bada herea negana be ia kahirakahira dainai, namona be ita ibounai be Dirava ita badinaia bona ena hesiai gaukara ita goadalaia. (2 Pet. 3:11, 14) August lalonai haroro gaukara do ita goadalaia be dala namona ita diba vadaeni gaudia dekenai iseda moale ita hahedinaraia totona. Danu, ita ura kamonai matamata taudia be lalohadai maorona idia abia, bena idia diba vadaeni sivaraidia be ma haida dekenai do idia harorolaia diba. Bema iseda Baibel stadi taudia haida edia diba ia hegeregere bapatiso lasi pablisa taudia ai do idia lao totona, reana August be hua namona haroro gaukara do idia hamatamaia totona.
5 Ena be haida be pablisa taudia bona haida be pioneer taudia, to bema ita laloatao Iehova ese ita ia henia gaukarana be ia metau momokani lasi, ita ibounai be heduru ita abia diba. (1 Ioa. 5:3) Ia gwauhamata, ia gwau ita do ia durua noho. (Heb. 13:5b, 6) Ena be taunimanima momo idia ura lasi kamonai, idia ura lasi sivarai ena anina idia tahua, eiava ita idia dagedage henia, to namona be ura goada ita abia bona ita haroro noho badina Dirava ia ura unai bamona ita karaia.—1 Tim. 2:3, 4.
[Questions]
1. (a) Gabu haida dekenai dahaka dainai kamonai taudia davaria be ia auka? (b) Dahaka henanadai ita lalodia be namo?
2. Gaukara ia auka neganai, lalohadai maorona ita dogoatao noho totona, Iesu ena haheitalai namona be edena bamona ita ia durua?
3. (a) Edena bamona iseda haroro gaukara dekenai lalohadai maorona ita dogoatao noho diba? (b) Ena be ita diba gabu haida dekenai kamonai taudia be momo lasi, to dahaka dainai unai gabu dekenai ita haroro be gau badana?
4. (a) Dahaka dainai haroro gaukara do ita goadalaia be namo? (b) August lalonai, ita stadi henidia taudia be edena bamona ita durudia diba?
5. Bema mai iseda abidadama danu sivarai namona ita harorolaia noho, Iehova ena gwauhamata ita dekenai be dahaka?