Sivarai Namona Manau Taudia Totona
1 Kahirakahira kota henia karana do ia vara negana lalonai ita noho. (Esek. 9:5, 6) Gau badana be manau taudia ita hamaoroa, unai dina dainai idia hegaegae. Mai lalokau bona hebogahisi ida, Iehova ese iena taunimanima gaukara ia henidia, idia be “manau taudia dekenai sivarai namona” idia harorolaia. (Isa. 61:1, 2, NW) Iseda magasin ese ita idia durua, kahirakahira bona daudau gabudia ai unai sivarai namona ita gwauraia hedinarai.
2 Gima Kohorona bona Noga! amo lauma dalanai aniani aukana ita abia bona unai ese ita ia hagoadaia. Gima Kohorona ese manau taudia ia durua badina ia hahedinaraia ena sivarai namona amo, Dirava ena Basileia ese tanobada be paradaiso ai do ia halaoa. Noga! ese ia hahedinaraia gau ibounai ia karaia Diravana ia gwauhamata maino bona noho namo tanobada matamatana ai do ia havaraia. Unai magasin hariharilaia bada karana amo manau taudia dekenai sivarai namona ita henia haraga diba. Magasin matamata lalodiai, dahaka hereva idauidau ita hahedinaraia diba?
3 May 1 “Gima Kohorona” oi hariharilaia dalana be ena hereva ta “Dina Iboudiai Baibel Duahia Karana Ena Namo” oi hahedinaraia bona inai henanadai oi henia:
◼ “Baibel duahiduahi amo dahaka namo oi laloa ita abia diba? [Haere naria.] Roma 15:4 ai, Baibel be sibona ena hereva ta amo ita ia durua. [Roma 15:4 duahia.] Iniseniai taunimanima momo be Baibel ta idia abia vadaeni, to idia momo be nega idia atoa lasi dainai, idia duahia hanaihanai lasi. Ai diba nega vaira totona helaro namona tamona be Baibel lalonai ita davaria, bona hahenamo ta do ita abia bema ita duahia.” Herevalaia sisina, bena sabskripsen hariharilaia.
4 May 15 “Gima Kohorona” lalonai hereva idauna ta ia noho: “Mauri Matamatana Eda Sene Taudia Totona.” Oi hamatamaia diba inai bamona:
◼ “Taunimanima momo idia ura diba edia sene taudia be edena bamona taudia. Idia mase vadaeni dainai idia noho lasi, unai dainai taunimanima momo idia laloa unai bamona diba do idia abia lasi. Unai taudia edia kara do oi itaia diba totona oi laloa dala ta ia noho, a?” Haere naria. Ioane 5:28, 29 oi duahia, bona Dirava ena tanobada paradaisona lalonai mauri matamata do idia abia gwauhamatana oi hahedinaraia.
5 May 14 vairana ai idia mai magasin oi gaukaralaidia neganai, namona be Basileia Sivarai No. 34 ena kopi haida oi abia, bena idia do abia lasi taudia dekenai kopi ta oi henia. Iseda magasin bona buka ita hariharilaia mai moale ida, badina ita diba idia abia taudia edia ruma bese bona vadivadi taudia ese reana do idia duahia danu. (1 Tim. 6:18) Ita abia mai sivarai namona ese manau taudia ia hamauria diba.—1 Tim. 4:16.