Nega Namodia Ibounai Sabskripsen Henia
1 Ita be badina namona dainai Gima Kohorona bona Noga! magasin ita ura henidia. Tanobada ibounai lalonai taunimanima ese idia duahidia magasin ta be unai bamona lasi. Inai hua lalonai, unai magasin be iseda haroro gaukara lalonai do ita hariharilaidia, edia hereva be mai edia siahu bada! Ita ura do ita hegaegae, nega namodia ibounai sabskripsen do ita hariharilaia.
2 October 1 “Gima Kohorona” oi hariharilaia neganai, “Tuari Lasi Tanobadana—Edena Negai?” herevana amo ruma tauna ena lalona oi veria diba. Oi gwau:
◼ “Taunimanima momo idia daradara dahaka dainai ena be taunimanima idia hekwarahi bada, to tuari lasi tanobada ia vara lasi. October 1 Gima Kohorona ena rau 5 lalonai idia torea hereva dekenai dahaka oi laloa? [Hereva kwarana “Tomadiho—Koua Gauna Badana Ta” henunai idia noho paragraf ginigunadia ruaosi edia hereva ginigunadia oi duahia, bona ena haere oi naria.] To unai ena anina be tuari do idia vara hanaihanai lasi. Mani Isaia 9:6, 7 lalonai Dirava ena gwauhamata ita duahia.” Emu Baibel amo eiava Gima Kohorona amo unai siri oi duahia diba. Nega sisina lalonai oi hahedinaraia Gima Kohorona ese ia hahedinaraia Iehova ena Basileia sibona ese maino tanobadana ia havaraia diba, bona sabskripsen oi hariharilaia.
3 July-September “Noga!” oi hariharilaia neganai, inai oi hereva diba:
◼ “Oi laloa dahaka dainai inai tanobada be mai ena kara dika bada? [Haere naria.] Lau laloa oi ese inai hereva do oi ura duahia.” Bena nega sisina lalonai rau 10 dekenai paragraf 5 ena hereva ta oi kikilaia.
4 Bema oi be tomadiho idia laloa bada taudia oi davaria, September 15 “Gima Kohorona” ena hereva ta oi hahedinaraia diba. Inai hereva ese edia lalona ia veria diba:
◼ “Lau ura diba emu lalohadai be dahaka inai henanadai dekenai: Keristani tauna ia mama be namo a?” Ena haere oi naria, bena rau 3 dekenai paragraf 3 oi duahia, magasin ena kopina laulauna eiava rau 4 ena laulau umui kikilaia, bona sabskripsen oi hariharilaia. Bema sabskripsen idia abia lasi, magasin oi hariharilaia.
5 Ruma ta ruma ta dekenai ita haroro neganai, sitoa maragidia ita hanaidia lasi. Sitoa taudia idia hereva henidia taudia momo idia gwau idia moale bona kamonai taudia idia davaria. September 22 “Awake!,” English gauna, oi hariharilaia neganai, inai hereva kwadogina oi gwauraia diba:
◼ “Ita diba bisinesi taudia idia ura edia gabu dekenai idia vara gaudia ibounai idia diba. Lau diba inai hereva do oi ura duahidia.” Bena nega sisina lalonai inai hereva “Compulsive Gamblers—Always losers” oi kikilaia.
6 Bema oi davaria tauna be ia bisi momokani, magasin oi hahedinaraia bona inai bamona oi hereva:
◼ “Lau diba oi laloa ta ese oi do ia vadivadi henia lasi hari, unai dainai do lau hereva daudau lasi. Lau ura do oi ura duahia hereva namona ta do lau hahedinaraia.” Oi hegaegaelaia herevana ta oi hahedinaraia, bona magasin oi hariharilaia.
7 Ruma ta ta edia namba oi torea, bona magasin idia abia taudia iboudiai oi lou henidia. Namona be ita hegaegae bona ita noga noho nega ibounai sabskripsen ita haria totona.