Noho Lasi Taudia Rekodi Oi Torea, A?
1 Witness tauna ta bona ena adavana be daba momokani ai edia haroro gaukara idia hamatamaia. Gabeai, unai dina ai, teritori dekenai idia giroa mai bona guna idia noho lasi taudia idia tahua lou. Tau ta ese iena ruma dekenai ia boiridia bona ia kamonai namonamo. Mauri Hanaihanai buka ia abia, bona ia nanadaidia bema do idia giroa mai. Guna, Iehova ena Witness taudia ida ia kiki lasi bona ia be mai ena henanadai momo; Baibel stadi idia hamatamaia. Unai tadikaka bona taihu be unai mamoe bamona tauna idia davaria dainai idia moale bada herea. Umui ura unai bamona tauna umui davaria danu, a? Umui davaria lasi taudia edia adres umui torea bona umui giroa haraga karana amo, reana do umui davaria.
2 Hanaihanai, ita idia hagoadaia rekodi namona ita karaia bona idia noho lasi taudia ita tahua lou. Ataiai ia noho ekspiriens hegeregerena, bema unai dina dekenai ita giroa reana kamonai tauna do ita davaria. Ena be ita ura teritori ita haorea, to reana iseda manoka gauna be ita davaria lasi taudia edia adres ita torea lasi. Haida idia gwau: ‘Wiki rua o toi murinai do ita giroa; unai bamona pepapepa be anina lasi badina teritori do ita karaia lou haraga.’ To unai be rekodi namona karaia ena badina badana. Idia karaia loulou teritori be mamoe tahua haraga gabudia. Dahaka dainai?
3 Gabu momo lalonai, dina ai ruma momo, 50 pesen bamona be taunimanima lasi. Unai dainai, taunimanima idia noho lasi rumadia ita vadivadi henia loulou be teritori ita habadaia bamona. Ena be teritori ita karaia momo lasi, to unai teritori lalonai anina namona do ia vara bema idia noho lasi taudia ita tahua ela bona ruma taudia ita davaria, bena ita gwau diba teritori ita karaia ore.
4 Guna idia noho lasi taudia oi tahua diba ma dina ta ai, wiki ta ia do ore lasi lalonai. Tadikaka momo idia lao lasi nega ginigunana bamona, to dina o nega idauna ta ai idia lao. Wiki lalonai oi davaria lasi taudia davaria totona, reana vadivadi negana do oi abia hidi Saturday o Sunday ai. Danu, kongregesen haida be adorahi ai idia lao bona guna idia davaria lasi taudia iboudiai amo, nega haida 50 pesen ia hanaia idia davaria.
5 Namona be lou henia taudia edia ladana oi torea oi sibona emu noutbuk dekenai. Oi davaria lasi taudia edia adres ena lista, bema do oi giroa haraga diba lasi, oi henia haroro grup ia naria tadikaka ta dekenai, ma haida do idia karaia totona.
6 Bema unai kahana, iseda hesiai gaukara ena kahana ta unai, ita laloa bada, iseda gaukara do ia bada bona ita do ia hamoalea danu. Unai mamoe bamona taudia tahua bona naria karana ita karaia namonamo dainai, iseda lalona do ia namo.—Esek. 34:11-14.