Emui Kongregesen Ena Teritori Ia Bada, A?
1 Iesu be idaunegai Israela ena teritori ibounai, Iudea ena hanua amo Galilea ena gunika kahanai, ia haroro goadagoada. (Mar. 1:38, 39; Luka 23:5) Ita danu ese taunimanima momo herea dekenai sivarai namona ita harorolaia be namo. (Mar. 13:10) To, reana unai be mai ena hekwarahi. Dahaka dainai?
2 Papua New Guinea dekenai kongregesen momo edia teritori ena kahana badana be taoni dekenai lasi. Unai teritori dekenai idia haroro totona motuka amo idia heau daudau. Unai bamona teritori badadia dekenai idia noho taudia ese Iehova, Iesu, bona Basileia ena hereva momokani idia dibaia totona dahaka ita karaia diba?
3 Palani Umui Karaia Namonamo: Namona be haroro naria tauna bona teritori naria tauna idia gaukara hebou, kongregesen ese namo bada ia havaraia totona. Reana momo ese dina ibounai lalonai idia haroro diba Saturday rua umui abia hidi. Daudau teritori dekenai umui haroro neganai, bema mai dalana palani umui karaia dina ibounai do umui haroro, bona dina tubua ena aniani umui abia lao. Teritori dekenai umui lao totona nega umui abia bema haroro hebou be hanaihanai umui karaia negana ai lasi, to daba momokani ai umui karaia, eiava do umui haroro teritori kahirakahira dekenai umui karaia. Palani umui karaia medu be lasi bona dala idia namo neganai, unai daudau teritori dekenai umui haroro totona.
4 Namona be buka bona magasin momo umui abia lao. Bema unai teritori dekenai nega momo umui gaukara lasi, reana ta ia noho lasi rumadia dekenai pepapepa maragina eiava magasin gunana ta umui rakatania be namo. Pepapepa ladana Oi Ura Baibel Do Oi Diba Namonamo, A? be umui davaria taudia ibounai dekenai umui henia bona ta ia noho lasi rumadia dekenai umui rakatania be namo.
5 Gaukara Hebou Namonamo: Teritori badana dekenai umui gaukara neganai, namona be kongregesen taudia ibounai idia gaukara hebou namonamo. Motuka umui gaukaralaia momo neganai, motuka ai idia guia taudia ibounai ese petrol davana do idia karaia be namo. Idia ura herevahereva ruma taudia umui davaria neganai, namona be umui laloa namonamo. Umui laloatao teritori dekenai idia noho taudia ibounai umui davaria be namo, bona motuka lalonai idia naria taudia ma haida oi laloa. Bema oi ura kamonai tauna ida oi herevahereva sisina daudau, dala umui karaia diba ma haida idia haroro noho totona, a?
6 Kamonai taudia ibounai lou henia totona dala umui karaia namonamo. Reana revareva amo stadi oi karaia diba, unai dainai adres oi abia be namo. Nega haida, reana telefon namba oi abia, kamonai tauna ida oi hereva bona ena diba oi habadaia totona. Bema dala be ladana lasi eiava ruma be namba lasi, mapu eiava kamonai tauna oi davaria diba dalana oi torea namonamo do oi lou henia totona.
7 July ai Do Ita Gaukara Goada: Kongregesen bona grup ese daudau teritori dekenai idia haroro totona ai noia laganina gunana be lagani 1999. (km 6/99 rau 3) Hari lagani ai kongregesen bona grup iboudiai ese daudau teritori haida dekenai idia haroro be namo. Reana daudau teritori haida be kongregesen ena teritori lalonai eiava kongregesen ese ia naria grup ta ena teritori lalonai idia noho. Namona be kongregesen bona grup iboudiai ese July 2002 ai dina rua idia abia hidi unai teritori dekenai idia haroro totona. Haroro naria tauna ese hanua, taoni, eiava gabu haida ia abia hidi unai nega ai unuseniai umui haroro totona. Danu, unai dina rua lalonai do umui karaia gaukara bona grup idauidau ia hegaegaelaia be namo.
8 Namona be Lae bona Port Moresby dekenai haroro naria taudia ibounai be taoni naria tauna ida idia hegaegae edena daudau teritori dekenai do idia lao, kongregesen rua be teritori tamona ai do idia gaukara garina.
9 Iseda hahenamo be Iesu ena hadibaia herevana ita badinaia, ia gwau: “Hanua maragina ta dekenai o hanua badana ta dekenai do umui ginidae neganai, kara namona tauna ta do umui tahua”! (Mat. 10:11) Mai emu ura ida inai gaukara namona ena kahana oi karaia neganai, Iehova ese emu hekwarahi do ia hanamoa momokani!