Emu Nega Gaukaralaia Namonamo
1 Iehova ese nega ia laloa bada. Iena ura be ita ese nega ita laloa bada danu. Iena orea amo ita ia durua iseda nega ita laloa bada totona. Ita Ia hagoadaia ‘nega ibounai Lohiabada ena gaukara do ita karaia goadagoada.’ (1 Kor. 15:58) Unai nega laloa bada karana amo, Iehova ena hesiai gaukara karaia dalana do ita hanamoa.
2 Iseda nega wiki ta ta lalonai be tamona—hora 168. Iseda nega ita gaukaralaia namonamo, a? Iehova ia diba nega dokona lalonai ita noho; iseda kara amo unai diba ita hahedinaraia, a? Anina bada lasi gaudia dainai nega bada ita halusia kava, a?
3 Gau badana be iseda nega ita haria namonamo. Tadikaka momo ese lista ta idia karaia. Anina bada gaudia idia atoa guna, bena anina bada lasi gaudia idia atoa murinai. Edena bamona gaudia do oi abia hidi guna? Baibel ia gwau, “iseda gaukara ena anina do ita moalelaia.” (Had. 3:13) Gaukara haida ese namo idia havaraia badabada, haida edia namo be maragi sibona, unai dainai unai gaukara ena anina oi laloa. Bema unai gaukara oi haorea guna, anina namona do oi moalelaia diba, a? Oiemu hekwarahi ena “anina” do oi itaia, a? Bema lasi, namona be emu lista dekenai oi atoa guna lasi.
4 Iseda Hesiai Gaukara Lalonai: Ita moale bema nega korikori ai tadikaka be haroro grup dekenai idia ginidae, hakaua herevadia idia hakala henia, bona grup murinai maoromaoro teritori dekenai idia lao. Ita ura lasi ita naria daudau, ita ura ita haroro. Paulo be nega gaukaralaia namonamo karana ia laloa bada badina ia gwau: “Ekalesia ena gaukara ibounai umui karaia namonamo, mai dala maorona, karaia kava lasi.”—1 Kor. 14:40.
5 Ita lao haroro neganai, laga-ani latadia ese nega bada idia haorea kava. To, nega haida medu bada herea ia diho eiava dina ia siahu bada herea neganai, laga-ani sisina ese ita ia durua iseda haroro ita goadalaia noho totona. Mai aonega ida ita karaia be namo.
6 Baibel ia gwau, “aena ia lata manu . . . ese iena giroa mai negana ia diba” bona dimairi be “medu lasi neganai edia aniani idia haboua” medu negana ai idia hitolo garina. (Ier. 8:7; Aon. 6:6-8) Nega gaukaralaia namonamo totona ita dibaia gauna badana ta be inai: Namona be gaukara karaia negadia ita diba danu. Namona be mai aonega ida iseda nega ita halusia kava lasi. Dahaka do ita karaia ita diba sibona lasi to edena negai do ita karaia ita diba danu be mai anina bada. Namona be reana gabeai do idia vara hekwakwanaidia, nega idia haorea hekwakwanaidia, totona hanaihanai ita hegaegae. Danu, bema iseda hebou hegaegaelaia, haroro gaukara, eiava tiokratik gaukara ma ta totona nega ia kwadogi, namona be lalona ita hadaia iseda gaukara ma haida amo nega do ita kokia.
7 Ita ura iseda guba Tamana, Iehova Dirava, bamona ita laloa, ia ese ita ia hadibaia “inai tanobada dekenai idia vara gaudia ibounai be mai edia nega korikori.” (Had. 3:1) Iseda nega ita gaukaralaia namonamo neganai, ita ese “Dirava ena hesiai tauna ena dagi karadia ibounai do [ita] karaia namonamo.”—2 Tim. 4:5.