‘Umui Naria Noho’
1 Iesu ese Mataio 26:38-41 ai ia noho herevana ia gwauraia neganai, iena hetoho auka hereana negana be kahirakahira. Taunimanima edia sivarai iboudiai amo, unai nega be mai anina bada. Taunimanima iboudiai hamauria dalana do ia kehoa eiava lasi negana unai. Iesu ena hahediba taudia idia “naria” noho be gau badana.
2 Hari, kahirakahira Iesu, hamauria tauna bona dika davana henia tauna, ena gaukara do ita itaia. Ita, nega dokona lalonai ita noho Keristani taudia, be do ita noho kava bona iseda hamauria dinana do ita naria sibona lasi. Ita diba dina ta ta iboudiai lalonai ita gini hegaegae. Gau badana be Iehova ena hesiai gaukara lalonai “ita hekwarahi bona ita hisihisi noho.” (1 Tim. 4:10) Ita ta ta sibona ese unai ita karaia, a? Ita naria noho, a?
3 Siboda Eda Kara Tahua: Iesu be sisiba ia henia, ia gwau: “Umui naria namonamo.” (Luka 21:34, 35) Namona be iseda kara ita naria namonamo, bona ita be ‘kerere ta lasi, bona iseda lalona dekenai dika ta do ia noho lasi inai tanobada taudia mai edia dika bona mai edia kerere bada danu edia huanai ita noho’ negana lalonai. (Fil. 2:15) Dina ta ta ai Keristani karana ita hahedinaraia, Iesu ita tohotohoa bona Dirava ena Hereva ena hahegani ita badinadia, a? Tanobada taudia edia Keristani lasi karana ita dadaraia be namo badina “Satani ese tanobada taudia ibounai ia gunalaia noho.” (1 Ioa. 5:19; Roma 13:11-14) Baibel ena hereva hegeregerena ai siboda eda kara ita tahua neganai, ita be Iesu ia hereva hegeregerena, ita naria noho, a?
4 Elda taudia idia naria namonamo edia kongregesen gaukara idia karaia mai maoromaoro ida, idia diba Dirava vairanai edia gaukara ibounai ena anina do idia gwauraia hedinarai. (Heb. 13:17) Ruma bese kwarana taudia ese ma maduna ta idia abia, edia ruma bese taudia dekenai Iehova ena taravatu idia hadibaia. (Gen. 18:19; Ios. 24:15; bona 1 Timoteo 3:4, 5 itaia.) Danu, gau badana be Baibel ena hahegani ta, ita lalokau heheni, ita hagugurua! Keristani taudia korikoridia edia toana unai.—Ioa. 13:35.
5 Ma Haida Oi Hamaoroa: Naria noho karana ena anina be siboda eda kara ita naria sibona lasi. Taunimanima ma haida be hahediba taudia ai ita halaoa gaukarana ita abia. (Mat. 28:19, 20) Dekena taudia lalokau henia karana ese ita do ia doria inai tanobada do ia ore sivaraina ita hamaorolaidia bena idia roho mauri diba. Unai be Keristani taudia ibounai edia maduna. Unai be iseda tomadiho ena kahana badana ta. (Roma 10:9, 10; 1 Kor. 9:16) Nega momo taunimanima be iseda hamauria gaukara idia ura lasi eiava idia dadaraia vaitani. Ena be taunimanima momo idia kamonai lasi, to iseda maduna be unai gaukara do ita karaia noho. (Esek. 33:8, 9) Dirava bona iseda dekena taudia ita lalokau henia momokani dainai, do ita haheauka.
6 Namo lasi ita laloa ita hegeregere vadaeni. Namona be ita hekwarahi iseda hekwakwanai ese iseda lalona idia ania lasi, bona inai tanobada ena hedibagani ese ita idia tarapua lasi totona. (Luka 21:34, 35) Hari, namona be ita diba nega dokona lalonai ita noho. Kahirakahira Iesu Keriso ese inai tanobada dikana do ia kota henia negana do ia ginidae. Idia noga noho, hegaegae noho, bona naria noho taudia sibodia do idia roho mauri. Bema Iesu ena hahediba herevadia ita badinaia bena “inai dika ibounai dekenai amo” ita roho mauri, do ita moale bada herea!—Luka 21:36.