Oi Hagoadadia
1 “Metau dikadia momo” idia vara negana lalonai ita noho dainai, ita ibounai dekenai hagoadaia karana be mai anina bada. (2 Tim. 3:1) Paulo ena nega lalonai danu, ia ura tadikaka edia hebamo amo ‘hagoadaia heheni karana’ idia moalelaia. Tadikaka ia hagoadaia, ‘ta ta edia abidadama hagoadaia’ daladia do idia tahua. (Roma 1:11, 12; 14:19) Unai hekwarahi amo “Iesu ena diba tahua taudia edia kudouna idia hagoadaia” bona idia durudia ‘edia abidadama idia dogoatao noho.’ (Kara 14:22) Hari iseda nega lalonai, unai bamona hagoadaia ita abia be gau badana.
2 Iseda hereva amo ma haida ita hagoadaia diba. Dala namona ai ita hereva neganai, ia be “golo herahera siliva bosea latanai bamona.” (Aon. 25:11) Hebou dekenai haere ita henia neganai, ‘Keristani varavara taudia edia lalona ita hagoadaia.’ (Heb. 10:25) Malana gaukaralaia namonamo daladia be, ekspiriens, hanamoa herevadia, eiava lauma gaudia ita kikilaia. Malana gaukaralaia namonamo karana amo “kamonai taudia ese durua bona namo do idia davaria.”—Ef. 4:29.
3 Idia Hagoadadia Gaudia Oi Kikilaia: Filipi 4:8 ai, Paulo ese iseda hereva ia durua diba sisibana ia henia. Ia gwau momokani gaudia, hemataurai gaudia, maoromaoro gaudia, goevagoeva gaudia, lalokau gaudia, edia sivarai be namo gaudia, kara namodia gaudia, bona hanamoa gaudia ita laloa be namo. Bema iseda hereva be Dirava ena Hereva amo, do ita diba ia momokani bona ma haida ia durua diba. (Ioa. 17:17) Iseda Keristani gwauhamatana, kongregesen heboudia dekenai ita dibaia gaudia, iseda hesiai gaukara hagugurua dalana, bona unai bamona gaudia ma haida be mai anina bada gaudia. Dirava ena Hereva lalonai idia noho taravatudia bona hakaua herevadia kikilaia karana ese “aonega” ia henia mauri ita davaria totona. (2 Tim. 3:15) Iehova ena orea lalonai idia noho tadikakadia edia kara goevadia dainai ita hanamoa. Iseda tadikaka edia hebogahisi bona lalokau karana ita herevalaia bada diba. (Ioa. 13:34, 35) Edia sivarai be namo gaudia haida be iseda Keristani tadikaka edia abidadama, moale, maino, bona haheauka. Edia sivarai be namo gaudia bona kara namodia ita herevalaia neganai, ma haida edia ‘abidadama do ia hagoadaia.’—Roma 15:2.
4 Dina iboudiai, inai tanobada ena lalo-hekwarahi gaudia ese ita idia hamanokaia toho. Lalokau idia hahedinaraia tadikakadia ita bamoa neganai, unai gaudia ita laloaboio diba! Unai mai anina bada hebamo ita laloa bada bona ita ura henia momokani. Bema hanaihanai ma haida ita hagoadaia, iseda kara idia gwauraia taudia be mai momokani ida do idia gwau: “Lauegu lalona idia hanamoa bona hagoadaia.”—1 Kor. 16:18.