Nega Ibounai Iehova Ita Hanamoa

¹ Gau haida be mai anina bada dainai nega ibounai ita karadia. Idia be aniani, hahodi, bona mahuta danu. Unai gaudia ita karaia be namo bema ita ura ita mauri noho. Aposetolo Paulo ese sivarai namona harorolaia gaukarana be unai gaudia bamona ia herevalaia, ia gwau: “Nega ibounai hahenamo herevadia boubouna be Dirava do ita henia.” (Heb. 13:​15, NW) Unai dainai, Iehova hanamoa karana ita karaia hanaihanai be namo. Dina ta ta ai unai bamona ita karaia be namo, iseda guba Tamana ita hanamoa hanaihanai.

² Haida ese ena lalona idia veria gau ma haida ia karaia totona neganai, Iesu ia gwau: “Lau be Dirava ena Basileia ena Sivarai Namona hanua idauidau dekenai do lau harorolaia.” (Luka 4:43) Lagani toi mai kahana lalodiai ia haroro neganai, dina ta ta lalonai ia karaia gaudia ibounai be Dirava hanamoa totona ia karaia. Ita diba Paulo danu be unai bamona ia laloa. Badina 1 Korinto 9:16 dekenai ia gwau: “Bema Sivarai Namona lau harorolaia lasi neganai, madi, lau be dika momokani!” Mai edia abidadama Keristani taudia haida idia hagoadaia do idia naria hegaegae edia helaro be haida dekenai idia hahedinaraia totona. (1 Pet. 3:15) Hari, painia goadadia handred tausen momo bona kongregesen taudia milioni momo be unai haheitalai namodia idia tohotohoa.

³ Iseda Haheitalai Tauna, Iesu Keriso be mai ena kudouna ibounai ida ia gaukara goada. Unai ita laloa neganai, ita ura iena aena gabunai ita raka. (1 Pet. 2:21) Nega haida mauri ena hekwakwanai dina ta ta lalonai, ese ita idia hamanokaia diba. Bema ita be ful-taim moni gaukarana ita karaia, edena bamona dina ibounai Iehova ita hanamoa diba? Iseda nega bada lalonai, ruma bese totona ita karaia gaudia, ita dadaraia diba lasi. Matamata taudia momo be dina ta ta ai sikuli dekenai idia lao. Haida idia laloa ia hegeregere lasi dina iboudiai Iehova hanamoa totona. Nega ta ta, haida be hua ta lalonai, sivarai namona be dala ta ai idia harorolaia lasi.

⁴ Ieremia be sivarai namona harorolaia gaukarana ia hadokoa lasi tauna. Nega sisina lalonai, Iehova ena ladana dekenai ia hereva lasi neganai, lahi ta be ia lalonai ia araia bamona. (Ier. 20:9) Nega dikadia lalonai, Ieremia be nega ibounai dala ta ia tahua Iehova ena sivarai be haida dekenai ia gwauraia totona. Ita ese iena goada bona haheauka ita tohotohoa diba, bona dina ta ta ai nega namodia ita tahua iseda Havaraia tauna hanamoa totona, a?

⁵ Namo lasi Iehova ita herevalaia negadia be tadikaka ese idia hegaegaelaia dinadia sibona lalonai, pablisa haida ida kongregesen ena teritori dekenai ita gaukara negadia unai. Ita ura gauna be do ia kamonai tauna ta. Dina ibounai taunimanima ida ita hedavari​—idia mai iseda ruma dekenai, ita gaukara hebou, sitoa lalonai laini dekenai ita gini hebou, o basi lalonai ita helai hebou. Herevahereva hamatamaia dalana be oi hanamoa bena ena lalohadai ia veria henanadaina ta o herevana ta oi gwauraia. Momo idia davaria, unai dala be anina bada ia havaraia haroro dalana. Bema ita be mai eda dala momo ma haida ita haroro henidia totona, hua ta lalonai Basileia ena sivarai be ma ta dekenai ita herevalaia lasi be hegeregere lasi.

⁶ Iehova hanamoa hahenamona be do ia doko diba lasi. Salamo torea tauna ia hereva bamona, mauri gaudia ibounai ese Iehova do idia hanamoa, bona ita ura ita be unai orea lalonai. (Sal. 150:6) Bema iseda kudouna ese ita ia doria unai ita karaia hanaihanai totona, dala idauidau do ita tahua Iehova bona ena Hereva be dina ibounai ita harorolaia totona.