Ita Noga Noho—Lalona Veria Gaudia Ita Dadaraia, A?
1 Iesu ia gwau: “Do umui naria . . . vadaeni inai dika ibounai dekena amo do umui heau mauri.” Unai dika be do idia vara momokani. (Luka 21:36) Ita be taunimanima edia mauri lalonai dika bada negana lalonai ita noho. Lauma dalanai idia mahuta taudia be dika bada do idia davaria. Ita ibounai dekenai unai dika ia vara diba. Iesu ese aniani, inuinu, bona mauri lalonai dina ta ta edia lalo-hekwarahi gaudia ia gwauraidia. Dahaka dainai? Badina unai gaudia ese iseda lalona idia veria diba bona lauma gaudia ita laloa bada lasi bena unai amo lauma dalanai do ita mahuta diba.
2 Lalona Veria Momo Gaudia: Haida be moale karadia idia tahua momo, unai kara haida be maoro lasi, bona haida be TV raraia karana idia ura henia bada. Ita gwau lasi Basileia ita tahua guna karana anina be moale karadia ibounai do ita dadaraia. Lasi. Ita aonega bona moale karadia sisina ita karaia neganai, do ita moale. (1 Timoteo 4:8 itaia.) To bema iseda mauri lalonai moale karadia be gau badana ai ita halaoa dainai, iseda nega, kohu, bona Basileia harorolaia negadia idia haorea, iseda lalona ia veria unai.
3 Iseda lalona ia veria bena lauma dalanai mahuta ia havaraia gauna ta be kohu momo ura henia bada karana. Unai kara dainai, ta be nega bada do ia halusia moni gaukara dekenai, bona unai ese lauma gaudia tahua karana ena gabu ia abia. Haida ese lauma gaudia tahua karana idia haboioa vadaeni, badina idia ura mauri namona noholaia totona kohu momo idia tahua dainai. Momokani, “aniani bona dabua” ita abia be namo, to namona be ita naria namonamo moni ita ura henia bada garina, unai ese iseda abidadama dekena amo ita do ia veria oho diba. (1 Tim. 6:8-10) Bema iseda matana be Basileia ena ura ia raraia lasi, iseda ruma bese ena lauma gaudia do ita naria namonamo lasi bona iseda haroro gaukarana do ita karaia lasi.—1 Tim. 5:8; 2 Tim. 4:5.
4 To haida be ‘lalo-metau gaudia ese edia lalona ia guia’ bona lauma dalana ai idia mahuta vadaeni. (Luka 21:34) Nega haida, gorere eiava ruma bese lalonai hekwakwanai idia vara dainai ita lalo-metau. To namo lasi, unai gaudia dainai ita ese inai tanobada ena dokona, ia mai haraga noho gauna, do ita laloaboio.—Mar. 13:33.
5 Diabolo be ia moale bada herea bema ia kwalimu bona ita be tanobada gaudia ita tahua nihi ta bamona. Lauma dalanai ita noga noho totona, namona be ita gaukara goada. Ita diba ‘Iehova ena dina be do ia mai, henaoa tauna hanuaboi neganai ia mai bamona,’ unai dainai “ita noga noho, ita laloa goada noho” be mai anina bada. (1 Tes. 5:2, 6) Bema ita sibona lalonai, lauma dalanai mahuta karadia haida ita mamia, karaharaga “dibura ena kara do ita negea” be namo.—Roma 13:11-13.
6 Heduru Gaudia Noga Noho Totona: Unai heduru gaudia be dahaka? Guriguri be mai anina bada. Nega ibounai do ita guriguri be namo. (1 Tes. 5:17) Iseda kongregesen taudia ida do ita hebamo namonamo neganai ‘ta ta dekenai durua henia daladia do ita laloa.’ (Heb. 10:24) Nega ibounai, ita sibona eda kara ita tahua, unai amo do ita gaukara goada iseda manoka gaudia ita hanaia totona. (2 Kor. 13:5) Ita sibona eda stadi karana ese ita ia durua, “Iesu ita abidadama henia noho bona iena hadibaia herevadia ita badinaia noho.” (1 Tim 4:6) Bema ita gaukara goada, do ita hegeregere iseda lalona idia veria gaudia do ita dadaraia, do ita ‘naria namonamo, bona abidadama dekenai do ita gini goada.’—1 Kor. 16:13.