Magasin Gaukara Totona Nega Oi Atoa
1 Iehova ese ena lalona ia hadaia, Iena dala idia badinaia taudia be ‘maino, nega vairai gaudia bona helaro gaudia’ do idia abia totona. (Ier. 29:11) Gima Kohorona bona Noga! magasin lalodiai sivarai namodia idia noho bona idia be mai anina hari inai negai. Unai magasin be taunimanima idauidau bona edia noho idauidau taudia iboudiai idia durudia diba. (1 Tim. 2:4) Magasin hariharilaidia totona oi bona oiemu ruma bese taudia ese nega umui atoa, a?
2 Bema oi henia magasin edia namba ia diho ia lao, edena bamona unai gaukara do oi hanamoa lou diba? Gau badana ta be iseda magasin lalonai idia noho sivaraidia ita lalodia bada. Tau ta ia torea, ia gwau: “Emui magasin lau duahia neganai lau moale momokani. Idia be ‘heduru koikoi’ gaudia lasi, to ita idia durua bona hakaua mauri mai anina ita abia totona.” Sivarai idia tahua namonamo murinai, Gima Kohorona bona Noga! magasin lalonai idia torea, idia be heduru gaudia “hesiai tauna mai ena kamonai bona mai ena kara maoromaoro” oreana amo. (Mat. 24:45) Idia be gaukara gaudia namodia taunimanima edia kudouna hamareredia totona.
3 Namona be oi hariharilaidia magasin edia sivarai oi diba namonamo. Magasin dekena amo oiemu hanua dekenai hari idia vara hekwakwanai ia kikilaia sivaraidia oi tahua. Ruma ta ruma ta ai, eiava dala dekenai, tatau, hahine, bona memero kekeni ita hereva henidia totona, namona be ita hegaegae. Magasin ese taunimanima sibona sibona eiava ruma bese ibounai idia durudia dalana hahedinaraia totona oi hegaegae.
4 Gima Noho Magasin Gaukaralaidia Totona: Emu haroro gaukara ena sediual dekenai, magasin gaukara oi karaia be gau badana. Oi dekenai edena nega be ia namo magasin do oi hariharilaidia totona? Adorahi kahanai, Kongregesen Buka Stadi vairanai, hora tamona lalonai ruma-ta-ruma-ta magasin gaukara oi karaia toho, a? Gabu haida dekenai, hanuaboi negana be namo haroro gaukara karaia totona. Saturday be dina namona dala idauidau dekenai magasin hariharilaidia totona, to dina ma haida dekenai magasin gaukara oi karaia diba danu. Magasin Dinana dekenai, ruma ta ruma ta ai bona sitoa ta ta ai, magasin ita hariharilaidia danu be namo.
5 Namona be hua iboudiai, ita ta ta iboudiai be magasin matamatadia do ita oda henidia. Nega haida bema oi dekenai magasin gunadia idia noho, taunimanima be ruma dekenai oi davaria lasi neganai, ta oi rakatania. To namona be oi atoa namonamo, namo lasi dala dekenai idia raka taudia idia itaia, badina unai neganai idia diba ruma tauna ia noho lasi. Bema taravatu ia noho lasi, magasin gunadia be hospital dekenai oi rakatanidia diba danu. Unai oi karaia neganai, unai magasin be emu hua ena ripoti dekenai oi torea.
6 Atai heduru herevadia oi badinaia neganai, reana oi hariharilaia magasin edia namba do ia daekau. Hari inai nega dikana lalonai, hekwakwanai idia davaria kudou-namo taudia ese Gima Kohorona bona Noga! magasin edia sivarai idia moalelaidia. Iehova ena lalo-namo idia ura abia taudia ese unai magasin lalonai idia noho lauma aniani idia abia be gau badana. Unai dainai, oi gima noho magasin hariharilaidia totona, bona dala oi tahua oiemu teritori dekenai unai mai anina bada magasin hariharilaidia edia namba oi habadaia totona.