Sivarai Namona Ena Dala Hegeregerena Do Umui Mauri
1 Ita Iehova ena Witness taudia ita ura Iehova ena ladana ita hanamoa. Ita diba iseda kara, hereva, tauanina ena toana, bona dabua dainai, taunimanima ese tomadiho momokani do idia gwauraia namo o dika. Iseda hebou dekenai unai be momokani. Ita ura iseda herevahereva bona kara unuseniai be sivarai namona ena dala hegeregerena bona Iehova ia hanamoa.—Fil. 2:4.
2 Keristani taudia ese tanobada taudia edia dabua bona tauanina edia toana karaia daladia momo idia abia dae lasi. Sivarai namona idia harorolaia taudia ese unai gaudia idia laloa namonamo be namo. December 1, 1989, Gima Kohorona, rau 22 ai, ia gwau: ‘Ena be iseda dabua be davana bada gaudia lasi, to namona be idia goeva, bona mai edia toana namona. Namona be iseda tamaka edia toana idia namo. Unai hegeregerena, hebou iboudiai dekenai, Kongregesen Buka Stadi ai danu, namona be iseda tauanina idia goeva bona dabua namodia ita atoa mai eda hemataurai ida.’
3 Nega korikorina ai ginidae karana ese lalokau bona ma haida laloa guna karana ia hahedinaraia. Nega haida, hekwakwanai ia vara dainai hebou dekenai ita leiti. To bema hanaihanai ita leiti, unai ese hebou ena badina helagana ita matauraia lasi bona ma haida edia kamonai karana ita laloa bada lasi ena toana ia hahedinaraia. Leiti tauna ia helai gwauraia neganai, tadikaka be ia idia itaia bona program idia hakala henia namonamo lasi. Nega korikorina ai ginidae karana be ma haida edia namo ita laloa guna karana.
4 Iseda dekena tauna ita lalokau henia dainai, hebou lalonai inai bamona gaudia do ita karaia lasi: Ta ita hereva henia metaira, aniani ania, PK ania, pepapepa udeudea, bona nega momo ita lao mei rumana. Unai kara ese ma haida edia kamonai karana ia hadikaia diba bona unai kara be Iehova ena tomadiho gabuna matauraia karana idia hadikaia. Hebou ena nega lalonai, kongregesen ena gaukara ta ita herevalaia be maoro lasi. Bema gau ta dainai kara ta do idia karaia haraga, unai neganai sibona tadikaka ese edia helai gabudia do idia rakatania. To, namona be iboudiai idia helai namonamo bona program idia hakala henia edia ruma bese bona sibodia edia namo davaria totona. “Lalokau be haida hadikaia ia ura lasi” dainai, Kingdom Hall lalonai ita ura kara namona ita hahedinaraia.—1 Kor. 13:4, 5; Gal. 6:10.
5 Hebou dekenai, iseda natudia edia kara namona ese Iehova ena ladana ia hanamoa danu. Tama sina ese idia biagua namonamo be gau badana. Natudia ita hagoadaia idia kamonai bona idia haere be namo. Mai edia natudia maragidia tama sina momo idia ura iduara kahirakahira ai idia helai, bena bema natuna ia taitai, idia abia lao bona durua haraga, unai amo tadikaka edia hakala karana do ia hadikaia lasi.
6 Paulo ia gwau: “Sivarai Namona ena dala hegeregerena do umui mauri noho.” (Fil. 1:27) Namona be hebou dekenai ita lao neganai iseda tadikaka ita laloa guna bona ita kara namo henia. Bema iboudiai ese unai sisiba idia badinaia do ita gwau diba, “emui abidadama ese ia durua lau, bona lauegu abidadama ese ia durua umui. Inai bamona be goada ita abia nega tamona.”—Roma 1:12.