Kongregesen Hebou Hegaegaelaia Bona Moalelaia
1 Ita be tadikaka oreana ta dainai, mai iseda aonega ida hanaihanai, wiki ta ta ai, ita hebou. (1 Tim. 4:15, 16) Hebou ita moalelaidia bona idia amo namo ita davaria totona, dahaka ita karaia?
2 Namona be nega ita atoa hanaihanai hebou ita hegaegaelaia totona. Haida be nega bada idia atoa idia hegaegae totona, to haida be nega sisina idia atoa. To, aonega karana be hebou totona hegaegae negana oi tahua, herevana ita bisi, eiava ita bisi lasi. Ruma bese taudia idia hegaegae hebou be heduru gauna namo herea.—Ef. 5:15, 16.
3 Haroro Sikuli: Pura ta ta ena Baibel duahiduahi ena sediual oi badinaia noho. (Ios. 1:8) Do umui stadilaia herevana oi riviulaia, bona hebou dekenai do idia gaukaralaia bukadia oi abia mai, hereva ia henia tauna ena hereva oi badinaia totona. Edena daladia ai unai gaudia oi gaukaralaia emu haroro gaukara dekenai oi lalohadailaia.
4 Hesiai Hebou: Iseda Basileia Gaukara pepana lalonai ia noho program oi itaia. Do idia karaia herevadia oi duahia. Bema hereva ta be Gima Kohorona eiava buka ma ta amo, unai oi duahia danu. Bema kiki herevana ta do idia haheitalaia, namona be oi riviulaia guna, bena do oi hegeregere oi gaukaralaia emu haroro gaukara dekenai.
5 Gima Kohorona Stadi: Stadi herevana oi duahia guna, bona henanadai edia haere oi tahua. Idia torea Baibel siridia be emu Baibel amo oi duahia, bona do oi laloa namonamo diba. Unai stadi herevana bona oi diba vadaeni gaudia oi hahegeregerea, bena unai ese emu diba do ia habadaia. Haere oi henia totona, stadi ena paragraf ta o rua oi hegaegaelaia namonamo. Unai be ‘iseda abidadama gwauraia hedinarai noho’ dalana ena kahana badana ta.—Heb. 10:23.
6 Kongregesen Buka Stadi: Gau ginigunana be buka oi itaia; karoa edia ladana bona hereva kwaradia maragidia oi itaia. Bena, oi duahia neganai, hereva badadia oi laloa. Idia noho Baibel siridia oi riviulaia. Sibona emu hereva amo henanadai oi haerelaia toho. Stadi oi hegaegaelaia murinai, hereva badadia oi laloa lou. Unai hereva badadia idia torea edia badina bona edia anina oi laloa.—2 Tim. 2:15.
7 Hebou Oi Moalelaidia: Hebou oi moalelaidia momokani totona, gau badana be nega korikori ai oi ginidae bena emu tadikaka ida, guriguri amo, Iehova ena lauma helaga abia totona umui noia. Basileia anedia ese oi do idia hagoadaia danu. Bema oi be natudia lasi eiava badina ma ta be lasi murina kahanai do oi helai totona, namona be vairana kahana ai oi helai, program do oi hakala henia namonamo diba totona. Mai edia maragidia tama bona sina be murina kahanai, raka gabuna kahirakahira idia helai be namo, bena natuna idia abia lao murimuri neganai, tadikaka edia kamonai karana do idia hadikaia lasi.
8 Idia duahia siridia oi duahia be namo. Oi do ia durua oi kamonai gaudia oi laloatao totona. Oi dibaia gaudia be emu famili bona turadia dekenai oi herevalaia neganai, oi do ia durua danu. Bema unai sisiba oi badinaia, hebou edia namo do oi abia bona do oi moalelaidia, bona iseda lalokau idia habadaia dainai, ‘kara namodia do ita karaia.’—Heb. 10:24, 25.